Arihabéi binu kei larihini Bungiu

RÚHALI Heowá saragu idewesei woun, ani chóuruti sun lan wagía gunda wamá saragu ladüga lígirun lun wanúadirun ida luba lan wayusuruni. Binu aban lídangiñe idewesei le. Ariñagatu Bíbülia: “Fein luntu teigín, diwéin lun lefeduhóun ibagari” (Apur. 10:19; Sal. 104:15). Gama lumoun, másiñati arihaadiwa lan añahein lan gürigia gaturobulintiña luma átuni. Lanwoun lira, meberesenga fulasu le ñein lubéi bawinwanda luma échuni, ámuñegueinarügüti hasaminan gürigia luma halurudun luagu laatún binu. Ida liña san warihini wagía kristiánugu tema le?

Lidan lóurate wanúadirun, lubaragiñe wígiraguagüdün woungua lun échuni le lídanbei fulasu le ñein lubéi wawinwanda o le ñein lubéi wagüriarúa, lunti gabaroun wamani ida liña lan larihini Bungiu laatún binu. Ítara luba wagundaarun saragu.

Chóuruti arihaadiwa lan gürigia lidan ubóu guratiña saragu ani gabügürügua. Añahein átutiña lun nege buidu lan hasandiragun houngua. Añahein amu guratiña lun nege habuliedaagun luéi haturobulin. Anihein fulasu le ñein lubéi hata gürigia saragu lun hariawaguniwa o lun hariñagun gürigia hawagu derebugu hamá.

Ánheinti wagía kristiánugu, anuhein tubuidun ladundehan Bungiu le adügübaliwa wama. Wéridi lumutiwa Bungiu tidan Lererun luagu turobuli le lanügübei latun gürigia saragu. Ariñawagúati lidan Ariñawagúni 23:​29-35 luagu aban gürigia le bacharuati luma luagu fiu turobuli le ídanbei ládaragua lungua.a Abahüdahati aban wéiyaali lidan afiñeni gíriti Daniel Yuropana ida liña lan meha libagari lubaragiñebei ladügagun lungua gefentime luagu Heowá: “Adügati nátagun saragu, lun nadügün fiu katei le hanarimeti luriban, luma lun násügürün lídangiñe sügǘ le wuribati, le adügǘbei lun wuriba lan nasandiragun nungua”.

Kaba íderaguawa lun wanúadirun buidu luma lun wáfaagun lun mábürühan wamá lidoun turobuli lánina átuni? Le lunbei wadügüni warihini katei kei larihini Bungiu.

Ariha waméi ka lan tariñagubei Bíbülia luagu latun binu lúmati ka lan lébunabei hatun gürigia.   

LE TARUFUDAHABEI BÍBÜLIA

Mariñaguntu Lererun Bungiu wuriba lan latun gürigia murusun binu. Ariñagarügütün barǘ lan buiti latun gürigia, ligía lariñawagúnbei lidan Apurichihati 9:7: “Houboun beigan fein gurabóunme buniñe diwéin lau ugundani”. Ariñagatu Bíbülia, anihein lan burí dan gurá lan Hesusu diwéin, ani añahein lan meha giñe amu lubúeingu Heowá ha úaraguatiña guratiña lan giñe (Mat. 26:​27-29; Luk. 7:34; 1 Tim. 5:23).

Íbini ítara, mama ligiaméme latun gürigia murusun lumoun bacharuaü. Furanguti tariñaguni Bíbülia: “Mabacharuada humá” (Efe. 5:18). Ariñagatu giñe: “Ni bacharuatiña […] siñabei hebelurun lidoun larúeihan Bungiu” (1 Ko. 6:​9, 10). Kei le aubei warihei, iyereeguti lun Heowá latun gürigia saragu luma lun labacharuadun. Lubaragiñe wígiraguagüdün woungua lun le hasaminarubei gürigia ha geyegubaña wau, áfaaguatiwa lun warihini katei kei larihini Bungiu.

Añahein ariñagutiña: “Gayaraati natun saragu sin nabacharuadun”. Denchati ligaburi saminaü le. Afuranguagüda tumuti Bíbülia, gürigia lan ha gátadibaña —wügüriña lan yebe o würiña lan— gayaraabei héiguadun lidoun figóu wéiriti ani gadei hameme hamadagua luma Bungiu (Titu 2:3; Ari. 20:1). Ariñagati giñe Hesusu añanheibaña lan mebelurutiña lidoun iseri ubóu ladüga “bacharuaü” (Luk. 21:​34-36). Ligíati, ida luba ladüga aban kristiánu lun mábürüha lan lidoun burí turobuli le gayaraabei ladügün lun latun?

