Lidin Hakobu Arán

SUBUDITI san bun kátaña lan wügüriña ha umabaña layanuha Hakobu? Lárigiñe ladügün aban wéiyaasu luagu bandi weyu, aba ladariruniñu Hakobu yarafa lun aban welu. Hóunigiruñanu halügüniñu mudún. Aba lálügüdahan Hakobu: ‘Halíana san huguya?’

Aba hóunabun, ‘lídangiñetiwa fulasu le gíribei Arán.’

‘Subuditi Lawán hun?’ liña lálügüdahan Hakobu.

‘Anha,’ liña hóunabun. ‘Arihabá, anutén Rakeli to liráü hau lilügüniña mudún.’ Gayarati barihinu Rakeli ayarafadeina.

Dan le larihinbanu Hakobu Rakeli hau mudún ha lilügüniñu Lawán le liyaurite, aba lagidaruni dübü luéigiñe welu lun gayara lan hatun mudún duna. Aba líchugun Hakobu piku tun Rakeli ábati lariñaguni tun liráühaña lan Lawán. Aba tagundaarun saragu, aba tidin hábiñoun aba tabahüdaguni le asuseredubei lun Lawán le túguchi.

Gúndaati Lawán luagu lerederun Hakobu luma lúbiñe. Dan le lariñagunbei Hakobu lun luagu busen lan lamarieidun tuma Rakeli, aba lagundaarun Lawán. Ani aba lamuriahan luma Hakobu lun luadigimaridun lun sedü irumu tuagu Rakeli. Adüga lumuti Hakobu le, ladüga wéiri lan tínsiñe Rakeli lun. Dan le lachülürünbei lidaani maríei, subuditi bun ka lan asuseredubei?

Lubaragiñe hamuga líchugunu Lawán Rakeli lun Hakobu aba líchugunu Lía, liráü to íbugañaü. Dan le lanharunbei Hakobu luadigimaridun lun Lawán ábaya sedü irumu, ligíali líchugunu Rakeli lun, lun lánime weiriou. Dan meha ligía ígirati Bungiu lun hagamadun wügüriña tóugiñe aban oubafurugu. Ánheinti guentó, kei tarufuduni Bíbülia, mosu ábanrügü tan.