3 Inebesei

KA MINI LUBÉI?

Maríeitiña ha arufudubaña inebesei hámagua, bereseti aban luagu le aban, íbini múaran lan hasaminan luagu aban katei. Ariñagatu líburu Diez claves para transformar tu matrimonio: “Madügüdaruntiña maríeitiña ha ítarabaña lun ladügǘniwa katei kei habusenruni. Lubaragiñe lira, sigitiña ayanuha luagu haturobulin. Aganbaguatiña hámagua lau inebesei darí hachülürün lidoun aban puntu le ídanti úara hamá biángubei”.

ADUNDEHANI TÍDANGIÑETI BÍBÜLIA: “Le hínsiñehabubei [...], mámarügüñein luougua laritagua” (1 Korintuna 13:4, 5).

“Inebe tan nani weiriou nun, mini lan gebegi tan nun, madügünbadina lan ni kata lun tasandiragun tungua wuriba ni lun lagadeirun wabagari kei maríeitiña” (Micah).

KA UAGU LUNTI LUBÉI HADÜGÜNI?

Dan le minebengua hamá maríeitiña hámagua, achüühatiña dimurei le gáriti hóuniwagua. Ariñagatiña ha subudihabúbaña katei burí lan libe le arufudubei lachülürüba lan dan lun hígiragun maríeitiña.

“Dan le wuriba lan bayanuhan tun bani weiriou, adüga buguya bula tau, aba tasandirun mebegi tan, aba giñe mafiñerunhaaru lan buagu” (Brian).

KA GAYARAABEI HADÜGÜNI?

ARÍAGUA HUMÁ HUNGUA

Samina humá luagun le hariñagubei tun hani weiriou luma ida liña lan hóuserunu dimaasu le. Ábameti hóunabuni álügüdahani burí le:

• Átiriñein san wéiyaasu hayanuhan luagu le tadügübei wuriba ani átiriñein wéiyaasu hariñagun somu katei tun lun tasandiragun tungua buidu?

• Ida liña harufudun inebesei tun?

LUN HAYANUHAN HÚMAGUA

• Ka burí lídangiñe katei le wadügübei o wariñagubei adügübei lun wasandirun inebegua wamá wámagua?

• Ka burí lídangiñe katei le wadügübei o wariñagubei adügübei lun wasandirun minebengua wamá wámagua?

LE GAYARAABEI HADÜGÜNI

• Bürüla kada aban hídangiñe ǘrüwa igaburi le ídanbei labusenra lun lóuseruni le aban lau inebesei. Ábameti híchuguni le habürüdübei lun le aban ani áfaagua humá lun híchugun ugundani húmagua.

• Adüga humá aban lísüta lau lubuidun burí igaburi le harihibei luagu le aban ani ariñaga huméi lun gebegi lan hun.

“Inebe lan nani weiriei nun, mini lan narufuduni lau le nadügübei weiri lan lebegi nun ani busén nan lun gunda lan. Mama súnwandan larufudún inebesei lau katei wéinamuti, gayaraati giñe larufudún lau lirahüñü katei” (Megan).

Le linarün katei, mámatima hasaminarun inebehabu humá lunbei gebegi lan hun, lubaragiñe lira, lunti tasandiragun hani weiriou tungua inebewa tan.

ADUNDEHANI TÍDANGIÑETI BÍBÜLIA: “Abagarida humá keisi lánigu, lau gudemehabu, areiduni, ǘnabuguni, gaganbadi, luma gaguraasuni” (Kolosana 3:12).