ARUFUDAHANI 37
Le tariñagubei Bíbülia luagu wadagimanu luma seinsu
Sandiguañahaadün san hungua lau saragu idiheri luagu wadagimanu luma seinsu? Gayaraati hénrengu lan wibihini le wemegeirubei sun awanha lan íchigei áhuduraguni le yuubei lun Heowá lun. Rutu Bíbülia adundehani huuti woun luagu katei le.
1. Ka tariñagubei Bíbülia luagu wadagimanu?
Busenti Heowá lun gunda wamá lau wawadigimari. Ariñagatu Bíbülia buidu lan “lun lefeduhani [gürigia] le lagañeirubei luagu luadigimari” (Apurichihati 2:24). Benefati Heowá. Dan le wáyeihani lau benefa wamá, wadügüñein le hínsiñebei lun ani buídubei wasandiragun woungua.
Lau sun lunti lan wawadigimaridun, moun lumuti lárügüdüni wadagimanu lubara wáhuduragun lun Heowá (Huan 6:27). Füramaseti anhein lan wíchiga lidan furumiñeti lúgaaru lidan wabagari, líchugubei lan le wemegeirubei woun.
2. Ida luba warihini seinsu?
Lau sun ariñaga tan Bíbülia óunigiha lan seinsu, wéridi tumutiwa giñe mibihinbadiwa lan ugundani láurügü seinsu (Apurichihati 7:12). Ligía tariñagunbei Bíbülia woun lun lan míchugun wamani wínsiñehabu luagun seinsu ani ru tumuti adundehani le woun: “Gunda humá lau le húmati” (aliiha huméi Ebüréu 13:5). Dan le gunda wamá lau le wámabei, masandi wamuti magundani le lanügübei wasaminarun lougua lan wámati. Mádaraguntiwa giñe woungua lidoun dúeiti le memegeirun wamuti (Ariñawagúni 22:7). Séfutiwa giñe luéi wuribani le lanügübei lahurerúniwa luagu seinsu luma láluahan gürigia chansi lun larisidun lau lóufudagun.
3. Ida luba gíchigadi wamá dan le wayusuruni waseinsun?
Aban Bungiu gíchigaditi Heowá ani áyeiha wamuti dan le aranseñu wamá lun wíchugun lídangiñe wámati houn amu (1 Timotéu 6:18). Yusu wamuti waseinsun buidu dan le wídehan lun lafayeirún le agastarúbei lidan damuriguaü luma dan le wíderaguniña ha mégeibalin, wíbirigutima. Mámatima átiriñein lan wíchugun unbei letenira Heowá, lúntima lébuna wadügüni letenira. Ánhawa íchiga tídangiñe sun wanigi, gúndaabadiwa ani wagundaaragüdübei giñe Heowá (aliiha huméi Adügaü 20:35).
SIGÍ HUMÁ AFURENDEIRA
Ariha huméi buiti le lanügübei wakipuruni wadagimanu lidan lúgaaru le yuubei lun ani gunda wagíame lau le wámati.
4. Ru humá uéiriguni lun Heowá lau aban humá nadagimeinti buiti
Larihúba buidu lan wamadagua luma Heowá lidan ligaburi warihini wadagimanu. Ariha huméi BIDÉU, ábameti hayanuhan luagu álügüdahani burí le:
Ka hínsiñetimabei hun luagu ligaburi lóuserun Jason lidan wadagimanu?
Ka ladügübei lun líchuguni wadagimanu lidan lúgaaru le yuubei lun?
Aliiha huméi Kolosana 3:23, 24, ábameti hayanuhan luagu álügüdahani le:
Ka uagu lunti lubéi wadügüni wawadigimari “lau ugundani”?
Lau sun mosu lan wawadigimaridun, moun lumuti wígirun lun lárügüdüni wadagimanu lúgaaru le yuubei lun wáhuduragun lun Heowá.
