Ka asuseredubei woun dan le wounwen?

Féridihadün san somu humada o hiduhe lidan óunweni? Lidan dan hénrenguti ligía, háfuga álügüdagua humá hungua: “Ka asuseredubei woun dan le wounwen? Narihayabaña funa san niduheñu hama numadagu ha hilaguaañabaña?”. Lidan arufudahani le luma lidan le aban, warihibei óunabagülei gíchigaditi gurasu le tíchugubei Bíbülia.

1. Ka asuseredubei woun dan le wounwen?

Góubaguagüda lumuti Hesusu óunweni luma aban idabagu huliliti. Ka idan genegegua lan óunweni luma arumuguni? Dan le larumuguña lan aban gürigia, míchugunti fe luagu le asuseredubei geyegu lau. Dan le lounwen aban gürigia, masandihali ni gáriti ni amu katei. Ariñagatu Bíbülia ibidiñe lan “ni kata houn” ha hilaañabaña (aliiha huméi Apurichihati 9:5).

2. Ka buiti wasagarubei lídangiñe wasubudiruni inarüni luagu óunweni?

Gíbetiña gürigia hanufudetiña luéi óunweni luma hawéi hilaaña. Anhein susere lubéi ligiaméme hun, gayaraati líchugun le tarufudahabei Bíbülia luagu óunweni awalidaguni hun. Ariñagati Hesusu sefu lániwa wasubudiruni inarüni (Huan 8:32). Marufudahantu Bíbülia anuhein lan aban uani móunwedaditu hawagu gürigia to asigirutu awinwanda lárigiñe hounwen kei larufudahóun tidan saragu ligilisi. Ligíati, masufuriruntiña gürigia lárigiñe hounwen. Kei ibidiñe lan ni kata houn hilaaña, siñati hadügün wuribani woun. Ligía mama lubéi mosu warisarun hárigi ni wadügün amu katei lun wámalihaniña o wíchugun uéiriguni houn.

Lau sun añahein lan gürigia ha ariñagutiña gayara lan hayanuhan hama hilaaña, le linarün aban katei, siñati lasuseredun lira. Lugundun kei buga warihini “ibidiñeti ni kata houn” hilaaña. Ha afiñerubaña hayanuhaña lan luma somu haduhe le hilaali, másiñati hayanuhaña lan hama máfianu, ha gayaraabei hafamurun kamá hagía hilaali ligía. Adügati wasubudiruni inarüni luagu óunweni lun wóunigiragun woungua hawéi máfianu. Wéridi lumutiwa Heowá luéi wouchun wayanuhan hama hilaaña ladüga subudi lan lun gayara lan hadügün máfianu wuribani woun ánhawa ádaragua woungua hamoun (aliiha huméi 2 Lúrudu 18:10-12).

3. Furendei huméi inarüni luagu le gádanbaliña hilaaña

Anihein ámuñegueinarügü afiñeni ubouagu luagu le asuseredubei woun dan le wóunwegun. Ani mama sun afiñeni le lun inarünibei lan.

• Ka afiñeni hawaguti hilaaña kamanibei lidan fulasu le ñein lubéi hawinwanda?

BIDÉU: Ka asuseredubei houn hilaaña? (murusun lídangiñe) (1:19)

Aliiha huméi Apurichihati 3:20, ábameti hayanuhan luagu álügüdahani burí le:

• Según bérusu le, ka asuseredubei houn gürigia dan le hóunwegun?

• Dan le lounwen aban gürigia, sigitu san luani o lani sífiri abagarida lidan somu fulasu?

Ayanuhatu Bíbülia woun luagu lounwen Lásaru, aban lumada Hesusu. Sunme haliihañein lan Huan 11:11-14, ariha huméi le lariñagubei Hesusu luagu le gádanbalin Lásaru. Ábameti hayanuhan luagu álügüdahani burí le:

• Ka uma lagoubadaguagüdei Hesusu óunweni?

• Ka larufudubei katei le woun hawagu hilaaña?

• Saminatün san gayara lan lafiñerúniwa luagu le tariñagubei Bíbülia luagu óunweni?

4. Sagatiwa buiti lídangiñe wasubudiruni inarüni luagu óunweni

Dan le wafurendeiruni inarüni luagu óunweni, aba manufudehadiwa lan hawéi hilaaña. Aliiha huméi Apurichihati 9:10, ábameti hayanuhan luagu álügüdahani le:

• Gayaraati san hadügün hilaaña wuribani woun?

Sefu lumutiwa giñe inarüni le tarufudahabei Bíbülia luéi afiñeni lánina lunti lan wámalihaniña hilaaña o wíchugun uéiriguni houn. Aliiha huméi Fádirigu 20:6 luma Arufudúni 4:11, ábameti hayanuhan luagu álügüdahani le:

• Ida liña funa san lasandiragun Heowá lungua dan le láluahani aban gürigia hídehan hilaaña o láhuduragun houn?

5. Ruti wasubudiruni inarüni luagu óunweni gurasu woun

Arufudahóuati houn saragu gürigia danme lan le hounwen hasufuriruba lan lun hafayeihan luagu katei burí wuribati le meha hadügübei dan le wínwangiña. Ruti awalidaguni woun wasubudiruni úabei lan ni aban asufuriruti lárigiñe lounwen, ni íbini gürigia ha meha adügübaña katei le wéiriti luriban. Aliiha huméi Rómana 6:7, ábameti hayanuhan luagu álügüdahani le:

• Ariñagatu Bíbülia dan le lan lounwen aban gürigia madurunhali lan gürigia ligía ligibugiñe Bungiu luagu lifigoun. Afiñetün san hasufuriruña lan hilaaña lun hafayeihan luagu figóu le meha hadügübei?

Éibutima wasubudiruni Heowá, furangutimati woun maweiyasunbei lan asufuriragüdaña hilaaña. Aliiha huméi 2 Lúrudu 32:4 luma 1 Huan 4:8, ábameti hayanuhan luagu álügüdahani burí le:

• Ladügüña hamuga san aban Bungiu kei le uágubei layanuhóua lidan burí bérusu le lun hasufurirun hilaaña?

• Afiñetün san ru lan wasubudiruni inarüni luagu óunweni gurasu woun? Ka uagu?

LE HAFURENDEIRUBEI

Gumuti libagari aban gürigia dan le lounwen. Masufuriruntiña hilaaña, madügün hagía wuribani ni ka un.

Águyuguagüdüni

• Ka asuseredubei woun dan le wounwen?

• Ka uagu ibiha wabéi saragu buiti lídangiñe wasubudiruni inarüni luagu óunweni?

• Ka uagu ru lubéi gurasu woun wasubudiruni inarüni luáguti óunweni?

FURENDEI HUMÁ LANWOUN

Ariha huméi kátima lan mini lubéi dimurei uani tidan Bíbülia.

“Ka san uániboun?” (Ariñahani lídangiñeti jw.org)

Ariha huméi anhein súfurigüda lubaliña Bungiu wuribatiña lidan infiernu o máfiougati.

Aban san fulasu lánina asufuriruni máfiougati? (3:07)

Lunti san hanufude wamá hawéi hilaaña?

Sífirigu hani hilaaña... Gayarati san híderagunün?, odi hadügün dañu hun? Inarüni san añahein hamá? (garüdia)

Furendei humá luagu aban wügüri le asandirubei awalidaguni lárigiñebei lasubudiruni inarüni luagu óunweni.

“Aba taweiridun nanigi lau óunabagülei le tíchugubei Bíbülia” (Garüdia Awisahatu, to lánina 1 lidan bián-hati, irumu 2015)