Góunigi waméi waritagun
1. Kaba san liri weyu espechaliti lánina adamurini lidan irumu 2013, ani ka lisuunibei programa le?
1 Sagü weyu wadunragun luma katei burí le óuchagubalin waritagun o wasaminan. Lidan irumu lánina eseriwiduni 2013, le lunbei lagumeserun 1 lidan nefu-hati irumu 2012, anihánba liri adamurini lánina weyu espechaliti: “Góunigi waméi waritagun” (1 Tim. 1:19). Adügǘwati programa le lun líderaguniwa asaminara buidu luagu ida liña lan wayusuruni lubuidun idewesei le líchugubei Wabungiute woun.
2. Kaba burí álügüdahani ounabúa lidan programa?
2 Álügüdahani burí le lunbei lounabún. Lidan programa lounabúba sedü álügüdahani luáguti waritagun:
• Ka burí katei gayarabei lagadeiruni waritagun?
• Kaba íderaguawa aranserei waritagun?
• Kaba wadüga lun madurun wamá luagu lita ni aban gürigia?
• Ka warufudubei dan le wasaminarun luagun lúrudu burí le tídanbei Bíbülia ani ígira wagía lun ladundehani sun le wadügübei?
• Ida luba wadüga lun madügün wamá dañu lun haritagun amu?
• Ida luba hakipurun nibureintiña úaraguni dan le hadunragun luma óuchawaguni?
• Kaba burí buiti heresibira sun ha aganbubalin haritagun le úarabei luma le tarufudahabei Bíbülia?
3. Ida luba wasagarun saragu buiti lídangiñe weyu espechaliti lánina adamurini?
3 Ladügüñein Satanási sun liyaraati lun lagadeiruni waritagun, gama lumoun íderagua lumutiwa Heowá lun wawanduni óuchawaguni. Lau tídehan Lererun luma lóundarun, ariñagati Wáguchi le hínsiñehabubei woun: “Anihán ǘmabei, ñéingiñela hidin” (Isa. 30:21). Adamurini lánina weyu espechaliti, ligía aban manera le ídanbei líchiga Heowá adundehani woun. Ligíati, adüga huméi sun hiyaraati lun hidin aganbei sun programa. Aganba humá buidu ani samina humá ida luba lan hayusuruni ariñahani ligía lidan hibagari. Águyuguagüda huméi giñe le hafurendeirubei úara hama hiduheñu. Dan le wagunfuliruni adundehani le líchugubei Bungiu lidan wabagari, kíputiwa aban lubuidun saminaü ani adügatiwa lun madügün lan ugundani le lídanbei ubóu lani Satanási lun wadireirun luéi üma le richabei (1 Fe. 3:16).