Ida luba wederebudagüdüni wafiñen luagu ladügübei lan Heowá Ubóu le ábanme paraísu?

1, 2. Sun awanha lan agurabahei iseri Ubóu, ka lunbei wadügüni?

WÉIRITI eteingiruni le wasandirubei luagu füramasei le ladügübei Heowá luagu ladügüba lan aban iseri Ubóu le ñeinba lubéi ñein lan irichaü (2 Fe. 3:13). Íbini ibidiñe lan woun ídaame lan liabin iseri Ubóu, sun le warihibei geyegu wau, arufudati yarafamémeeli lan dan lun lagunfulirun (Mat. 24:32-34, 36; Adü. 1:7).

² Sun wagía lunti wederebudagüdüni wafiñen luagu füramasei le meberesenga átirihali lan dan wau eseriwida lun Heowá. Ka uagu? Ladüga gayaraati ledebilidun íbini afiñeni létima derebugutimaabei. Wati apostolu Pábulu lun lilouguan afiñeni: “figóu le agüragubaliwa” (Ebü. 12:1). Lun masuseredun lan le woun, lunti wéchudun akutihei ariñahani le achoururagüdübalin woun málühali lan Heowá anüga aban iseri Ubóu (Ebü. 11:1).

3. Kaba wariha lidan aturiahani le?

³ Lidan aturiahani le, wakutihaba ǘrüwa igaburi le gayaraabei líderaguniwa ederebudagüdei wafiñen luagu füramasei le ladügübei Heowá luagu ñeinbei lan aban iseri Ubóu: 1) wararamagun asaminara luagu lebegi esefuruni, 2) wasaminarun luagu lubafu Heowá luma 3) wetenirun lun katei lánina wáhuduragun lun Heowá. Lárigiñe, warihibei lederebudagüdübei lan dimurei le lariñagubei Heowá lun Abakúku wafiñen. Furumiñe, wayanuha luagu ka lan uéigiñe lunti lubéi wederebudagüdüni wafiñen luagu iseri Ubóu.

KA UAGU MEGEI WABÉI ABAN AFIÑENI HÉRETI?

4. Ka katei lídangiñe le wanúadirubei mégeibei lun derebugu lan wafiñen?

⁴ Sagü weyu anúadiratiwa katei le ñein lubéi lemegeirúa afiñeni derebuguti. Kéiburi, anúadiratiwa isebáhari, anúadiratiwa kaba lan waturiaha, anhein wamarieiduba lubéi, anhein gasaanigubadiwa lubéi, kaba lan wawadigimari luma kaba lan uma gamadagua wamá. Gayaraati wálügüdagun woungua: “Ka larufudubei le nanúadirubei? Arufuda numuti san luagu afiñe nan luagu lasansiraali lan Bungiu Ubóu le luagu aban iseri? Odi ítara hiña kei gürigia ha asaminarubaña ibagari lan le ligíarügübei lan?” (Mat. 6:19, 20; Luk. 12:16-21). Anhein wederebudagüda wafiñen luagu yarafaali lan iseri Ubóu, líderagubadiwa lun buídutima lan le lunbei wanúadiruni.

5, 6. a) Ka uagu megei wabéi aban afiñeni derebuguti dan le wásügürün lídangiñe lénrengunga? Ru humá aban hénpulu.

⁵ Gagibuguatiwa giñe luma burí turobuli le adügübei lúntima derebugu lan wafiñen, kei burí éibaahouni, sandi le mareidaguati o furumiñeguarügü amu katei le gayaraabei lírudagüdüniwa. Dan burí le lagumeserun lénrengunga lidan wabagari, másiñati wagagibudagun luma lau ganigi. Gama lumoun, anhein ásügüra saragu dan ani awanhagua agagibudagua luma lénrengunga ligía, mégeibadiwa aban afiñeni le derebuguti lun wawandun luma lun wasigirun eseriwida lun Heowá lau ganigi (Rom. 12:12; 1 Fe. 1:6, 7).

