1 Hasandirun gani hamá buligasion hámagua

KA MINI LUBÉI?

Maríeitiña ha asandirubaña gani hamá buligasion hámagua, gabaroun hamuti lunti lan herederun hámagua lun sun habagari, ani adügati lira lun chouru lan hasandiragun houngua luagu hasigiruba lan úara meberesenga le asusereduti.

Añahein maríeitiña, rédeitiña hámagua ladüga dǘgüda hamá haduheñu hama hamadagu hawagu. Gama lumoun, buítimati lun herederun hámagua ladüga hínsiñegua hamá hámagua, inebegua hagía houngua.

ADUNDEHANI TÍDANGIÑETI BÍBÜLIA: “Moun lumuti […] lígirunu wügüri lúmari” (1 Korintuna 7:11).

“Ídehati hasandirun maríeitiña gani hamá buligasion hámagua lun magañidun hamá lau lóufudagun, lun ménrenguntima lan feruduna hamá, lun hamuriahan ferudun luma lun marihin hamani turobuli kei aban lébuna ígiraguni” (Micah).

KA UAGU LUNTI LUBÉI HADÜGÜNI?

Ánhaña masandirun maríeitiña gani hamá buligasion hámagua, másiñati danme lan liábingua turobuli, aba lanme hasaminarun madügǘn hamá lun hámagua hamá, ábameti háluahan resun lun hígiragun.

“Gíbetiña gürigia amarieidutiña asaminareina anhein lan wuriba léibugun katei, gayaraabei lan hígiragun. Ánhabu amarieida asaminareina luagu bígiraguba lan, marihinrügü biñalin maríei kei aban katei gebegiti” (Jean).

KA GAYARAABEI HADÜGÜNI?

ARÍAGUA HUMÁ HUNGUA

Dan le hasigenehan húmagua,...

• ... asakürihatün san luagu hamarieidun?

• ... diraaguatün san hungua maríeiñu tuma amu?a

• ... ariñagatün san dimurei kéiburi “nígiraadibu” o “náluaha amu to untu gebegi nan”?

Anhein óunaba hubéi anha lun aban o lóugiñe aban lídangiñe álügüdahani burí le, lidaanihali háfaagun lúntima gabaroun humani gani humá buligasion húmagua.

LUN HAYANUHAN HÚMAGUA

• Maweirinhali san wasandirun gani wamá buligasion wámagua? Anhein ítara liña lubéi, ka uagu?

• Ka gayaraabei wadügüni lúntima wasandirun gani wamá buligasion wámagua?

LE GAYARAABEI HADÜGÜNI

• Bürǘ humá aban tiraüraü gárada tun hani weiriou kada átiri dan ariñageina tun weiri lan tínsiñe hun.

• Kipu humá tiyawa lidan fulasu le ñein lubéi huádigimarida.

• Wa humá tun sagü weyu dan le lídanñadün lan huádigimari o lídanñadün lan ámuñegueinarügü fulasu.

ADUNDEHANI TÍDANGIÑETI BÍBÜLIA: “Ligía moun lubéi lafanreinraguni wügüri le ladunraguagüdübei Bungiu” (Matéu 19:6).