SEKSIÓUN 5
Ida luba hanaagun hungua buidu hama ha híbiri hiduheñu?
“Abagarida humá [...] lau gudemehabu, areiduni, ǘnabuguni [...] luma gaguraasuni.” (Kolosana 3:12)
Dan le lamarieidun aban wügüri tuma aban würi, iserihaña iduheñu. Lau sun hínsiñememebaña lan hagübürigu hun ani inebe hagíame hun, hániharu weiriou o weiriei gürigia súdinitima lidan hibagari ligibuagu ubóu le. Másiñati güreweibei lan houn hádangiñe hiduheñu hánharun lun inarüni le. Gama lumoun, gayaraati líderagunün adundehani méiniti le tídanbei Bíbülia lun ñein lan darangilaü hama híbiri hiduheñu sunme aünha lan ederebudagüdei hibagari keisi maríeitiña.
1 ÓUSERA HUMÁ LAU LICHÚ AAU HAMA HA HÍBIRI HIDUHEÑU
LE TARIÑAGUBEI BÍBÜLIA: “Inebelá búguchi tuma búguchu bun” (Éfesuna 6:2). Meberesenga átirihali lan irumu hau, súnwandan mosu lan inebe hamá hagübürigu hun. Gabaroun huméi giñe megei tan hani weiriou tásügürün dan hama tagübürigu o hani weiriei hama lagübürigu. Memeidinti gürigia le hínsiñehabubei, ligíati, maweiyasun humá asandiragua hungua wuriba luagu lubuidun tanaagun hani weiriou o weiriei lungua hama ha híbiri liduheñu (1 Korintuna 13:4; Galasiana 5:26).
LE GAYARAABEI HADÜGÜNI:
Maweiridagüda huméi katei lau hariñagun dimurei kéiburi: “Súnwandan hayanuhan biduheñu wuriba nuagu” o “Úati ni kata nadüga lun gúndaaboun lan búguchu lau”
Áfaagua humá lun híchaagun hungua lidoun tilugaarun hani weiriou o weiriei
2 RÁRAMA HUMAÑA ANHEIN HARIHA MÉGEIWA LAN
LE TARIÑAGUBEI BÍBÜLIA: “Ligía lígirubei lubéi wügüri lúguchi tuma lúguchu, lun laganóun tuma lúmari, ábame hayabin lun ítara haba lan kei ábanrügü gürigia” (Agumesehani 2:24). Íbini lárigiñe hamarieidun, másiñati sandigiña lan hagübürigu mosu lan hóunigirunün, ligíati gayara lubéi hádaragun houngua lidoun hibagari keisi maríeiti lóugiñe le ladünabei.
Huguyaba desidírei halíaba lan lébeda hígiruniña lun hadügüni lira ani ariñaga huméi houn lau ínsiñehabuni. Gayaraati lariñawagún katei furangu sin layanuhóuniwa lau irofuni (Ariñawagúni 15:1). Líderagubadün ǘnabuguni, darangilaü luma péchanu anaagua hungua buidu hama hiduheñu luma lun “gaguraasun[meme] humá” hubaruagua lau ínsiñehabuni (Éfesuna 4:2).
LE GAYARAABEI HADÜGÜNI:
Anhein weiri lubéi ladiheridagüdünün hádaragun ha híbiri hiduheñu houngua lidoun hibagari, adimureha humá tuma hani weiriou o weiriei luagu turobuli le danme darangilu lan hasandiragun hungua
Belú humá lidoun úarani libügürü ida luba lan hóuserun danme hadunragun luma burí sügǘ ítarati