Kaba badüga anhein hanufude bubéi sandigua buguya bungua bábugua?

Arihabéi irahü le lídanbei dibuhu. Ma arihúati sandigua lan lungua lábugua luma lau anufudei? Sandiguañahaadibu san bungua ítara?... Súngubei wagía sandiguañahaadiwa woungua ítara. Ayanuhatu Bíbülia hawagu lubúeingu Bungiu ha meha asandiragubaña houngua hábugua luma lau anufudei lau sun meha hínsiñe lan Heowá houn. Elíasi meha aban hádangiñe. Ariha waméi ka lan asuseredubei lun.

Wínwanti meha Elíasi Ísüraeli saragu irumu lubaragiñe nasirua lan Hesusu. Lidan dan ligía, aban meha urúei le mínsiñehabuti lun Heowá, Bungiu le inarüniti, arúeihabei Ísüraeli ani mínsiñeti meha giñe Heowá tun lani weiriou. Aabü meha tuma Hesawéli híribei ani lun meha aban bungiu mama inarüniti gíriti Baali háhuduragua. Lun meha giñe Baali háhuduragua hiibe-agei ísüraelina. Wuribatu meha urúei Hesawéli, busentu meha táfaraguniña sun gürigia ha gaganbadibaña lun Heowá hilagubei. Ani kei meha le seriwi lubéi Elíasi lun Heowá, busentu meha giñe táfaruni hilagubei! Subuditi bun ka lan ladügübei Elíasi?...

Aba lanurahan! Anurahati lidoun aban lidise fulasu mageirawati, ábati laramudagun lagadábugiñe aban dübü. Ka funa san uagu laramudagua?... Ladüga lanufude. Gama lumoun, moun lumuti hamuga meha lanufudedun Elíasi. Ka uagu? Ladüga subuditi meha lun gayara lan líderaguni Bungiu. Arihañaha laali meha Elíasi gabafu lan Heowá. Aban hénpulu, óunaba lumuti meha lafurieidun lau lóunahan watu gemeti siélugiñe. Wéiriti lubafu Heowá, adián? Ítara liña. Ligíati, gayarati meha lafiñerun Elíasi luagu!

Dan le aniha lan Elíasi lagadábugiñe dübü, aba lálügüdüni Heowá: “Ka badügübei ya Elíasi?”. Aba lóunabun Elíasi: “Añahein meha amu gürigia ha gaganbaditiña bun, guentó, áurügaali eredera. Ani hanufudetina luéi giñe háfarunina”. Saminati meha áfarawagua lan sun ha eseriwidubaña lun Bungiu. Gama lumoun, aba lariñagun Heowá lun: “Uá, mámarügüñadibu buguya eredera. Añahagua sedü-milu gürigia áhuduragutiña nun. Manufudedabá, ladüga anihein aban wadagimanu le lunti níchuguni bun lun badügüni”. Ida liña funa san lasandiragun Elíasi lungua dan le lariñagunbalin Heowá katei le lun?... Chóuruti aba lan lagundaaragun saragu!

Guentó, saminabá luagun le asuseredubei lun Elíasi. Ka gayarabei bafurendeiruni lídangiñe?... Gayara lan lachülürün dan lun basandirun anufudei o basandiragun bungua bábugua. Gama lumoun, danme basandiragun bungua ítara, saminabá mama lan bábuguarügüñadibu lugundun gamadagutibu gürigia ha hínsiñehabutiña lun Heowá, hínsiñe buguya houn. Mabulieidabei giñe weiri lan lubafu Heowá ani líderagubadibu lan súnwandan. Ma gúndaatibu lau basubudiruni katei le?...