⁶ Dan le wásügürün lídangiñe lénrengunga, másiñati wasaminarun manügün lubéi lan Heowá iseri Ubóu. Ladüga funa san débili lan wafiñen wasaminarubei ítara? Uá, mítaranti. Ru wamá aban hénpulu. Dan le lídanñadiwa lan lidaani lidiliga, háfuga wasaminarun machülübei lan lidaani lárouga. Gama lumoun, súnwandan lachülürüba lan lidaani lárouga. Ítarameme, dan le héiguañu liña lan warüna, másiñati wasaminarun miábinbei lan iseri Ubóu. Anhein derebugu wafiñen, subudi wabéi lagunfuliruba lan le füramase lubéi Heowá (Sal. 94:3, 14, 15; Ebü. 6:17-19). Líderagubadiwa ichouruni ligía lun wabaruaguounméme wamá íchigei wáhuduragun lun Heowá lidan furumiñeti lúgaaru.

7. Ka katei lunbei madügün wamani?

⁷ Mégeitiwa giñe aban afiñeni derebuguti lun gayara lan wapurichihan. Dan le wayanuhan luagu iseri Ubóu le yarafaalibei, le füramase lubéi Bungiu, saminatiña saragu gürigia wéiriya lan lubuidun ñunsu le lun inarünibei lan (Mat. 24:14; Ese. 33:32). Mígira wamá lun láfadarun igaburi le wawagu. Lun masuseredun lan le woun, lunti wasigirun ederebudagüdei wafiñen. Ariha wamá ǘrüwa katei le gayaraabei wadügüni.

WARARAMAGUN ASAMINARA LUAGU LEBEGI ESEFURUNI

8, 9. Ida liña lederebudagüdüni wafiñen wararamagun asaminara luagu lebegi esefuruni?

⁸ Aban katei le lunbei wadügüni anhein busén wabéi wederebudagüdüni wafiñen, wararamagun asaminara luagu lebegi esefuruni. Chóurugüda lumuti lebegi esefuruni woun lagunfulirubei lan Bungiu le füramase lubéi. Súdiniti wadireirun dan lun wararamagun asaminara luagu sun katei le adügǘbei lun ñein lan lebegi esefuruni, luma ka lan uagu líchigei Heowá. Ani ítara, laganwounduba wafiñen luagu lanügüba lan Heowá aban Ubóu le buídutimati ani le ñeinba lubéi wawinwanda lun sun dan. Ka uagu wariñagei le?

⁹ Samina wamá luagu le adügǘbei lun wibihini lebegi esefuruni. Aranseñu liña meha Heowá lun lóunahani Liráü le hínsiñebei lun, le besi lumada ubouagun lun lagüriahóun kei gürigia mafigounti. Dan meha le ya lubéi Hesusu ubouagu, awandati meha saragu sügǘ hénrenguti, súfuriti meha ani ma meha luriban lounwen. Ma lanarime liserun lafayeihan Heowá luagu wesefurun. Kei hínsiñehabu lubéi Heowá maweiyasunbei hamuga meha ígira lun lásügürün Lisaani lídangiñe sun súfuri le lúnrügü líchugun aban lubuidun ibagari woun luágurügü murusun dan (Huan 3:16; 1 Fe. 1:18, 19). Kei weiri lubéi ebegi le lafayeirubei Heowá, ladügüba lun wawinwandun lun sun dan lidan iseri Ubóu.

WASAMINARUN LUAGU LUBAFU HEOWÁ

10. Según Éfesuna 3:20, ka gayaraabei ladügüni Heowá?

¹⁰ Ábanya igaburi lun wederebudagüdüni wafiñen, lau wasaminarun luagu lubafu Heowá. Gabafuti lun lagunfuliruni le füramase lubéi. Furanguti, lidan ligaburi wasaminan kei gürigia, másiñati hénrengu lan woun wánharun gayaraabei lan wawinwandun lun sun dan lidan aban iseri Ubóu. Gama lumoun, súnwandan füramase lan Heowá katei woun le siñá wamuti adüga, füramase lubalin ladüga ligía lan Suntigabafubei (Hob. 42:2; Mar. 10:27). Ma inarüni gayara lan ladügün Heowá füramasei hanarimeburiti? (Aliiha huméi Éfesuna 3:20).

11. Írida humá aban füramasei hanarimeburiti le ladügübei Heowá (ariha huméi rekuáduru “Fiu füramasei hanarimeburiti le lagunfulirubei Heowá”).

