Yusu waméi dan buidu lidan ministeriu
Lidan irumu lánina eseriwiduni 2014, sügütiwa wagía, gefentiña luagu Heowá 1,945,487,604 oura apurichiha. Furanguti larufuduni katei le deregeguañu waña lan woungua agunfulira lau weseriwidun lun Heowá (Sal. 110:3; 1 Ko. 15:58). Kei “murusunrügaali [lubéi] dan”, gayaraati hamuga san wadügüni sun wayaraati lun gíbetima hama gürigia úmatiña wayanuha lidan dan le wásügürübei apurichiha? (1 Ko. 7:29.)
Lun meferidirun wamá dan lidan apurichihani, mosu aranseñu wamá lun wadügün asansiruni. Kei hénpulu, anhein sügǘ wabéi aban oura o lóugiñe lidan apurichihani mayanuhanga ni ka uma, ka gayaraabei wadügüni lun wadarirun saragu gürigia ha úmatiña gayara lan wayanuhan? Lau sun ámuñegueinarügüti lan gádantiña gürigia lidan kada fulasu, másiñati lahuudun adundehani burí le lunbei wakutihani woun lun buídutima lan wayusuruni wadaani, mítaran wamaamuga kei “ageindaguti le agayuahabei garabalirugu” (1 Ko. 9:26).
Lapurichihóun muna tuagun muna. Lidan saragu irumu le sügühalibei, héchutiña íbirigu agumesera lau hani ministeriu binaafin lau hapurichihan muna tuagun muna. Gama lumoun, kei nadagimein habéi hiibe-agei gürigia wéyuagu, ka uagu mígirun wabalin apurichihani muna tuagun muna lubá rábounweyu o danme aguñedeina lan? Lugundun lidan burí oura ligía hadarirúa gürigia hábiñe ani darangilutimati hasandiragun houngua. Ánheinti binaafin, másiñati buídutimabei lan lidin woun ánhawa apurichiha ǘmadarugu o lidan burí fulasu le ñein tubéi bísinisi.
Lapurichihóun lidan guririguaü. Lunti lichugún dábula o tarufudaagüle agumeiraguagüdüni lidan fulasu le ñéingiñe lumuti hásügüra saragu gürigia lidan fulasu le ñein lubéi latokara houn lílana damuriguaü hapurichihan (Ariha humóun Wani Ministeriu to lánina sedü-hati, irumu 2013, páhina 5). Ánhaña alouguada gürigia ha ásügürübaña lídangiñe fulasu le anuadirúbei lun lapurichihóun lidan guririguaü, gayaraati desidírü hamá Wéiyaaña lidan Afiñeni ha Adimurehabaña lidan Hiri ha Híbiri lun hasansiruni fulasu le ñein lubéi ladagaragüdüwa tarufudaagüle agumeiraguagüdüni lidoun amu le ñéingiñe lumuti gíbetima hamá gürigia ásügürütiña.
Wagiribudun bisidaña gürigia luma wíchigun aturiahani. Anhein ariha wabéi anihein lan oura lidan weyu le ídanti lougua hamá gürigia úmatiña wayanuha lidan wani ministeriu, ka uagu mayusurun wabalin dan ligía lun wagiribudun bisidaña gürigia o lun woudin íchiga aturiahani? Kei hénpulu, anhein buidu lubéi lidin woun lidan wapurichihan muna tuagun muna samudi binaafin, ma buítimati hamuga wagiribudun bisidaña gürigia o íchiga aturiahani tídangiñeti Bíbülia rábounweyu o guñoun? O anhein tídanba lubéi karü wagiribuda bisidaña gürigia, háfuga buídutimabei fiúrügü hamá íbirigu tidan kada karü, gíbetima hamaamuga gürigia wabisidahan.
Íbini gayara lan wabahüdüni dan le wásügürübei lidan apurichihani, wéiritimabei wagundan anhein buidu lidin woun. Anhein mabuidun lidin woun lidan aban luwuyeri apurichihani lidan somu oura, houcha wamá amu. Furíei wamá lun Heowá, le “Labureme nadü”, lun líderaguniwa ayusurei dan le wásügürübei lidan apurichihani buidu (Mat. 9:38).