Hínsiñeti Lilurudun Bungiu lun Hosíasi

Widü meha irumu lau Hosíasi dan lagumeserunbei arúeiha Hudá. Lidoun dan ligía, huduguatiña meha lílana Hudá houn guáriua, abiñaraha hagía. Dan le 16 lubéi irumu lau Hosíasi, hóuchati lafurendeiruni ida luba lan láhuduragun lun Heowá lidan igaburi le buídubei. Dan le wéinhali irumu lau Hosíasi, aba lagumeserun agünrinchaguaña guáriua luma burí latarü le lídanbei lageira. Danti le wein-sísihali irumu lau, óunahati aranseragüdoun litenpulun Heowá.

Tidan ténpulu, dariti Ilükíasi, fádiri le íñutimabei, aban líburu hóuburatu to ídanboun bürüwañu lan Lilurudun Heowá. Másiñati Moisesi lan abürüdübarun. Aba lanügünu Safán, le lani urúei abürühati, líburu tuguya lun Hosíasi, ábati lagumeserun aliihei Lúrudu lun lau umalali héreti. Aganba lumuti Hosíasi, aba lasubudiruni barühaña lan gürigia bandi irumu lau maganbadi hamá lun Heowá. Lariñaga lun Ilükíasi: “Wéiriti ligañi Heowá wama. Ayanuhabá luma ariñaga láamugei woun ka lan lunbei wadügüni”. Yusu lumutu Heowá Uludá, to profeta, lun lóunabuni ítara: “Ígira hamaadina lílana Hudá. Nabeichaaña, íbini mámaba lan lidan lidaani urúei Hosíasi nadügei, ladüga ǘnabuti lanaagun lungua nigibugiñe”.

Dan laganbunbalin urúei Hosíasi uganu le, aba lidin ténpulurugu, aba lóundaraguniña sun lílana Hudá. Ábati laliihani Lilurudun Heowá houn lau umalali héreti. Dandu Hosíasi kei lílana Hudá füramasetiña gaganbadibaña lan lun Heowá tau sun hanigi.

Mefeduhan hamagili meha lílana Hudá Luéyuri Esefuruni luagu bandi irumu. Danti laliihanbei Hosíasi lidan Lúrudu mosu lan lefeduhóun Luéyuri Esefuruni sagü irumu, aba lariñagun houn lumutuniña: “Wefeduhaali Luéyuri Esefuruni lidan liri Heowá!”. Aranseti Hosíasi bandi adagaragüdüni, adüga ligía aban sétanu eremuhatiña lun heremuhan tubadu ténpulu. Ábati hefeduhani Luéyuri Esefuruni, lárigiñe, aba hefeduhani Tufedun Fein Maganatu Lébini, le adurarubei sedü weyu. Mefeduhóungili meha aban Luéyuri Esefuruni kei lira lúmagiñe lidaani Samueli. Hínsiñeti meha Lilurudun Bungiu lun Hosíasi tídangiñe sun lanigi. Agia buguya? Hínsiñeti giñe san bun bafurendeirun luagu Heowá?