5. Buiti le lanügübei gunda wamá lau wámati
Hóuchatiña saragu gürigia habihini sun seinsu le hayaraati. Ánhounti Bíbülia, ariñagatu woun lun wadügün amu katei. Aliiha huméi 1 Timotéu 6:6-8, ábameti hayanuhan luagu álügüdahani le:
Ka adundehani tíchugubei Bíbülia woun?
Gayaraati gunda wamá íbini lougua lan wámati. Ariha huméi BIDÉU, ábameti hayanuhan luagu álügüdahani le:
Ka uagu gunda habéi iduheñu ha lau sun mibe lan seinsu hama?
Ánheinti gibe lubéi wámati ani busengidiwa lanwoun? Abahüdaguati Hesusu aban sügǘ le arufudubalin wuriba lan igaburi le. Aliiha huméi Lúkasi 12:15-21, ábameti hayanuhan luagu álügüdahani le:
Ka gayaraabei hafurendeiruni lídangiñe le labahüdagubei Hesusu? (Ariha huméi bérusu 15).
Aliiha huméi le lariñagubei Ariñawagúni 10:22 lumoun le lariñagubei 1 Timotéu 6:10. Ábameti hayanuhan luagu álügüdahani burí le:
Kátima buídubei? Lumada wamá Heowá o gibe lan waseinsun? Ka uagu?
Ka turobuli lanügübei wabusenrun wibihin bandi seinsu?
6. Líchugubei Heowá le wemegeirubei woun
Dan le gaturobulin wamá luagu wadagimanu luma lilouguan seinsu íderagua lumutiwa katei le lun warihini anhein afiñe wabéi luagu Heowá. Ariha huméi BIDÉU, lun harihini ka lan gayaraabei wadügüni dan le wadunragun luma turobuli burí le ani ábame hayanuhan luagu álügüdahani burí le:
Según le warihibei lidan bidéu, ka lénrengunga úmabei lagagibudagua íbiri?
Ka ladügübei lun lahandilihani turobuli ligía buidu?
Aliiha huméi Matéu 6:25-34, ábameti hayanuhan luagu álügüdahani le:
Ka füramase lubéi Heowá houn ha íchugubalin furumiñe lidan habagari?
LE HARIÑAGUBEI FIU GÜRIGIA: “Siñabei nidin lidan sun adamuridaguni lugundun mosu nawadigimaridun saragu lun nanuriahaniña niduheñu”.
Ka bérusu tídangiñeti Bíbülia achoururagüdübalin hun lichugúniwa lan áhuduraguni lun Heowá lidan furumiñeti lúgaaru buídutimabei?
LE HAFURENDEIRUBEI
Lau sun mégeiwa lan wadagimanu luma seinsu, moun lumuti leberesehaniwa luéi weseriwidun lun Heowá.
Águyuguagüdüni
Ka gayaraabei líderagunün arihei wadagimanu keisi lubudubu?
Ka buiti gayaraabei hibihini lídangiñe gufuruma humá lau le húmati?
Ida luba harufuduni afiñe humá luagu füramasei le ladügübei Heowá luáguti líchugubei lan sun le hemegeirubei lumutuniña houn?
FURENDEI HUMÁ LANWOUN
Ariha huméi anhein ariñaga tubéi Bíbülia luagu wuriba lan seinsu.
“Seinsu san lébunabei sun wuribani?” (Ariñahani lídangiñeti jw.org)
Furendei huméi ida luba lan wayusuruni seinsu lidan aban igaburi le hínsiñeti lun Bungiu.
“Ka tariñagubei Bíbülia luagu gíchigadi?” (Ariñahani lídangiñeti jw.org)
Wuribati san lahurerúniwa luagu seinsu?
“El punto de vista bíblico: Los juegos de azar” (¡Despertad!, to lánina ǘrüwa-hati, irumu 2015)
Aliiha huméi ka lan ínchahabalin aban híweruti le giñe áhurerubei luagu seinsu lun lasansiruni libagari.
“Me apasionaban las carreras de caballos” (La Atalaya, to lánina 1 lidan unsu-hati, irumu 2011)