Ibihatiwa esefuruni seremei lun Heowá luma lun Hesusu

Ka turobuli úmabei hagagibudagua sagü weyu? Hachügüdina san iduheñu huguya ani hadügüñein sun hiyaraati lun hagunfulirun lau le yuubei hun? Hagüriahañanu san hisaanigu hábugua ani móustarunti hiseinsun hun lubá sun hati? Ademahatiña san bupanaagu bun leskuelarugu? Wuribati san hátuadi o hasandiruñein igarigu le lanügübei aweiyaduni? Lau sun sun lan wagía gaturobulintiwa, añahein íbirigu agagibudagutiña luma lóugiñe aban turobuli lidan aban. Le buídubei, subudi wamani málühadiwa lan esefura luéi sun le (2 Ko 4:16-18).

Sunme awanha lan agurabei lachülürün weyu ligía, ruti awalidaguni woun wasubudiruni gunfuranda lani Heowá le wásügürübei, ariha lani áfaaguni le wadügübei lun úaragua wamá luma lun wawandun kei aban katei le wéiriti lebegi ani füramaseti labinirubadiwa lan ámuñegü (Her 29:11, 12). Bereseti giñe Hesusu wau. Sunme awanha lan agunfulira lau lugumadin, füramaseti woun: “Anahein [...] huma sagü weyu” (Mt 28:20). Ánhawa adireira dan lun wararamagun asaminara luagun esefuruni le lunbei weresibiruni lábugiñe Larúeihan Bungiu, héretimabadiwa lun wawandun lénrengunga ani wéiritimabei wemenigin (Rom 8:19-21).

LÁRIGIÑE HARIHINI BIDÉU KEI AYARAFADEINA LIÑA LUBÉI LIÑAWAN DAN, KIPU WAMÉI WARIHIN LUAGUN KRISTU, ÓUNABA HUMÉI ÁLÜGÜDAHANI BURÍ LE:

• Ka adügübei lun hafanreinragun gürigia luéi Bungiu ani ka lanügübei lira woun?

• Ka ibagari hagurabubei ha úaraguabaña lun Heowá?

• Ka ídehabei lun gayara lan wibihini lubuidun ibagari le?

• Kátima lídangiñe füramasei le lunbei lagunfulirun lídanme iseri ubóu uáguntimabei weiri lan hourabahóun?