Ida luba wapurichihan lau tarufudaagüle agumeiraguagüdüni?

Lídehaña lapurichihóun lau tarufudaagüle agumeiraguagüdüni o lau dábula lun hafurendeiruni saragu gürigia haruma tanigi inarüni (Huan 6:44). Ligía hínchahounbei wéiyaaña lidan afiñeni lun hadügün aransehani lun lapurichihóun ítara lidan burí fulasu le ñéingiñe lubéi hásügüra saragu gürigia lidan fulasu le ñein lubéi hapurichiha lílana damuriguaü. Kei gayara lubéi hanügüni íbirigu tarufudaagüle agumeiraguagüdüni hámagua, ligía liibe-agei lubéi dan, mama mosu lamuriahóun üma luma lúrudu. Ka íbirigu gayaraabei hídehan lidan apurichihani le? Íbirigu ha duáritiña, ha buiti hariawagún, ménrengun ligía houn hagumeserun yanu hama gürigia. Guentó, wakutiha fiu katei lídangiñe le lunbei wadügüni luma le moun lubéi wadügüni lun buídutima lan lidin woun dan le wídehan lidan luwuyeri apurichihani le.

Le lunbei wadügüni:

Gamadoun wamá, arufuda wamá berese wamá hau gürigia ha ásügürütiña. Áfaagua wamá wáhayachun hama, busu wagíame houn lau gamadóuni. Danme le lararamagun somu gürigia ariha lidoun tarufudaagüle agumeiraguagüdüni, gayaraati wariñagun lun: “Anhaün busén, gayaraati hárügüdün somu agumeiraguagüdüni.”
Maweirin lan wayarafan o wadise luéi tarufudaagüle agumeiraguagüdüni. Anihein fulasu le ídanti arihaaña lan íbirigu buídutima lan lidin houn dan le maweirin lan hadisedun luéi tarufudaagüle agumeiraguagüdüni, gama lumoun, anihein amu le ídanti mítaran lan. Ánheinti ítara liña lubéi, buídutimabei dise wamá luéi tarufudaagüle agumeiraguagüdüni darí warihin layarafadun somu gürigia arihoun agumeiraguagüdüni to ñeinboun. Ligíaalimeti wáfaagun lun wagumeserun ayanuha luma, háfuga lau wálügüdüni: “Adügañaha humaali san álügüdahani le húniwagua?
Yusu wamóun Bíbülia ságüme gayara lan.
Anhein árügüda gürigia aban tídangiñe agumeiraguagüdüni to wayusuruboun lun wíchigun aturiahani, kéiburi líburu Kátima san, afuranguagüda waméi lun ida liña lan wíchugun aturiahani tídangiñe Bíbülia ani álügüda waméi anhein gayara lubéi warihini bidéu Ka uagu lunti lubéi haturiahanu Bíbülia? luma lídangiñe wagagamurun o tídangiñe somu konputadora.
Anhein arufuda gürigia busén lan lasigirun afurendeira, amuriaha waméi lani dátosu luma, anhein gayara.

**Le moun lubéi wadügüni:**

Mayumagu wamá, madügüdara wamá hawagu gürigia, merederun wagíame óunigirei tarufudaagüle agumeiraguagüdüni kamá hamuga súdara wagía.
Masaminara wamá lúnrügüñein lan wafanreinhan agumeiraguagüdüni lahuuda apurichihani le. Wagumeserun aturiahani tídangiñeti Bíbülia lisuunibei wapurichihan, ligía lunti lubéi wáfaagun lun wayanuhan hama gürigia.
Mebereseha waméi larihíniwa tarufudaagüle agumeiraguagüdüni, mayanuhan wagíame saragu luma wapaaná. Anhein mosu lubéi wayanuhan luéigiñe gágamuru, buídutimabei lun wadisedun luéi tarufudaagüle agumeiraguagüdüni.
Masigeneha wamá hama gürigia ha mínsiñehabubaña lun uganu le wapurichihabei. Ánhawa hóusera lau furundei, buídutimabei wadiñurun lau tarufudaagüle agumeiraguagüdüni lidoun amu fulasu.