Aban lubuidun fuluri-agei

ARIHABEI Ubóu! Ma lubuidun larihín sun katei! Arihabei sagadi luma burí tídibu wewe, fuluri hama sun animaalugu. Ariha bumuti halíañein lan lefan hama liñún?

Halíagiñe láfurida lubuidun fuluri-agei le? Warihali ida liña lan laranseruni Bungiu Ubóu wabá.

Furumiñe, adügati Bungiu sagadi lun ladouragun lau múa. Adügati giñe sun luwuyeri inadüri, híduru luma burí tídibu wewe. Sun katei burí le adügati lun buídutima lan Ubóu. Lanwoun lira, gíbeti lídangiñe ruti éigini semeeburiti woun.

Lárigiñe adügati Bungiu úduraü lun háfulihan lidan duna hama dunuru lun háhamahan sielu. Adügati ounli, mesu hama gabayu; animaalugu wéinamutiñu hama ñǘbüritiñu. Añahein san animaalugu yarafa tun buban? Ma lubuidun Bungiu lau ladügüni sun le wabá!

Lagumuhóun, adügati Bungiu lun ñein lan aban fulasu espechaliti Ubouagu. Fuluri-agei Edén lagúahan lun. Úati meha mégeiti lidan. Buiti meha sun katei le ñeinbei. Busenti yebe Bungiu lun ítara lan sun Ubóu kei lubuidun fuluri-agei le ladügübei.

Arihayabei dibuhu. Subuditi san bun ka lan larihibei Bungiu mégeigili lan lidan fuluri-agei le? Ariha waméi.