Óusera humá lau ínsiñehabuni

Le turobulibei

Mama ítaraguarügü lagidara iyereehabúni hawéi gürigia. Ítara kei mégeiwa lan dan lun lareidagun aban sandi galugurahati, mégeiwati giñe dan lun wagidaruni iyereehabúni houn amu wawariua. Ka gayaraabei wadügüni lun wibihini?

Adundehani tídangiñeti Bíbülia

Fiu iyawaü lidan aban: 1. Aban wügüri ásiana ágüdahei bena lubá aban wügüri le hádangiñeti gürigia wuritiña le barüinabei aban ágeidinaü buin lau burí kopu le gaganati gafe sǘgiru. 2. Wuritiméme ligía afanreinha gafe houn lupaanágu lidan wadagimanu, aban würi to lídangiñetu ageiraü India haganagua.

“Hínsiñehabu humá; ligía [...] íchugubalin sun katei lidan aban” (KOLOSANA 3:14).

Ka mini lubéi le? Dan le wadügün katei buiti hawagu amu, aba ñein lan úarani wadan. Ánhaña hínsiñe amu hun ani arufuda humeime houn, agidareina luba iyereehabúni le hasandirubei tidan hanigi.

Le gayaraabei hadügüni

Fiu iyawaü lidan aban: 1. Aban würi to lídangiñetu ageiraü India íderagua aban wéiyaaru mutu to hádangiñetu gürigia harutiña lun tamudeiruni esütépu ani barüna tiñalin tanügün tau. 2. Wéiyaaru mutu harutu tuguya íchiga fein bímetu lun wügüri ásiana.

Samina humá ka burí lan katei gayaraabei hadügüni hawagu gürigia ha ámubaña huéi. Mama mosu hadügün katei hanarimeburiti, buídurügüti lau houchun hadügün katei kéiburi le:

Éibume wáfaagun lun warufudun ínsiñehabuni houn amu, agidareina luba iyereehabúni tídangiñe wanigi.

Arufuda humá lubuidun umenei, kéiburi hágüdahani bena habá lun hásügürün o híchuguni hala houn tidan ugunei.
Ayanuha humá hama íbini mayanuhan hamani hererun buidu.
Gaguraasun humá habá dan le harihiniña adüga katei le úati gunfuranda humani.
Ru humá arigei houn ani áfaagua humá lun gunfuranda humani haturóbulin.

Sügǘ inarüniti: Nazaré (Ginéa-Bisáu)

“Sanditina meha iyereehabúni hawagu terencha ha águyubaña awinwanda nageira. Aganbaadina meha yeeda hamaniña terencha gumadimatiña lun heresibirun ídemuei hámagiñe o aba lan hagumeserun adaagua katei mabuidunti. Ligía meha mínsiñe habéi nun. Íbini ítara, masaminaruntina yebe iyereehabúni lan nasandirubei hawagu, ladüga ligiaméme lan giñe hasandirubei besafu.

”Lau lásügürün dan, aba níchugun fe iyereehabúni lan katei le nasandirubei hawagu lílana amu ageiraü. Íderagua lumutina sun le nafurendeirubei tídangiñe Bíbülia lun nóuseruniña terencha buidu. Guenlé, meredeedina áluga nadireirun hawéi, busuhadina houn, áfaagua nuguya lun nayanuhan hama luma nóuseruniña buidu. Sánsihali ligaburi narihiniña ani buíduhali nasandiragun nungua hama”.