BUIN LIÑA UBÓU LAU TUROBULI

1 | Góunigigua humá hungua luéi hasandirun

KA UAGU LUNTI LUBÉI HADÜGÜNI?

Dan le wásügürüña lan lídangiñe ámuñegueinarügü turobuli, gayaraati ladügün lira lun wasandirun.

Dan burí le lasuseredun katei wuribati, aba hasandirun gürigia gibe lan katei lun hachügü, ánhañati álüda ítara, ménrenguntimabei ladagarun sandi hawagu.
Anihein dan gíbeya hamá sánditiña háspitalirugu darí lun siñá lan lagaranihóun houn súngubei ani lóuguati árani.
Anihein giñe dan lougua lan haseinsun gürigia lun hagañeihani létima hemegeirubei lun hawinwandun, kéiburi éigini luma árani.

Subuditi san hun?

Gayaraati ladügün sandi le wéiriti luma liibe katei lun wachügü lun wanúadirun wuriba lidan burí katei le lánina wáluahan árani. Adügatiti lira lúntima laweiridun wasandi.
Anhein magaranihóun lun hisandi, laweiridatimaba ani gayaraati heferidiruni hibagari.
Anhein masandi hubéi, gayaraabei hanúadirun buidu lidan lidaani lénrengunga.
Meberesenga átiriñein lan hiseinsun, anihein katei le gayaraabei hadügüni lun hóunigiragun hungua luéi hasandirun.

Ka gayaraabei hadügüni?

Dan le gachansin lan gürigia le chubei aau lun lasaminarun luagun le gayaraabei lasuseredun, samina lumuti giñe kaba lan ladüga lun méiguadun lan lidoun peliguru. Ligíati, anhein mabusenrun hubéi hasandirun, lunti haruma humá. Buítimati hóunigiragun hungua luéi hasandirun sügǘ lau lagaranihóun hun.

“Ánhawa akipuragua woungua harumañu, haruma tuguyame waban, míbebei seinsu wagastarun hama surusiagu ni lidan árani” (Andreas).a

a Sánsiwati fiu iri.

LE GAYARAABEI HADÜGÜNI: Adundehani burí le huuti

Lun hóunigiragun hungua luéi hasandirun lidan lidaani lénrengunga, falá huméi adundehani burí le

HARUMA HUMÁ

Haruma humá

Ariñagatu Lererun Bungiu: “Ha buídubaña ichügü harihini denchaü hegeyedun luéi” (Ariñawagúni 22:3). Samina humá ka lan gayaraabei hadügüni lun masandirun humá.

Hechu humá achibei húhabu lau duna luma sabun, lubaragiñetima haguurun luagu éigini luma lárigiñe hayusurunu kumú.
Gabügürügualá harumadahanu huban, káteitima le haguruhabei estodi.
Anhein gayara, maweirinlá hayarafahóun houn gürigia ha gayaraabei halugurunün lau hasandi.

HOU HUMÁ ÉIGINI LE BUITI

Hou humá éigini le buiti

Ariñagatu Lererun Bungiu: “Úati gürigia meberesenti lau lúgubu guánarügü; hóugüdarügü lumuti, góunigilei” (Éfesuna 5:29). Warufuduba hínsiñe lan wágubu woun ánhawa óunigirei le wéigibei.

Gurá humá saragu duna.
Hou humá ámuñegueinarügü tuwuyeri fagudiya tuma furuda.
Mibelá agülei, salu luma burí bímeti heigin.
Magumulaha humá, mayusura humá düroga ani mátagun huguyame.

“Héchutiwa óunigirei le wéigibei luéi wasandirun. Lun hamuga madügün wamani, wagastaruñein hamuga murusun le wámabei hama surusiagu. Himei wamuti wagastaruni agañeiha éigini le buiti” (Carlos).

ADÜGA HUMÁ EHERSÍSIU ANI EMERAAGUA HUMÁ BUIDU

Adüga humá ehersísiu

Ariñagatu Lererun Bungiu: “Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (Apurichihati 4:6). Lau sun megei wamá wawadigimaridun, mégeitiwa giñe wemeraagun.

Adüga humá ehersísiu. Gayaraati hagumeserun lau háfuridun éibuga. Líderagubadün hadügün ehersísiu lun masandirun humá íbini derebuguhadün lan, danima humá o anihein lan sandi le máraninati huagu.
Emeraagua humá buidu

Emeraagua humá buidu. Míbebei katei lun hichügü anhaün emeraagua buidu ani heteniruba lun le hadügübei. Anhaün memeraagun buidu, gayaraabei ladügün le lun hasandirun.
Gouratelá harumugun ani houcha humá hagunfulirun lau. Houcha humá lun harumugun luma hásaarun ligiaméme oura sagü weyu.
Maríagua humá bigibigitu, mayusurun huguyame gágamuru o konputadora dan le tídanñadün lan gabana.
Meiga humá éigini dǘgüdati, matun huguyame gafe, binu o katei líbeina lira lubaragiñe hidin arumuga.

“Lun masandirun nan, mosu narumugun buidu. Dan le lougua lan narumugun, aba lagaridun nichügü, gáriga ligía nura. Dan le buidu lan narumugun, buiti nasandiragun nungua ani gayaraati nadügüni le lunbei nadügüni. Héreti nasandiragun nungua ani díseguati ladagarun sandi nuagu” (Justin).