Ladügün Bungiu aban daradu luma Abüraámü

SÜGÜHALI kéiburi 350 irumu lúmagiñe Guran. Uru meha lawinwanda Abüraámü, aban uburugu awanseti, ñein lubéi Irakü guentó. Aban meha wügüri afiñeti Abüraámü, gama lumoun, lóuchawaguba meha lafiñen. Ariha waméi ka lan asuseredubei.

Aba lamuriahan Heowá luma lun lígiruni lageira lun lidin lidoun amu ageiraü: Kanán. Masaminarunti Abüraámü bián wéiyaasu, lubá ladügüni lidise wéiyaasu ligía úara tuma Sara to lani weiriou, Lotu le liraühaña hama sun tílana luban. Dan le lachülürünbei Kanán, aba lawinwandun dagadagañahadügü tidan kianpu. Lidan aban daradu, füramaseti Heowá lun labinirubaña lan sun familia ha ubouagubaña lídangiñe, gíbebaña lan néchanigu áfuridutiña hádangiñe ladügawagun ani hánibei lan sun Kanán.

Aba hagibedun lilügüniña Abüraámü luma Lotu bágasu hama mudún. Areidati meha Abüraámü, ígirati lun lanúadiruni Lotu fulasu le hínsiñetimabei lun. Ábati lanúadiruni Lotu oubaü le luágunbei duna Hordán, ladüga buítima lan, aba laganóun yarafa lun Sodoma. Gama lumoun, wíyeti meha habagari gürigia ha Sodomabaña, gáñigüda hamuti Heowá lau lanarime burí hafigoun.

Lárigiñe, füramaseti Heowá lun Abüraámü gíbebaña lan ladügawagun kei waruguma ha siélubaña. Afiñeti meha Abüraámü luagu Heowá, gama lumoun, siñati gasaani tan Sara to lani weiriou. Dan le 99 lubéi irumu lau ani gúnfulimeme taali Sara 90, aba lariñagun Bungiu lun gasaanibaña lan. Ani ítara liña lasuseredun: aba tágurahan aban irahü le unbei hagúara Isaakü. Íbini gasaanigu lan Abüraámü amu, lídangiñeba buga lufamilia Isaakü liabin Esefuragülei le füramasewabei Edén.

Sun dan ligía aniheingua Lotu awinwanda Sodoma hau lufamilia. Ani, máyeihan lumuti liwiye habagari gürigia hagía, aban meha gürigia buiti Lotu. Ligíati, dan le desidírü lubéi Heowá lagünrinchaguni Sodoma, furumiñe óunahati fiú ánheligu lun hawisaruni Lotu. Ariñagatiñu lun, lun lanurahan habu lufamilia ani lun madigiragun hamá hárigoun. Adügati Bungiu lun lábürühan watu gemeti luma súfuru siélugiñe, aba lagumuchun hau lílana Sodoma luma Gomora. Séfuti Lotu hama biama lisaanigu würiña. Ánhounti lani weiriou digiguatu tárigoun, háfuga ladüga busentagili lan katei burí le tígirubei tárigiñegua. Hilatu ladüga maganbadi tan.

(Lídangiñeti Agumesehani 11:10-19:38.)