Buidutimalá wadügüni katei: aranseha waméi üma lubá wagiribudun

Ka uagu súdini lubéi? Dan le wadarirun gürigia le arufuduti busén lan lasigirun afurendeira, busentiwa wagiribudun dánmeya anihein lan lúbiñe lun gayara lan wáturaguni ilaü lánina inarüni le wábunubei (1 Ko. 3:6). Lun wadügüni lira, liibe-agei dan, mosu waranseruni üma lubá wagiribudun lau wálügüdüni, lubaragiñe wáfuridun lúbiñegiñe, kaba lan weyu gayara wagiribudun bisidei. Buídubei giñe wígirun aban álügüdahani mounabúnga lun wakutihani dánmeya wagiribudun, ladügüba lira lun lagurabahani gürigia wagiribudun. Anhein tidan lubéi agumeiraguagüdüni to wígiruboun lun lounabúa álügüdahani ligía, másiñati busentimabei lan laliihanu. Adügati giñe waranseruni üma lubá wayanuhan amu weyu lun ménrenguntima lan woun wagiribudun lugundun anúadira wamaali kaba lan uagu wadimureha ani subudi laali giñe gürigia ligía. Danme wagiribudun bisidei, gayaraabei wafuranguagüdüni lun wagiribuduña lan lun wóunabuni álügüdahani le wígirubei mounabúnga weyu le wabisidahanbalin, gayaraahalimeti wariñaguni le lunbei wariñaguni.

Le lunbei wadügüni:

Danme le haranseruni le lunbei hariñaguni lidan apurichihani muna tuagun muna, samina huméi giñe kaba lan álügüdahani hígira mounabúnga lubá hagiribudun bisidaña gürigia. Anúadira huméi álügüdahani ligía tídangiñe agumeiraguagüdüni to hasaminaruboun hígirun houn gürigia weyu ligía. O gayaraati hasagaruni tídangiñe agumeiraguagüdüni to wayusuruboun lun waturiahanu Bíbülia hama gürigia, ábameti hanügünu agumeiraguagüdüni tuguya lun gürigia dánmeya hagiribudun bisidei.
Danme lásurun hadimurehan luma aban gürigia le arufuduti busén lan lasigirun afurendeira, ariñaga huméi lun busén humá hadimurehan luma amu weyu, ábameti hadügüni álügüdahani le aranse humaalibei lun. Anihein fulasu le ídanti bereseguhei hamá gürigia ani mabusenruntiña hánharun lunya wabisidahaniña. Anhein ítara liña lubéi, gayaraati hariñagun: “Gadarirúatün san húbiñe kéiburi oura le? [Ígira humá lun lóunabun.] Násügürüba yáagiñe leweñegua dimaasu ani hínsiñeti hamuga nun nararamagun huma murusun oura lun wóunabuni álügüdahani le [írida huméi álügüdahani ligía]. Ánheinmeti bereseguñadün lubéi oura ligía, madiherida humá”.
Anhaün ariñaga lun gürigia hachülürüba lan ítaga weyu luma ítaga oura gúnfuli humá (Mat. 5:37). Dánmeti hagiribudun bisidei gürigia aranseya huméi üma lubá hagiribudun amu weyu.

Houcha humá hadügüni le lidan sun hati:

Danme le haranseruni le lunbei hariñaguni lidan apurichihani, samina humá luagun aban álügüdahani le lunti hóunabuni dánmeya hagiribudun bisidaña gürigia. Ariñaga huméi houn íbirigu ha áfuridutiña apurichiha huma kaba lan álügüdahani hadüga.