Lóuchawagun lafiñen Abüraámü

Arufudahati Abüraámü lun Isaakü, le lisaani, lun línsiñedun Heowá lun afiñe ligíame luagu burí füramasei le ladügübei. Dan gúnfulihali Isaakü kéiburi wein-seingü irumu, ariñagati Heowá lun Abüraámü lun ladügün aban katei hénrenguti. Subuditi bun katei lan?

Ariñagati Bungiu lun Abüraámü: “Barübei bisaani Isaakü, le ábanrügübei, beiba lau lóubawagun Moriá. Ábame badagaragüdüni nun ñein ligibuagu aban wübü”. Lau sun ibidiñe lan meha lun Abüraámü ka lan uagu lamuriaha Heowá luma lun ladügüni lira, adüga lumuti.

Larugan binaafin, aba lidin Abüraámü lau Isaakü hama bián hádangiñe lumusuniña lóubawagun Moriá. Lárigiñe ǘrüwa weyu, aba hagumeserun arihei wübü burí ligía dísegiñe. Ariñagati Abüraámü houn lumusuniña lun hagurabahaniña sunme aningira lan luma Isaakü adagaragüda lun Heowá. Aba lanügünu Abüraámü gusiñu, ánheinti watu, ru lumuti lun Isaakü. Ábati lálügüdahan Isaakü: “Hagéi san animaalu lun adagaragüdüni, núguchi?”. Lariñaga Abüraámü lun: “Líchugubei Heowá woun, niráü”.

Dan le hachülürünbei luagun wübü, aba hadügün aban latarü. Ábati lagüraguni Abüraámü lugudi luma lúhabu Isaakü, aba líchuguni luagun latarü.

Aba lárügüdünu Abüraámü gusiñu. Ouraméme ligía, aba lariñagun lani Heowá ánheli siélugiñe: “Abüraámü! Madügabá ni kata lun irahü le! Subudi naali guentó afiñe ban luagu Bungiu, ladüga mamahantibu bíchuguni bisaani keisi adagaragüdüni”. Aba larihin Abüraámü dahiñu liña lan aban mudún wügüri luéigiñe liganchun lidan aban búbugati. Ábati lafaragaduni Abüraámü Isaakü lau lóufudagun aba ladagaragüdüni mudún ligía leweñegua lisaani.

Lúmagiñe weyu ligía, gumeseti Heowá ariñaga luagu Abüraámü numada. Subudi bumuti ka lan uagu? Ladüga adüga lani Abüraámü sun le lariñagubei Heowá lun, íbini dan le ua lan gunfuranda lani ka lan uagu.

Ábaya füramase lan Heowá lun Abüraámü: “Nabinirubadibu. Nadügüba lun gibe hamá bisaanigu”. Mini lan lira, hádangiñeba lan meha liduheñu Abüraámü ladüga Heowá saragu katei buiti hawagu sun gürigia ha óuserutiña buidu.