Mígira humá lun lagidaruni saragu huberesegun sun hidaani
1. Ka uagu añahein habéi íbirigu madaahantiña daradu lun híchugun aturiahani tídangiñeti Bíbülia?
1 Añahein mabusenruntiña lun hadaahan daradu lun híchugun aturiahani tídangiñeti Bíbülia, lugundun gíbeheiti haberesegun. Le linarün katei, barüti dan betenirun lun aban aturiahati: mosu baranserun lubá aturiahani, baturiahan luma luma bíderaguni agagibudagua luma óuchawaguni. Ariñagati apostolu Pábulu rugua lan lungua lun larufudahani inarüni houn tesalónikana (1 Tesa. 2:7, 8). Halíagiñeba san hasagara dan lun híchugun aturiahani tídangiñeti Bíbülia?
2. Ka efekütu lunbei gani lani ínsiñeni le wasandirubei luagu Heowá lidan ligaburi wayusuruni wadaani?
2 Barüti dan weseriwidun lun Heowá. Gíbeti katei lunti wadügüni lidan weseriwidun Bungiu. Sagü dimaasu mosu wígirun dan lun woudin adamuridagua, wapurichihan, waliihanu Bíbülia luma lun wafurieidun. Samina wamá luagu le: aban wügüri maríeihali súnwandan gadaanibei lan tun lani weiriou ka lan yebe libe luberesegun ani ladügübei lau sun lugundan ladüga hínsiñe tan lun, ani tuguya tadügübei giñe ligiaméme. Wagíati kei weiri lubéi línsiñe Heowá woun lunti hamuga wáluahan dan lun wetenirun lun weseriwidun lun lau sun wagundan (Efe. 5:15-17; 1 Huan 5:3). Ariñagati Hesusu súdiniti lan wagunfulirun lau gumadi lánina wadügün disipulugu lidan wáhuduragun lun Heowá (Mat. 28:19, 20). Anhein gabaroun wamá katei le wagunfuliruba lau buligasion le.
3. Ida luba wíchugun aturiahani tídangiñeti Bíbülia íbini anhein asansiragua gádantiwa sódini?
3 Ka hamuga gayarabei wadügüni anhein alouguada wadaani ladüga aban sandi máraninati, wadagimanu o ladüga wetenirun lun amu katei lidan weseriwidun lun Heowá? Añahein íbirigu ladüga mabuidun lan hátuadi aba hariñagun houn gürigia ha aturiahabaña hama lun houdin hábiñe lun haturiahan. Añahein amu rútiña aturiahani luéigiñe gágamuru o tídangiñe konputadora ladüga gabügürügua lan haweiyasuhan. Añahein íbirigu ayanuhatiña hama amu apurichihatiña lídangiñetiña damuriguaü ha arufudubaña gayara lan lafiñerúniwa hawagu lun hetenirun houn gürigia ha aturiahabaña hama dan le siñabei lan hetenirun houn houngua.
4. Kaba afayeiruahaü weresibira ánhawa íchiga aturiahani tídangiñeti Bíbülia?
4 Wéiriti meha ugundani le lasandirubei Pábulu lau líchugun lídangiñe lidaani luma lere lun líderagun amu asubudirei inarüni (Adü. 20:35). Larihini resultóu le lanügübei wadagimanu le ladügübei Tesalónika ínchaha lumuti íchiga seremei lun Heowá (1 Tesa. 1:2). Ánhawa íchiga aturiahani tídangiñeti Bíbülia íbini gibe lan weberesegun, gúndaatimabadiwa lau wagunfulirun lau wani ministeriu.