2 | Dǘgüdaguaü tídangiñe Lererun Bungiu

ARIÑAGATU BÍBÜLIA: “Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (RÓMANA 15:4).

Le mini lubéi

Anihein dimurei tidan Bíbülia le ruti dǘgüdaguaü woun, le íderagubaliwa lun mábürühan lan warüna dan le liábingua luriban saminaü wachügüwagun. Ruti giñe uganu le tídanbei Bíbülia emenigini woun luagu yarafaali lan dan lun lagumuchun sun igarigu le wasandirubei.

Ida lubati líderaguniwa katei le?

Sun wagía, anihein dan wáhüchürün o wírudun, ánhañati gürigia ha láubaña sandi le lánina lueirin íruni o idiheri, sandiguatiña houngua ítara sagü weyu. Ida luba tíderaguniña Bíbülia?

Gíbeti saminaü buiti tidan Bíbülia le gayaraabei líderaguniwa asagarei luriban saminaü wachügüwagugiñe (Filipuna 4:8). Gayaraati tabuinchagüdüni wachügü lau saminaü buiti le gayaraabei líchugun ñuruguaü tun wanigi, íderagua láwame árügüdagua woungua luéi luriban katei le wasandirubei (Sálumu 94:18, 19).
Íderagua tumutiwa Bíbülia lun masaminarun wamá mebegi wamá ni kata (Lúkasi 12:6, 7).
Gíbeti bérusu burí tidan Bíbülia le achoururagüdübalin woun mámañadiwa lan wábuguarügü, ani gunfuranda lani Bungiu le adügübaliwa le wasandirubei (Sálumu 34:18; 1 Huan 3:19, 20).
Füramasetu Bíbülia ladügüba lan Bungiu lun wabulieiduni saminaü le asufuriragüdübaliwa (Isaíasi 65:17; Arufudúni 21:4). Dan le wasufuriruña lan ladüga sandi le lánina lueirin idiheri, gayaraati líchugun füramasei burí le erei woun lun wasigirun wabaruaguóun.

Ligaburi tíderagunu Bíbülia Jessica

Le nasufurirubei ladüga sandi le lánina lanarime íruni

“Dan meha le 25 lubéi irumu nau, aba nábürühan lau sandi, ariñagati surusia nun sandi lan le lánina lanarime íruni nuágubei. Sódini buriha naritaguni luriban burí katei le susereelibei nun ani siñaguatina meha nungua luma, adügatiti lira lun nasufurirun saragu. Afuranguagüda hamuti surusiagu nun adügaali lan katei burí wuribati le meha winwan náalibei lun ladagarun sandi le lánina lanarime íruni nuagu ladüga lagiribuhan aritaguni ligía nichügüwagun. Bóugudin luéi árani le nátahabei, ayanuhatina giñe luma aban surusia le subudihabúbei luagu katei le lun líderagunina ígirei luriban saminaü le adügübei lun nasandirun”.

Ida liña tíderagunina Bíbülia?

“Dántima le komora lan nisandi, ábaha lebelurun saragu anufudei nun sandí nuguya idiheri darí lun neferidiruni nidabagu. Anihein burí guñoun mederaaguagüdün lan nisaminan. Ani kei lafuranguagüdüni Sálumu 94:19, ruti Bungiu dǘgüdaguaü woun dan le lagibedagun idiheri wasaminanrugu. Ligía aba lubeiha nakipurunu nibibülian yarafa tun nigabanan tuma aban kuadernu lau burí bérusu tídangiñeti Bíbülia le ruti dǘgüdaguaü nun. Dántiha le neferidiruni nidabagu guñoun, ábaha naliihan somu bérusu tídangiñe Bíbülia, ítara liña nígirun lun Lererunba lan Bungiu íchiga dǘgüdaguaü nun.

“Ínchaha tumutiwa Bíbülia lun wamahadun lun saminaü le múaranbei luma le furendei wamaalibei luagu Bungiu. Lidan dan le sügühalibei, saminatina yebe mebegi nan ni kata, mouni nan ani madüna nan lun hasandirun amu ínsiñeni nuagu. Ánheinti guenlé, subudi naali múaran lan saminaü le luma le tarufudahabei Bíbülia, to ídanboun nafurendeira aban lan Úguchili hínsiñehabuti ani gudemehabuti Bungiu le saminabei luagun kada aban wádangiñe. Murusun murusun, aba gayaraahali lan nasaminarun buidu lubaragiñe nígirun lun nisaminan lan agumadirana. Furendeihadina aríagua nungua kei larihinina Bungiu. Anihántima katei le íderagubalina agidarei luriban saminaü le meha nuágubei.

“Memeniha nanigi lachülürün dan leme ídanba lubéi maritagun wamaali lanme katei burí le adügübei lun wasandiragun woungua wuriba. Adügati nasubudiruni luagu lachülürüba lan dan lun úaali lanme lisandi ichügü lun nibihin erei lun nagagibudagun luma nisandi guenlé darime lachülürün dan lun nareidagun sunsuinagubei”.