Mínsiñetiña san amu hun ladügarügü amu hamá huéi?

Gayaraati hasandirun gürigia iyereehabúni hawagu gürigia ha lídangiñetiña amu ageiraü, rasa o türibu, ladüga amu lan hererun o hani relihión hawéi, ladüga liibe o lilouguan hámati o íbini ladüga wügüri lan aban gürigia o würi lan. Añahein asaminarutiña wuriba hawagu amu ladügarügü harumudiri, hafurendei, hadaniman o ligaburi haríawagun. Íbini ítara, gayaraati samina hamá gürigia ha asandirubalin lira ua lan iyereehabúni tidan hanigi.

Gayaraati funa san anihein lan igaburi le huagu? Ménrenguntimati warihini hawagu amu dan le mínsiñehabu hamá houn ha mítaranbaña kei hagía, ánheinti wawougua, másiñati hénrengutima lan woun warihini anihein lan giñe igaburi le wawagu. Le linarün katei, sun wagía, sanditiwa somu iyereehabúni hawagu amu. Ariñagati aban sásaamu gíriti David Williams dan le lan samina wamá wuriba hawagun ítaga gürigia ani aba wadunragun luma aban hádangiñe gürigia hagía “móuserun wabéi lan gürigia ligía kei wóuseruniña ha híbiri ani míchugungubeibadiwa fe”.

Lidan aban ageiraü yuropana le ñein lubéi lawinwanda aban wügüri gíriti Yobika, añahein ítaga gürigia ha mínsiñewatiña. Ariñagati: “Saminatina yebe ua hamá gürigia buítiña hadan gürigia hagía. Masaminaruntina meha giñe iyereehabúni lan lira. Ábaha nariñagun núniwagua: ‘Ninarünga le nasaminarubei hawagu’”.

Lau sun adügaaña lan gumadimatiña saragu lúrudu lun hageindagun luma iyereehabúni le asandirúbei hawagu lílana amu rasa luma amu burí luwuyeri iyereehabúni, siñá hamagili agidara. Ka uagu? Ladüga lúnrügüñein lan katei burí le hadügübei gürigia lahuuda lúrudu ligía, mahuudunti lun líderaguniña asansirei le hasaminarubei luma le hasandirubei. Ani le linarün katei, lídangiñe hasaminan gürigia luma tídangiñe hanigi láhücha iyereehabúni houn amu. Siñati funati wagidaruni iyereehabúni wawariua? Gáraniti funa san turobuli le?