Ka asuseredubei woun dan le wóunwegun?

Óunweni lagarabagunbei ibagari. Ítara liña óunweni kamá aban idabagu huliliti (Huan 11:11-14). Ha hilaañabaña siñá haganbun, harihin, hayanuhan ni lun hasaminarun ni kata (Apurichihati [Eclesiastés] 9:5, 10). Relihión le mamabei inarüni arufudahati ñüdün hamá hilaaña lidoun ubóu le hani sífirigu lun hawinwandun hama binadu hagübürigu. Ani marufudahan tumuti Bíbülia katei le.

Gürigia ha hilaañabaña siñati hideraguniwa ni hadügün wuribati woun. Komunti hadügün gürigia damusianu houn hilaaña keiburi ámuñedahani, adügürahani, chugú luma sákürifisiu lau hafiñe luagu hínsiñe lan katei le houn hilaaña. Gama lumoun, échuni le mínsiñeti lun Bungiu ladüga aban lan lídangiñe liyeeni Satanási. Siñati giñe lagundaragüdüniñu gürigia ha hilaañabaña, ladüga mabagarihaña. Moun lumuti wanufudedun hawéi hilaaña ni wahuduragun houn. Lunrügüñein Bungiu lun wahuduragun (Matéu 4:10).

Habagaridayaba ha hilaañabaña. Ámuñegü, lásaaragüdübaña Heowá hilaaña lun hawinwandun lidan aban paraísu Ubouagu (Huan 5:28, 29; Adügaü [Hechos] 24:15). Gayarati lásaaragüdüniñu Bungiu gürigia ha hilaañabaña keisi gayara lan wásaaragüdün somu gürigia dan larumuguña lan (Márükosu 5:22, 23, 41, 42).

Saminaü luagu móunwen wamá iyeeni, ani Satanási le mafia adügübei lun hafiñerun saragu gürigia ítara liña lan. Satanási hama lumáfianu adügatiñu lun hasaminarun gürigia nibagarigili lan hani hilaaña sífiri ani hagía lan lébunabaña sandi luma líbiri turóbuli. Satanási eyeeda lumutiña gürigia, anihein dan lau uénedü o arufudúni. Ligía, lasíadirunbaniñu Heowá ha alugubaña hayanuhan hama hilaaña (2 Lúrudu [Deuteronomio] 18:10-12).