¹¹ Samina wamá luagun füramasei le ladügübei Heowá houn lubúeingu lidan dan le sügühalibei, le meha genegebei hénrengubei lan lagunfulirun. Aba lariñagun Heowá lun Abüraámü luma tun Sara gasaanibaña lan aban wügüri irahü íbini derebuguhaña lan saragu (Agu. 17:15-17). Chóurugüda lumuti giñe Heowá lun Abüraámü líchugubei lan sun fulasu le Kananbei houn ladügawagun. Sügüti saragu irumu hau ladügawagun Abüraámü ha ísüraelina amudirawagúa Ehiptu, háfuga saminatiña magunfulirunbei lan füramasei ligía. Gama lumoun, gúnfuliti. Luagu le aban oubaü, saragu irumu lárigiñe, ariñagati giñe Heowá tun Isawéli, aban meha würi derebuguharu luagu gasaaniboun lan. Ani chóurugüda lumuti giñe tun María aban würi gañüngiru tágurahabei lan Liráü Bungiu. Lau lagunfulirun katei le, lagunfuliruña meha füramasei le meha ladügübei Heowá lidan fuluri-agei Edén saragu milu irumu lubaragiñe (Agu. 3:15).

12. Ka lachoururagüdübei Hosué 23:14 luma Isaíasi 55:10, 11 woun luagu lubafu Heowá?

¹² Dan le wasaminarun luagu saragu füramasei le ladügübei Heowá luma ida liña lan lagunfuliruni, aba warihini lueirin lubafu. Derebugugüda lumuti katei le wafiñen luagu lanügübei lan Heowá iseri Ubóu le füramase lubéi (aliiha huméi Hosué 23:14; Isaíasi 55:10, 11). Lau gunfuranda wamani le, aransetimaabadiwa lun wíderaguniña amu lun gunfuranda hamani mama lan uénedü ni úraga füramasei luáguti iseri Ubóu. Ligía lariñagunbalin Heowá katei le luagu iseri sielu luma iseri Ubóu: “Inarüniti dimurei burí le ani gayaraati lafiñerúniwa luagu” (Aruf. 21:1, 5).

TENI WAMÁ LUN KATEI LE LÁNINA WÁHUDURAGUN LUN BUNGIU

13. Ida liña lederebudagüdüni adamuridaguni wafiñen?

¹³ Le lǘrüwan igaburi lun wederebudagüdüni wafiñen, wetenirun lun katei le lánina wáhuduragun lun Bungiu. Kei hénpulu, samina wamá luagu íderagua lániwa adamuridaguni saragu. Ariñagatu Anna,b to eseriwiduboun luagu saragu dan lidan ámuñegueinarügü dasi lidan dan dayarüti: “Ítara liña adamuridaguni nun kei aban óunguru le adügübei lun derebugu lan nafiñen. Íbini anhein marufudahadi lubéi íbiri le íchugubei yanu o mariñagun lan somu katei iseri, súnwandan naganbun somu katei le gayaraabei líderagunina gunfurandei somu inarüni tídangiñeti Bíbülia, ani ítarati, ábatima laganwoundun nafiñen”. Lidan adamuridaguni, aganbatiwa giñe óunabagülei le gayaraabei lederebudagüdüni wafiñen (Rom. 1:11, 12; 10:17).

14. Ida liña lederebudagüdüni apurichihani wafiñen?

¹⁴ Derebugugüda wamuti giñe wafiñen dan le wapurichihan (Ebü. 10:23). Ariñagatu Barbara, to barüharuboun lóugiñe 70 irumu eseriwida lun Heowá: “Súnwandan lederebudagüdüni apurichihani nafiñen. Aba níchugun fe eibu lan nayanuhan luagu Heowá luma luagu lubuidun burí füramasei le ladügübei, éibutima laganwoundun nafiñen”.

15. Ida liña lederebudagüdüni waturiahan wábuguarügü wafiñen? (Ariha humóun giñe iyawaü).

¹⁵ Ariha wamá ámuya katei le gayaraabei lederebudagüdüni wafiñen: waturiahan wábugua. Ariñagatu Susan íderagua lanu saragu tadireirun aban oura lun taturiahan tábuguarügü. Abahüdaguatu: “Dimaasu naturiahoun Garüdia Awisahatu to lunboun taturiahóun leweñegua dimaasu, leindi luma luagu-biama, aba naturiahani le lunbei larihíniwa lidan adamuridaguni le labadinaguabei dimaasu. Ani le líbiri weyu, ígira numuti lun naturiahan somu katei lidan naturiahan nábuguarügü”. Kei súnwandan lan tafalaruni oura le tadireirubei, éibutima dan, aba lederebugudun tafiñen Susan. Ánhounti Irene, to barüharuboun saragu irumu eseriwida tidan áfisi to arihiboun lau hawadigimari gefentiña luagu Heowá lidan sun Ubóu, ariñagatu derebugugüda lani tafiñen saragu taturiahani profesía le tídanbei Bíbülia. Ariñagayatu: “Wéirigüda lumutu nanigi narihini ida liña lan lagunfulirun buidu buidu profesía le lariñagubei Heowá”.c

