Heresibirun disipulugu sífiri sandu

Diisi weyu lárigiñe lagiribudun Hesusu sielun, ligía heresibiruni lani disipulugu sífiri sandu. Chülühaña meha bandi gürigia ha lídangiñetiña bandi fulasu Herusaléun lun hefeduhani Fedu Pentekosutesi le lánina irumu 33. Óundaragu haña meha kéiburi 120 lani Hesusu disipulugu lidan aban rumu íñugiñe tibiti aban muna. Sódini, aba lasuseredun aban katei le adügübei lun taweiridun hanigi gürigia. Aba lasaliragun aban katei kamá hamuga watu gemeti lábulugu kada disipulu, ábati hagumeserun ayanuha lidan ámuñegueinarügü iñeñein. Aganbúati giñe liréin aban garabali tidan muna to ñein habéi.

Aganba hamuti gürigia ha lídangiñetiña amu burí ageiraü ha achülürübaña Herusaléun areinchuni ligía, ábati héibaagun arihei ka lan asuseredubei tidan muna tuguya. Aba taweiridun hanigi dan le haganbunbaliña disipulugu ayanuha lidan burí amu iñeñein. Hariñaga: “Ma san galiléana gürigia ha? Ida liñati hayanuhaña lubéi lidan wañeñe?”.

Aba lararamun Féduru hama ha híbiri apostolugu hagibugiñe sun gürigia. Ariñagati houn saragüda lani Heowá Hesusu lídangiñe óunweni lárigiñe lafarúniwa hilagubei. Ariñagati giñe: “Aniheinhali Hesusu sielu luéigiñe lóunwenren Bungiu. Ani rúhali sífiri sandu woun, ítara kei füramase lani. Ligía aünha lubéi aganbei luma arihei milaguru le”.

Aba taweiridun hanigi gürigia. Chülüti le lariñagubei Féduru tidoun hanigi, ligía hálügüdahanbei: “Ka san lunbei wadügüni?”. Lariñaga houn: “Asaküriha humá, badisei huguyame lidan liri Hesusu. Ábame giñe ledewehóun sífiri sandu hun”. Badiseitiña kéiburi 3,000 gürigia weyu ligía. Lúmagiñe dan ligía, aba agibedeina hamá disipulugu Herusalén. Lau lídehan sífiri sandu, aba aganwoundeina lan burí damuriguaü le hagumeserubei apostolugu. Ítara, gayaraahali meha harufudahan houn disipulugu lun gaganbadi hamá lun le lariñagubei Hesusu.