Ruti Heowá erei lun Elíasi

Aganba tumuti Hesawéli le asuseredubei houn lani Baali profetagu, ábati tagañidun saragu. Óunahatu ariñaga lun Elíasi: “Hilaadibume haruga kei lani Baali profetagu”. Aba lanufudedun Elíasi saragu, ábati lanurahan lidoun fulasu mageirawati. Ñein lafurieida: “Heowá, mawandunhadina. Busentina nounwen”. Kei buchá lubéi luagu Elíasi aba larumugun tábugiñe aban wewe.

Aba lagagudahani aban ánheli, ábati lariñagun lun lau ínsiñehabuni: “Saraba hou báamuga”. Arihati Elíasi aban fein róunutu luagu burí dübü süti luma aban ágeidinaü lau duna. Houti gurá ligía, ábayati larumugun. Ábaya lagagudahani ánheli, ábati lariñagun lun: “Houba. Mosu here ban lubá buéiyasun”. Ábayati leigin Elíasi murusun. Aweiyasuhati luagu 40 weyu luma 40 áriebu darí lachülürün luagu wübü Orebü. Ñein lebelura arumuga lidan aban huyu luagu wübü. Ábati lariñagun Heowá lun: “Ka badaagubei ya, Elíasi?”. Aba lóunabun Elíasi: “Magunfulirun hamaali ísüraelina füramasei le hadügübei bun. Günringua hamá bani latarü ani áfaragua hamá bani profetagu hilagubei. Háluahañadina giñe lun háfarunina”.

Lariñaga Heowá lun: “Furiba, ábame berederun rara luagu wübü”. Ouraméme ligía, aba láfurun aban garabali héreti. Lárigiñe, aba ladadagarun múa lau erei ani aba liabin aban watu gemeti. Lagumuhóun, aba laganbun Elíasi aban umalali hámaruti. Aba ladouragun lau ligibu tau ladaüragun, ábati lararamun bóugudi luéi huyu le luágubei wübü. Aba lálügüdüni Heowá ka lan uagu lanurahanbei. Lariñagati Elíasi: “Rédeihadina nábugua”. Ábati lariñagun Heowá lun: “Mama bábuguañadibu. Añaheingua 7,000 gürigia Ísüraeli ha huduguatiña nun. Beiba anúadirei Eliséu kei profeta beweñegua”. Lau lóufudagun, aba lidin Elíasi adügei le lariñagubei Heowá lun. Afiñetibu san líderagubadibu lan giñe Heowá ánhabu gaganbadi lun? Anha, líderagubadibu. Guentó, ariha wamá aban katei le asuseredubei dan le máhuyun lubéi huya.