“CHÓURUTI LAGUNFULIRUBA LAN”

16. Ida liña wasubudiruni le lan lariñagubei Heowá lun Abakúku hu lan woun uguñe weyu? (Ebüréu 10:36, 37).

¹⁶ Añahein hádangiñe lubúeingu Heowá barühaña saragu irumu agurabaha lun liabin lagumuchagüle Ubóu le. Lidan lisaminan aban gürigia, gayaraati genege lan darasaguaali lan lagumuchagüle Ubóu. Gunfuranda lumuti Heowá le hasandirubei lubúeingu. Ligía lariñagunbei lun profeta Abakúku lau ichouruni: “Machülügili dan lun lagunfulirun uénedü le; gama lumoun lagunfuliruba. Agurababéi, íbini genege lan ladarasarun, lachülürüba lidan dan” (Abak. 2:3). Lúnrügüñein san Abakúku lariñawagúa dimurei le, o ruti giñe dǘgüdaguaü woun uguñe weyu? Adügati Heowá lun layusuruni apostolu Pábulu dimurei burí le houn kristiánugu ha agurabahabalin iseri Ubóu (aliiha huméi Ebüréu 10:36, 37). Íbini genege lan woun ladarasahaña lan Heowá, haritagua waméi le füramase lubéi ani “lachülürüba lidan dan”.

17. Ida liña tafalaruni aban íbiri adundehani le líchugubei Heowá lun Abakúku?

¹⁷ Falá hamaali saragu kristiánugu ladundehan Heowá lun agagudúañu hamá, íbini lásügürün saragu irumu. Ariha waméi tikesin aban íbiri gíritu Louise, to agumeseruboun eseriwida lun Heowá lidan irumu 1939. Abahüdaguatu: “Masaminarungubeitina meha nagunfuliruba lan 18 irumu lidan Ubóu le ladüga saminatina yebe chülühali lanme Arümahedón. Masuseredunti katei le. Le íderagubalina lun nawandun lidan sun irumu le, naliihan hawagu gürigia ha únbaña nagúaha weiri tuguraasun kei burí Noé, Abüraámü, Hosé hama amu lubúeingu Heowá ha agurabahabaña lun heresibiruni afayeiruahaü le füramase lubéi Heowá houn. Íderagua láadina agagudúañu nan dandu nuguya kei amu lun gabaroun nani yarafaali lan iseri Ubóu”. Chóuruti ligiaméme lan hasaminarubei saragu íbirigu ha seriwihañabaña lun Heowá luagu saragu irumu.

18. Ida luba líderaguniwa sun katei le adüga láalibei Heowá lun wafiñerun lanügübei lan iseri Ubóu?

¹⁸ Inarüni machülügili lan iseri Ubóu, gama lumoun, teni wamá lun fiu katei le ubouagubei luma le geyegubei wau kei burí: waruguma, tídibu burí wewe, animaalugu, hama gürigia. Íbini ua lan meha katei le furumiñe, úati ni aban lun hariñagun mama lan inarüniti katei le. Anihein lubéi sun katei burí le, ladüga Heowá lan adügübalin (Agu. 1:1, 26, 27). Ligíati, füramasehaali Wabungiute ñeinbei lan aban iseri Ubóu, ani lagunfulirubei füramasei le. Danme le lachülürün iseri Ubóu le füramase lubéi Heowá, inarünibei ítara kei inarüni lan katei le geyegubei wau (Isa. 65:17; Aruf. 21:3, 4).

19. Ida luba wederebudagüdüni wafiñen?

¹⁹ Sun awanha lan agurabahei iseri Ubóu, adüga waméi sun wayaraati lun wederebudagüdüni wafiñen. Ráramagua wamá asaminara lau eteingiruni luagu lebegi esefuruni, samina wamá luagun lubafu Heowá ani teni wamá lun katei le lánina wáhuduragun lun Bungiu. Ánhawa adügei sun katei le, hádangiñebadiwa ha meha afiñebaña luagu Bungiu ani “awanda haméi sun asufuriruni luagu, aba heresibiruni le füramase lubéi Bungiu houn” (Ebü. 6:11, 12; Rom. 5:5).