Ida liña lañawarihaniña teknolohía humadagu
Uguñe weyu, seremei ariñahani óunahouarügüti, koréu luéigiñe Internet, damuriguaü lauti bidéu, luma hadügǘn umadagu luéigiñe Internet, ménrengunhali hadimurehan gürigia hámagua, íbini lúeigiñeñanu lan le aban larigerugu ubóu. Lidan kesi le, aban tulu buiti teknolohía lun le buídubei.
Añahein gürigia teknolohía rügüñein hayusura lun hadimurehan hama hamadagu, ha adügübalin ítara gaturobulinbaña kei burí:
Masaminaruntiña saragu luagu le hasandirubei hamadagu.
Sandiguatiña houngua hábuguarügüñanu lan ani masuuni lan habagari.
Wéiritimaati hasaminarun hawouguoun, lubaragiñe hawagu amu.
LE LUNBEI HASUBUDIRUNI
HÍCHAAGUN HUNGUA LIDOUN HALUGAARUN AMU
Lun wíchaagun woungua lidoun halugaarun amu, mosu wararamagun murusun asaminara, ida liña lan hasandiragun amu gürigia houngua. Ani wásiñarubei adüga anhein bereseguñadiwa lubéi aliiha luma óunaha saragu ariñahani lau lufuresen luéigiñe páhina ñein lubéi hadügǘwa umadagu.
Anhein lagumadiruñadün lubéi teknolohía, ani gibe ligía ariñahani lun hóunabuni, hénrengubei hun hóunabuni ariñahani lúmagiñe humada le ásügürübei lídangiñe lénrengunga, mégeilei hídehan, gayarabei hagurabagǘdüni humada darí hóunabuni sun ariñahani le heresibirubei.
SAMINA HUMÁ LUAGU LE: Ida luba harufudun rugua humá hungua lidoun halugaarun amu dan hayusuruni teknolohía lun hayanuhan hama humadagu? (1 FÉDURU 3:8).
HÁBUGUARÜGÜ LAU IRUNI
Lidan aban aturiahani le hadügübei aturiahatiña siensia, dariwati luagu wuriba lan hasandiragun gürigia houngua lárigiñe hásügürün saragu dan lidan páhina le ñein lubéi hadügǘwa umadagu. Ariñagatiña sásaamu dan lan waríagun hayawa amu luma burí le habürühabei “adüga lan lun wasandiragun woungua mebegi lan le wadügübei”.
Lanwoun lira, dan warihini hagundan amu tidan iyawaü to hiñuruboun luma burí katei le hadügübei, gayarati wagumeserun agoubaguagüdei wabagari hama luma lun wagumeserun asaminara hásügürüña lan gürigia aban lubuidun dan anhein lan wagía, híruti lan wabagari.
SAMINA HUMÁ LUAGU LE: Ida luba magoubaguagüdün humá hungua hama amu dan hayusuruni páhina le ñein lubéi hadügǘwa umadagu? (GALASIANA 6:4).
LASAMINARUN GÜRIGIA LUÓGUARÜGÜ
Ariñagatu aban méistara añahein lan hádangiñe ha aturiahabaña tuma hawouguarügüñein lan hasaminara, ani umadagu rügüñanu lan ha luéigiñebaña hóubadina ani adüga hagía katei hawagu háluaha. Umadagu kei ha, luágurügüñanu le gayarabei hasagarun luéi hamada hasaminara.a Ligía, gayarati lagumeserun aban gürigia asaminara gayara lan lanügüniña lumadagu kei aban konputadora to gayarabei lébedunun o léñeguchunun furumiñeguarügü oura le labusenrun.
SAMINA HUMÁ LUAGU LE: Arufudati san le hiñurubei lidoun Internet hínsiñe lan hun hásügüragun ani huouguarügüñein lan hasaminara? (GALASIANA 5:26).
LE GAYARAABEI HADÜGÜNI
SAMINA HUMÁ IDA LIÑA LAN HAYUSURUNUNI TEKNOLOHÍA
Anhein huguya lubéi gamaniharibei lau teknolohía ani mígirun buguya lun lagumadirunibu, gayaraabei yarafa humá houn humadagu lun hederebudagüdüni humadagua hama.
ADUNDEHANI MÉINITI: “Le hínsiñehabubei [...], mámarügüñein luougua laritagua” (1 KORINTUNA 13:4, 5).
Anúadira huméi adundehani le habusenrubei hadügün o bürǘ huméi le hasaminarubei hadügün:
Gáwoungüda huméi hadimurehan hama gürigia, lubaragiñe ariñahanirügü lan, luma koréu hóunaha luéigiñe Internet.
Dísegüda huméi gágamuru o ñegú huméi dan le hadimurehaña lan hama amu.
Chátigüda huméi dan le hásügürübei lidan páhina le ñein lubéi hadügǘwa umadagu.
Furendei humá aganba amu gürigia.
Wa humá lun aban umadaü le ásügürübei lénrengunga.
a Según le tariñagubei líburu En defensa de la conversación.