Le gayaraabei hadügün lun líderagunün aturiaha sagü dimaasu
HÉNRENGUTI san hun haturiaha hábuguarügü sagü dimaasu? Anihein dan susereti katei le houn saragu wádangiñe. Samina wamá luagu katei le wadügübei sagü weyu le mégeibei dan luma áfaaguni, kei burí ágouni. Lárigiñe wagoun, ma buiti wasandiragun woungua, adián? Buiti giñe wasandiragun woungua lárigiñe waturiahanu Bíbülia, ítara liña kamá larumadaguagüdüñadiwa Heowá lau tidunari “lererun” (Efe. 5:26). Gayaraabei líderagunün adundehani burí le:
Adüga humá aban programa. Anihán aban katei le lunbei hetenirun kristiánugu lun, lun haturiahan hábuguarügü “lun gayara lan hanúadahani katei le buídubei” (Fili. 1:10). Lun mabulieidun humani hasigirunu programa, buídubei lun híchugunu lidan aban fulasu le gayaraabei aríaagu humá tun, kei burí luagu tubenari réfüri. O gayaraati giñe hesetiruni higagamurun lun laritaguagüdünün chülühali lan lóurate haturiahan.
Anúadira huméi dan, luma ligaburi aturiahani le buídutimabei hun. Añahein gayaraati hásügürün saragu dan aturiaha, añahein amu himei hamuti haturiahan murusun murusun. Ati huguya, ka himei hubéi? Lunti gabaroun humani le himei hubéi danme hadügünu hani programa. Ánheinti mabusenrun hubéi haturiahan danme le lachülürün lóurate haturiahan? Ka uagu mouchun hubéi haturiahan íbini díisirügü minutu? Gayaraati genege lan murusunrügübei lan dan hau aturiaha, lau sun lira buítimati sügǘ lau ni kata. Másiñati lárigiñe lan hagumeserun aturiaha busenbadün lan hasigirun aturiaha murusun dan lanwoun (Fili. 2:13).
Anúadira huméi tema le lunbei haturiahani lubaragiñe lachülürün lóurate haturiahan. Anhein danme lan hañuurun aturiaha ligíaba lan háluahan kaba lan hakutihan, mámame hayusuruni hidaani buidu (Efe. 5:16). Ka uagu madügün hubéi aban lísüta lau tema le habusenrunbei haturiahan? Ságüme liabin somu álügüdahani hichügüwagun, bürǘ huméi. Ánheinti ñübuin somu saminaü hichügüwagun dan le aünha lan akutiha o aturiaha, bürǘ huméi tidan hilisüta.
Adüga humá asansiruni danme le mégeiwa lan. Le súdinitimabei, haturiahan sagü dimaasu. Ligíati, anhein mégeiwa lubéi, sansi huméi weyu, oura, lidura luma burí tema le lunbei haturiahani.
Barüti taturiahóun Bíbülia hábuguarügü saragu buiti hun: ladügüba lun yarafatima humá lun Heowá, ani buídubei le lunbei hanúadiruni ani buídubei giñe hasandiragun hungua (Hos. 1:8).