Ida luba wayusuruni fánreinti “Le gayaraabei wariñaguni lidan apurichihani”?

Lúmagiñe eneru, irumu 2018, láfuachuña fánreinti “Le gayaraabei wariñaguni lidan apurichihani” lidan tidáü ubanaü Le lunbei ladügǘniwa lidan adamuridaguni Habagari Kristiánugu luma Heseriwidun. Ida luba wayusuruni fánreinti le?

Lidan dasi le ichugúbei woun lidan damuriguaü. Mosu wayusuruni álügüdahani, bérusu luma álügüdahani le ñeinbei lubá leweñegua bisida. Lau sun lira, mama mosu wariñaguni kada dimurei kei lariñawagún lidan bidéu. Kei hénpulu, gayaraati wasansiraguni sügǘ le aubei wagumesera ayanuha, ebelaagülei o lila yanu. Gayaraati giñe wederegerun aban tídangiñe garüdia, bidéu o líburu tídangiñe Agumeiraguagüdüni tótima wayusuruboun lun warufudahan lun gürigia íbini mariñagun lani adundehani.

Lidan apurichihani. Adügǘwati fánreinti le lun wasubudiruni ka lan gayaraabei wariñaguni lidan apurichihani. Anhein arufuda gürigia busén lan lasigirun afurendeira, gayaraati hayusuruni ariñahani le ichugúbei lun hagiribudun adügei bisida lun hasigirun ayanuha luma. Gayaraati hasansiraguni murusunraü o hadügün amu. Buítimabei san lidin woun anhein wayusura adundehani le ichugúbei lidan amu hati o amu bérusu tídangiñeti Bíbülia? Susereeli san somu katei le uágubei habusenra gürigia hayanuhan o somu ñunsu le sun líñabei lasuseredun? Lau sun gayara lan wayusuruni fánreinti Le gayaraabei wariñaguni lidan apurichihani según warihini buídutima lan, mabulieida waméi le lan súdinitimabei woun wapurichihani “uganu le lánina asalbaruni” houn amu (1 Ko 9:22, 23).