Ida liña lañawarihani teknolohía hamarieidun

Lau sun lira, ánhaña móunigiragun houngua, gayarabei lanügün luriban layusurún teknolohía turobuli houn, kei burí:

• Líweruhani dan le gayarabei hásügürüni úara.

• Ladügün lun hanügün wadagimanu múnadoun le memegeirúnwati.

• Ladügün lun mafiñerun hamá hawougua íbini lun múaragun hamá hámagua.

LE LUNBÉI HASUBUDIRUNI

DAN LE HÁSÜGÜRÜBEI ÚARA

Ariñagati Michael aban wügüri maríeiti: “Anihein dan, dan le yarafa nan tun nani weiriou, aba tarufudun mebereseni nau, kamá hamuga úatina. Ladüga bereseguñoun lan etenira lun tigagamurun ábati tariñagun ‘Ay, ferudun, madaanitina buga lun naliihani ariñahani le óunahounbei nun darí guenlé’”. Ariñagati giñe Jonathan, aban maríeiti, anihein lan dan “gayarati lídanñanu lan ábanmeme rumu maríeitiña, lau sun lira, gayaraati hasandirun dise hamá hawariuagua”.

SAMINA HUMÁ LUAGU LE: Átiri hali san dan leberesehani aban agúaruni o aban ariñahani wásügürün aba lubuidun dan úara luma nani weiriei o tuma nani weiriou? (ÉFESUNA 5:33).

WADAGIMANU

Anihein wadagimanu le ñein lubéi mosu lan aranseñu hamá gürigia lun hóunabahani hagagamurun o ariñahani lídangiñe Internet 24 oura luagu weyu. Añahein amu íbini mama lan mosu hawadigimaridun saragu dan ítara, hénrenguti houn hararamuni hawadigimari dan hachülürün hábiñoun. Abahüdahati Lee woun, aban wügüri maríeiti: “Hénrenguti nun nawanduni óuchawaguni lun machekürün nani agúaruni luma ariñahani luagu wadagimanu le neresibirubei luéigiñe Internet lidan dan le nadireirubei lun násügürüni tuma nani weiriou”. Ani ariñagatu giñe Joy aban würi maríeitu: “Múnadagiñe nawadigimarida ani hénrenguti nun nasubudiruni ida luba lan nararamuni. Mosu náfaagun lun nasubudiruni ídaba lan nararamei wadagimanu”.

SAMINA HUMÁ LUAGU LE: Dan le ladimurehaña lan hani weiriei o weiriou hun, ru tun san arigei aganbei le hariñagubei hun? (LÚKASI 8:18).

ÚARAGUNI

Según aban aturiahani lánina álügüdawaguni, añahein saragu maríeitiña asigenehatiña hámagua, ladüga mafiñen hamá luagu le liñunrubei aban hádangiñe lidoun páhina le ñein lubéi hadügǘwa umadaguaü. Ani 10 hádangiñe kada san ha álügüdawagubaña ánhatiña luagu iñuraña lan katei lidoun páhina le ñein lubéi hadügǘwa umadaguaü aramudaguarügü luéi hani weiriei o tuéi hani weiriou.

Afiñetiña saragu gürigia luagu gibe lan “denchaü le aramudaguati houn maríeitiña” lidan páhina le ñein lubéi hadügǘwa umadaguaü ani adüga lan lun ménrengun lan lun héiguadun lidoun agabarahani. Ligíati maweiridun tubéi wanigi dan hariñagun awogóu ha sásaamu lidan hafanreinragun maríeitiña adüga lan páhina le ñein lubéi hadügǘwa umadaguaü lun ñein lan saragu afanreinraguni hadan maríeitiña.

SAMINA HUMÁ LUAGU LE: Aramuda humuti san tuéi hani weiriou o luéi hani weiriei le burí uágubei hayanuha tuma aban würi anhein wügüri bubéi, o luma aban wügüri anhein würi bubéi? (ARIÑAWAGÚNI 4:23).

LE GAYARAABEI HADÜGÜNI

ANÚADIRA HUMÉI LE SÚDINITIMABEI

Anhein meigin aban gürigia buidu, chóuruti lasandiruba lan. Ítarameme, anhein móunigirun hamá maríeitiña dan le hásügürübei úara, gaturobulinbaña lidan hamarieidun (Éfesuna 5:28, 29).

Anúadira huméi adundehani le habuserunbei hadügün o bürǘ huméi le hasaminarubei hadügün lun mañawarihan lani teknolohía hamarieidun.

• Heigin úara íbini ábanrügü wéiyaasu luagu weyu.

• Áluaha humá dan lun héñeguchuni humegen le lánina teknolohía.

• Adüga humá aransehani lun háfuridun o hadügün somu katei espechaliti úara.

• Héñeguchuni humegen le lánina teknolohía dan harumuga lan ani kipu huméi díseñu huáriua.

• Direi humá 15 minutu sagü weyu lun hadimurehan sin leberesehanün humegen le lánina teknolohía.

• Direi humá aban dan lun héñeguchuni Internet sagü weyu.