Óunahati Heowá aban ánheli esefurei Esekíasi

Ábürühaali meha arúeihani ísüraelina le lánina 10 türibu lábugiñoun habafu asiriana. Busenhali méhati Senakeríbü, le lurúeite Asiria, lárügüdüni arúeihani hudaana le lánina bián türibu. Gumeseti árügüdei uburugu burí le Hudaabei aban lárigi aban. Ani Herusalén meha uburugu létima labusenrubei lárügüdün. Le ibidiñebei lun Senakeríbü lóunigiruñein lan meha Heowá Herusalén.

Fáyeiti Esekíasi, le lurúeite Hudá, bandi seinsu lun Senakeríbü lun lígiruni Herusalén lungua. Íbini ragǘ lani Senakeríbü seinsu, óunaha lumutiña lisudaranigu ha hérebaña ábürüha luagun Herusalén. Hanufudetiña meha lílana Herusalén ladüga ayarafadeina haña lan asiriana. Ábati lariñagun Esekíasi houn: “Manufudeda humá. Lau sun here hamá asiriana, ladügüba Heowá lun héretima wamá hawéi”.

Óunaha lumuti Senakeríbü rabüsaké Herusaléun lun ladügün bula hau lílana. Ráramati rabüsaké bóugudi luéi uburugu, ábati lagúaragun: “Siñá lubadün Heowá íderagua. Mígira humá lun leyeedunün Esekíasi. Úati bungiu gabafuti lun lesefurunün wawéi”.

Álügüda lumuti Esekíasi Heowá ka lan lunbei ladügüni, lariñagati Heowá lun: “Manufudedabá luéi le lariñagubei rabüsaké. Mebelubei Senakeríbü Herusaléun”. Lárigiñe, resibiti Esekíasi gárada lúmagiñe Senakeríbü, to ídanboun lariñaga: “Deregegua humá hungua. Mesefurun lubadün Heowá”. Aba lafurieidun Esekíasi: “Heowá, sefubáwa, subudi hamaamugei sun gürigia buguyarügüñein lan Bungiu inarüniti”. Aba lóunabun Heowá: “Mebelubei lurúeite Asiria Herusaléun. Nóunigirubei nuburugute”.

Chouru lumuti yebe Senakeríbü málühali lan agañeirei uburugu Herusalén. Gama lumoun, áriebu ligía, óunahati Heowá aban ánheli tidoun hakianpun-agei súdaragu asiriana, to bóugudiboun luéi uburugu. Áfarati ánheli ligía 185,000 súdaragu! Féridi lumutiña urúei Senakeríbü lisudaranigu ha héretimabaña, ábati lagiribudun lúbiñoun lau lueirin íruni. Ítara liña lesefuruni Heowá Esekíasi luma Herusalén, kei füramase lani. Lun hamuga meha ñéinñadibu lan Herusalén, bafiñeruña hamuga san luagu Heowá?