Ida luba wayusurunu tratadu lun wagumeserun ayanuha hama gürigia?

Lúmagiñe eneru, irumu 2018, lasagarúña ariñahani lidan tidáü ubanaü Habagari Kristiánugu luma Heseriwidun lun wagumeserun ayanuha hama gürigia. Ínchahouatiwa lun wayanuhan hama gürigia lubaragiñe rúrügü wamá somu agumeiraguagüdüni houn. Lun wasubudiruni ida luba lan wadügüni, adügǘwaali burí bidéu luáguti ida luba lan wagumeserun ayanuha hama gürigia láurügü wayusurunu Bíbülia. Mini lan san lira siñá lan wayusurun agumeiraguagüdüni dan le wapurichihan tidan burí muna? Uá. Kéiburi tratadu, gayaraati tahuudun woun lun wagumeserun ayanuha hama gürigia. Gayaraati wafalaruni adundehani burí le danme le wapurichihan tau:

1. Wadügüni álügüdahani le áfuachubei luagu tidáü tratadu lun gürigia ígira wagíame dan lun lun lanúadirun aban lídangiñe óunabagülei le ñeinbei.

2. Warufuduni bérusu tídangiñeti Bíbülia le íñugiñebei libiti libiaman ubanaü lun gürigia. Ánheinti gadaani lubéi gürigia ligía, ábame waliihani ani akutiha wameime ariñahani le tídanbei tratadu.

3. Wederegerunu tratadu lun gürigia, ábameti wínchahani lun lagumuchunu aliiha danme le gadaani lan.

4. Lubaragiñe woudin, arufuda waméi álügüdahani le lábugiñebei fánreinti “Álügüdagua humá hungua” lun gürigia, ábameti wariñagun lun wagiribuduba lan amu weyu lun wakutihani óunabagülei le tíchugubei Bíbülia.

Danme wagiribudun, akutiha waméi óunabagülei ani ígira wamá amu álügüdahani mounabúnga lubá leweñegua bisida. Gayaraati wanúadirun aban álügüdahani lídangiñe wani páhina lidan Internet o tídangiñe agumeiraguagüdüni to áfuachuboun lidan lagumuhóun ubanaü le tídanbei tratadu. Danme warihini gayara lan wadügüni, derege wamá aban garüdia Uganu buiti lúmagiñeti Bungiu o amu tídangiñe agumeiraguagüdüni tótima wayusuruboun lun warufudahan to burí wayusuruboun lun wíchugun aturiahani tídangiñeti Bíbülia.