AKUTIHA HUMÉI KA LAN UÉIGIÑE HATA, ÁTIRIÑEIN LAN WÉIYAASU HATUN LUMA ANHEIN GABÜGÜRÜGUA LUBÉI

Kei le aubei warihei, denchati wígiraguagüdün woungua lun échuni lidan lóurate wanúadirun watun. Ligíati, luáguti éigini luma átuni, áfaaguatiwa wagía kristiánugu lun wadügüni katei kei le aubei lagundaara Heowá. Ru tumuti Bíbülia adundehani le woun: “Anhaün lubeiti eiga o ata o hadügün furumiñeguarügü katei, adüga huméi súngubei lun híchugun uéiriguni lun Bungiu” (1 Ko. 10:31). Ariha wamá fiu álügüdahani luma adundehani tídangiñeti Bíbülia le lunbei gabaroun wamani.

Guratina san ladüga busén nan lun hagundaarun gürigia nau? Ariñagati Áfuriduni 23:2: “Mafalarabaña hiibe-agei” gürigia. Lidan bérusu le, leweridiruñanu Heowá ísüraelina lun máyeiha hamaniña gürigia ha adügübaña katei wuribati. Húugili eweridihani le houn kristiánugu uguñe weyu. Ánhawa ígiraguagüda woungua lun le hasaminarubei amu luma le hadügübei, gayaraabei ladügün igaburi le lun mineben lan lilurudun Heowá woun luma lun wadisedun luéi (Rom. 12:2).

Guratina san lun hasaminarun amu derebugu nan? Anihein burí fulasu kamaniti hatun gürigia saragu ani gabügürügua ani maribanti larihín (1 Fe. 4:3). Ariha waméi san adundehani le ichugúbei woun lidan 1 Korintuna 16:13: “Agagudúañumeme humá, deregüdagu lidan hafiñen. Agaburida humá kei wügüriña ha awanserubaña lidan inarüni; here hugíame”. Furanguti warihini madügün lan latun gürigia lun derebugutima lan. Adügarügüti katei le: lun masaminarun lan gürigia buidu luma lun wuriba lan le lanúadirubei. Madügünti saragu átuni lun derebugu lan aban gürigia, adügarügüti lúntima débili lan. Ariñagati Isaíasi 28:7 ha lan átagutiña saragu atuituiha hamá ani aba hachugeragun.

Anhein busén wabéi lun derebugu wamá lun wadügüni le buídubei, lunti wárügüdün luagu Heowá luma lun wáfaagun lun agagudúañu wamá luma lun úaragua wamá lidan wafiñen (Sal. 18:32). Lun lira, lunti fegeñu lan wagu luma lun wamaharun lun furumiñeguarügü katei le wanúadirubei le gayaraabei lagadeiruni wamadagua luma Heowá. Gayaraati wafalaruni lani Hesusu hénpulu, dan meha le ya lubéi ubouagu ariha hamuti saragu gürigia kei aban wügüri derebuguti ani ganigiti le tímatimaati.

Guratina san lun masaminarun nan luagu niturobulin? Ariñagati aban abürühati sálumu, lun Heowá: “Labadinagua idiheri le agibedagubei nisaminanrugu, rútibu dǘgüdaguaü nun luma ugundani” (Sal. 94:19). Anhein anihein lubéi saragu katei le adiheridagüdübadün saragu, marabacha humá luagu binu, luagu lan Heowá harabacha. Aban igaburi buiti lun hadügüni lun hafurieidun gabügürügua. Ídehaali giñe saragu, hamuriahan adundehani luma somu íbiri lídangiñeti damuriguaü le derebuguti lafiñen. Le linarün katei, dan le latun gürigia lun lagagibudagun luma turobuli, méreti lun lagagibudagun luma óuchawaguni ni lun ladügüni le buídubei (Ose. 4:11). Ariñagati Daniel le buga uágubei wayanuha: “Nageidaguña meha luma saragu idiheri ani nageidaguña meha giñe luma níchaagun duru nuougua. Aba meha nátagun lun gayara lan nahandilihani le gádanbalina, ani le meha nibihibei gawounguarügüda lumuti niturobulin ani féridi numutiña meha numadagu ani aba neferidiruni inebesei núniwagua”. Lagumuhóun, ka meha íderagubalin? Ariñagati: “Aba níchugun fe lunti lan nárügüdün luagu Heowá, mama luagu binu. Lau lídehan chülüdüga buga dan lun nagagibudagun luma niturobulin luma lun niñuragun lídangiñe”. Mabulieida waméi, íbini genege lan woun máranina lan wawaguti, aniheinbei Heowá warugabu súnwandan lun líchugun aban úhabu woun (Fili. 4:​6, 7; 1 Fe. 5:7).

