Ida liña san gayara lan líderagunün furíei?

Ñǘdüntu meha Pamela áluaha surusia ladüga weiri lan tisandi. Amuriahatu giñe erei luma Bungiu lun tawanduni lirun tásügürün. Íderagua lumutu san tafurieidun?

Abahüdaguatu woun: “Dan meha le lagaranihóuña lubéi lun kánserü, gíbeti meha wéiyaasu nasandirun anufudei. Dan méhati nafurieidun lun Heowá, sanditina meha darangilaü ani gayaraahali meha nasaminaruni katei buidu. Lau sun sandigidina lan saragu gáriti, íderagua lumutina furíei lun narihini katei lau aban lubuidun igaburi. Dan le hálügüdünina gürigia ida niña lan, aba nóunabuniña: ‘Lau sun wuriba lan nátuadi, gúndaatina’”.

Mama mosu lasuseredun aban katei wéiriti luriban woun ítara lun wafurieidun lun Bungiu. Súngubei wagía, gagibuguatiwa luma turobuli, weiri lan yebe o ñǘbüri lan, ani mégeitiwa ídemuei lun wasigirun wabaruaguóun. Huuti funa san wafurieidun?

Ínchaha tumutiwa Bíbülia ígirei sun wadiheri lun Heowá ani füramasetu líderagubadiwa lan lugundun “mígirunbei lun héiguadun gürigia ha gaganbadibaña lun” (Sálumu 55:22). Ma lueirin gurasu le líchugubei dimurei burí le, adián? Ida lubati líderaguniwa furíei? Dan le wafurieidun lun Bungiu kei línsiñe lun, ru lumuti le wemegeirubei woun lun wiñuragun lídangiñe turobuli (ariha huméi fánreinti “Buiti le lanügübei furíei”).

Buiti le lanügübei furíei

Darangilaü lun wasaminan

“Ariñagarügü huméi sun katei lun Bungiu súnwandan dan le hafurieidun, [...] ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Filipuna 4:6, 7). Anhein wabahüdagua wadiheri lun Bungiu, líderagubadiwa lun darangilañu wamá luma lun wóuserun buidu íbini ladügüdarúña lan wawagu.

Lichú aau

“Anhein megei lubéi aban hídangiñe lichú aau, amuriahalá luma Bungiu, ábame líchuguni lun, ladüga mánginti ani ruti lau areini houn súngubei” (Santiagu 1:5). Dan le ladügüdarúña lan wawagu, anihein dan manúadirun wamá buidu. Ánhawa amuriaha lichú aau luma Bungiu, gayaraabei líderaguniwa aritagua adundehani huuti tídangiñeti Bíbülia, to Lererun.

Dǘgüdaguaü luma gurasu

“Sun katei gayara numuti lau lídehan le íchugubei erei nun” (Filipuna 4:13, TNM). Kei Heowá lan Búngiubei le suntigabafu, gayaraati líchuguni dǘgüdaguaü le wemegeirubei woun lun wagagibudagun luma lénrengunga luma lun wawandun (Isaíasi 40:29). Ariñagatu giñe Bíbülia Heowá lan Bungiu le gayaraabei líchugun “dǘgüdaguaü woun lidan sun wasufurirun” (2 Korintuna 1:3, 4).

GAYARAATI GIÑE LÍDERAGUNÜN FURÍEI

Lau sun mafosurun lanün Heowá lun hafurieidun lun, ínchaha lumutün lau ínsiñehabuni lun hadügüni (Heremíasi 29:11, 12). Ánheinti furíeiñahaadün lubéi lun Bungiu ani sanditün mounabúniwa humá? Meferidira huméi huguraasun, mábürühan ligíame harüna. Anihein dan míderagun hamaniña agübürigu ha hínsiñehabubaña hasaanigu lidan dan luma igaburi le habusenrubei isaanigu hagía. Háfuga saminaaña agübürigu luagun aban igaburi buídutimati lun laransehóun turobuli ligía. Le chóurubei íderagua hamaniña agübürigu ha buídubaña hasaanigu súnwandan.

Busenti giñe Bungiu, Úguchili le hínsiñehabutimabei hádangiñe súngubei, líderagunün. Anhaün asaminara luagun adundehani tídangiñeti Bíbülia le akutiha wamaalibei, áfaagua huguyame lun hafalaruni lidan hibagari, lóunabubei Bungiu hafurieidun lidan igaburi le buídutimabei (Sálumu 34:15; Matéu 7:7-11).