SEKSIÓUN 2

Gúnfuli humá húmagua

“Moun [lumuti] lafanreinraguni wügüri le lóundarubei Bungiu.” (Márükosu 10:9)

Ariñagati Heowá woun: “Gúnfuli humá” (Malakíasi 2:16). Súdiniti katei le lídantima habagari maríeitiña, lugundun anhein ua gúnfuli hadan mafiñenbaña hawougua. Ani súdiniti hafiñerun hawougua lun laganwoundun ínsiñeni le hasandirubei.

Uguñe weyu, larabahaña gúnfuli lidan habagari maríeitiña. Mosu desidírü humá hadügün bián katei lun hóunigiruni hibagari keisi maríeitiña.

1 RU HUMÁ ABAN LÚGAARU SÚDINITI LUN HIBAGARI KEISI MARÍEITIÑA

LE TARIÑAGUBEI BÍBÜLIA: “[Anúadira huméi] katei le buídubei [o le súdinitimabei]” (Filipuna 1:10). Hibagari keisi maríeitiña ligía aban lídangiñe katei le súdinitimabei lidan hibagari. Lunti harihini kei aban lídangiñe katei le lunbei hetenirun lun furumiñe.

Busenti Heowá lun tuágunrügü lan hani weiriou o weiriei híchigei harihin, winwan huguyame lau ugundani húmagua (Apurichihati 9:9). Arufuda lumuti furangu moun lumuti lan hágurunu hani weiriou o weiriei, lubaragiñe lira, lunti lan láluahan kada aban líchugun ugundani lun le aban (1 Korintuna 10:24). Adüga humá lun tasandirun gebegi tan ani megei humanu, lunti giñe tadügüni maríeitu ligiaméme.

Lanügüña aban maríeiti bachati tun lani weiriou; lachülürüña aban maríeiti lídangiñe luadigimari aba ladarirunu lani weiriou ábougua

LE GAYARAABEI HADÜGÜNI:

Direi humá dan estodi lun hásügürüni tuma o luma hani weiriei, teni huguyame húniwagua
Samina humá huagun huguya biángubei, mámarügüla huouguoun hasaminara

Hásügürüña aban feru maríeitiña lubuidun dan úara

2 GÓUNIGI HUMÓUN HANIGI

LE TARIÑAGUBEI BÍBÜLIA: “Le awamadirutu aban würi, agabarahaali tuma tidan lanigi” (Matéu 5:28). Anhein asigira aban gürigia asaminara luagun magíaguni, gayaraati lariñawagún magunfulirun lan tun lani weiriou o weiriei.

Ariñagati Heowá mosu lan tounigirúniwa anigi (Ariñawagúni 4:23; Heremíasi 17:9). Lun lira, mosu duari humá lau le haríagubei (Matéu 5:29, 30). Sigí huméi hénpulu le lígirubei ichügüdinaü Hobu, le meha füramasebei lúniwagua mawamadirunbei lan amu würi bóugudin tuéi lani weiriou (Hobu 31:1). Desidírü humá tídangiñe sun hanigi maríagunbadün lan iyawaü o bidéu lánina agamariduni. Bunagua huméi haritagun masandirunbadün lan ínsiñeni libe le hasandirubei tuagu hani weiriou o weiriei luagu amu gürigia.

Aban maríeiti tau liyawa tuma lani weiriou luagu dábula le ñein lubéi lawadigimarida

LE GAYARAABEI HADÜGÜNI:

Arufuda huméi furangu houn sun gürigia desidírühadün lan úaraguabadün lan tun hani weiriou o weiriei
Inebelá le tasandirubei hani weiriou o weiriei hun ani dürügua huméi furumiñeguarügü umadaguaü le hánibei hama amu le adügüti lun mabuidun lan tasandiragun o lasandiragun lungua