Anhein anihein lubéi burí dan guratün, buídubei lun hadügün fiu álügüdahani húniwagua. “Ariñagaali san somu niduhe o numada nun nidiheri lan ladüga gibe lan natun?”. Gayaraati aban lan seini lira, hanügüñein lan igaburi le kei échuni o héiguaduña lan lidoun átuni sin híchugun fe. “Gíbetimarügaali san natun sügǘ luéi aban dan?”. Gayaraati larufuduña lan lira, íbini mama lan aban échuni, másiñati lan wárügüdüñein lan üma le. “Hénrenguti san nun lun lásügürün fiu weyu o lóugiñe lun matun nan?”. Anhein ítara liña lubéi, gayaraati barǘ humaali lan katei le kei aban échuni o gatadihaadün lan. Anhein barǘ humaali lubéi átuni keisi aban échuni, háfuga megei humá lídehan somu surusia lun hígiruni átuni.

Lun maturobulin hamá, anuadirúaaña fiu kristiánugu lun matun hamá uniñein le gabacharuaditi. Añahein íbirigu mátuntiña ladüga madari hamani lisemén. Anhein subudi hubéi somu íbiri le anúadiraali lun matun lan, le buídubei lun inebe lan le lanúadirubei hun, ani mayanuhan humá wuriba luagu.

Añahein amu rútiña leben halíaba lan lébeda hatun. Háfuga hanúadirun átiribei lan leben hatun. Másiñati giñe hanúadirun matunbaña lan gabügürügua ani murusunrügüba lan hatun sagü weyu lárigiñe heigin o aban wéiyaasu luagu dimaasu. Añahein amu anúadiraaña kaba lan luwuyeri uniñein hata lúmati kaba lan luwuyeri matun hamá. Kei hénpulu, añahein guratiña murusun binu o serübesa, gama lumoun, mátuntiña uniñein le héreti ni giñe uniñein héreti le migisiwaali. Dan le furangu lan woun halíaba lan lébeda watun ménrengunti woun wafalaruni. Aban kristiánu le derebuguti lafiñen le anúadiraali lafalaruni adundehani le ani inebe ligía le lanúadirubei lun úati kaba lan uagu labusigarida.

Luagu le aban oubaü, lunti gabaroun wamani ka lan hasaminarubei amu. Ariñagatu gárada houn Rómana 14:21: “Buítimati hamuga lun meigin ban úi, matun diwéin, madügün ni kata le achugeraguagüdüti biduhe”. Lidan amu dimurei samina wamá hawagu amu ani arufuda wamá ínsiñeni houn. Ánhawa ariha wuribabei lan lun aban íbiri watun, chóuruti ladügüba lan ínsiñeni le wasandirubei luagu lun matun wamá oura ligía. Ani ítarati warufudubei inebe lan le hasaminarubei amu woun ani mama lan wáluahañein wagundan guánarügü wáluahañein lan hagundan amu (1 Ko. 10:24).

Wagía kristiánugu gaganbaditiwa lun furumiñeguarügü lúrudu le líchugubei Urúei libügürü laatún binu. Kei hénpulu, másiñati maha lan lúrudu lun hatun irahüñü binu ha magunfulirungiña ítaga irumudiri o maha lan lun hatun ha lúnbaña habugahan karü o ítaga burí máhina (Rom. 13:​1-5).

Ígira lumutiwa Heowá lun wanuadirún ida luba lan wagundaarun lau burí saragu idewesei le líchugubei woun. Ligíati, sun wagía gayaraati wanúadiruni le lunbei wéigini luma le lunbei wátuni. Chouru waméi wayusuruni idewesei le súnwandan luma le wanúadirubei lun warufuduni lun Wáguchi Bungiu le siélubei busén wamá wagundaaragüdüni.