Iseri Paraísu ubouagu

ARIHABÓUN wewe to iñuburitu, lubuidun burí fuluri luma burí wübü íñuti. Ma buíduburiti katei le? Arihabei, usari le eigibei lídangiñe lúhabu irahü. Ani arihabaña liñún hama gabayu rara haña luagu sagadi. Hínsiñeti hamuga bun lun babagaridun tidan aban muna o fulasu kei le?

Busenti Bungiu lun bawinwandun lun súnwandan Ubouagu lidan aban paraísu, sin basufuriruni igarigu le hasandirubei gürigia uguñe weyu. Ligía füramase tubéi Bíbülia houn ha lunbaña habagaridun lidan iseri paraísu. ‘Búngiumemeba hama. Úaalime óunweni ni ayahuni ni igarigu. Sügüha binadu burí katei.’

Lanügübei Hesusu kárugu lun liabin lubuidun asansiruni le. Subuditi san bun ídaba lan? Anha, lárigiñeme larumadagüdüni Ubóu luéi sun wuribani hama sun gürigia wuribatiña. Haritaguabá, dan le meha anihein lan Hesusu Ubouagu areidaguagüdati sun luwuyeri sandi hawéi gürigia, ani águyuguagüdati fiú gürigia. Ítara liñati larufuduni le lunbei ladügüni lidan sun Ubóu keisi Urúei lani larúeihan Bungiu.

Saminaba buidubei lan lun ñein ban lidan iseri paraísu! Hesusu, hama fiú ha lanúadirubaña, harúeihaba sielu. Hateniruba houn sunme ha yaabaña Ubouagu ani hadügüba lun gunda hamá súngubei. Ariha waméi ka lan lunbei wadügüni lun líchugun Bungiu ibagari le magumuchaditi woun lidan iseri paraísu.