Adundehani lun adamuridaguni Habagari Kristiánugu luma Heseriwidun

Tila

1. Tidan dugumedu to, anihein adundehani houn sun ha lúnbaña gafanran hamá lidan adamuridaguni Habagari Kristiánugu luma Heseriwidun. Danme le haranseruni hidasin, lunti háguyuguagüdüni dandu adundehani le kei le áfuachubei lidan ubanaü Le lunbei ladügǘniwa lidan adamuridaguni Habagari Kristiánugu luma Heseriwidun. Lunti hinchahóun sun íbirigu lun hagunfulirun lau dasi le ichugúbei houn lidan adamuridaguni le. Gayaraati giñe gafanran hamá gürigia ha gabasiihadibaña lidoun adamuridaguni anhein anha habéi lun le tarufudahabei Bíbülia, falá haméi tadundehan lidan habagari. Anhein anihein lubéi somu gürigia le busenti gafanran lan lidan adamuridaguni le lubaragiñe liridún keisi apurichihati le mabadiseirúngili, furumiñe, lóundaraguba íbiri le eseriwidubei kei arihiti lau adamuridaguni Habagari Kristiánugu luma Heseriwidun luma, lun larihini anhein gúnfuli lubéi lau le agurabúbei lúmagiñe, ánheinti gúnfuli lubéi lau, ligíaba ariñagei lun gayara lan gafanran lan lidan adamuridaguni. Lidan adamuridaguni ligía, mosu ñeinbei lan íbiri le íchugubei aturiahani lun gürigia ligía (ani anhein irahügili lubéi, mosu ñeinbei lan aban hádangiñe lagübürigu le seriwiti lun Heowá). Dandu ha busenbaña gafanran hamá lidan adamuridaguni kei ha busenbaña hiridún kei apurichihatiña, gasu hagunfulirun lau ligiaméme katei le agurabúbei hámagiñe (od-S kap. 8 pár. 8).

DIMUREI BURÍ LÁNINA EBELAAGÜLEI

2. Aban minutu. Lárigiñe uremu luma furíei, línchahabaña alidihati adamuridaguni íbirigu lun busén hamá híchugun arigei lun le lunbei lakutihóun lidan adamuridaguni Habagari Kristiánugu luma Heseriwidun. Lunti luágutima lan puntu le húutimabei houn lílana damuriguaü layanuha.

ARUFUDAHANI GEBEGITI TÍDANGIÑETI BÍBÜLIA

3. Yanu (10 minutu). Rúati liri yanu le lidan ubanaü Le lunbei ladügǘniwa lidan adamuridaguni, iridúa ligía biama o ǘrüwa puntu súdiniti. Ábanba wéiyaali lidan afiñeni o ídehati lidan damuriguaü le aranseti buidu íchigei yanu le. Danme le lagumeserun taliihóun aban iseri líburu tídangiñetu Bíbülia, larihagüdǘwaba aban bidéu le lánina ebelaagülei tun líburu tuguya. Lau sun gayaraabei lan layanuhan luagu le arihúbei lidan bidéu, súnwandan mosu lan lafuranguagüdüni puntu le iridúbei lidan ubanaü Le lunbei ladügǘniwa lidan adamuridaguni. Adügǘwati burí dibuhu tuma iyawaü to áfuachuboun lidan ubanaü le lun tóustaragüdüni ariñahani lídanbei, ligíati mosu lubéi lafuranguagüdün segunme léibugun dan lau. Gayaraati layusurún amu ariñahani, ídeharügaali ligía lun lafuranguagüdüniwa puntu burí le uágubei layanuhóua lidan fánreinti le.

4. Darí wamá pérüla lánina lichú aau (10 minutu). Ábanba wéiyaali lidan afiñeni o ídehati lidan damuriguaü le aranseti buidu adundehei fánreinti le lau álügüdahani luma óunabagülei mariñagunga dimurei lánina ebelaagülei ni lánina agumuchagülei. Mosu ladügüni biángubei álügüdahani. Ligíaba ariha anhein laliihóuba lubéi bérusu o maliihóunbei lan. Sun ha lúnbaña hóunabun, mosu híchuguni hóunabagüle lidan 30 segundu o ǘnabu luéi.

5. Aliihani tídangiñe Bíbülia (4 minutu). Ábanba wügüri aliiha mariñagunga dimurei lánina ebelaagülei ni lánina agumuchagülei. Leteniruba alidihati adamuridaguni lun líderaguni aturiahati aliiha lau fararaguaü, kei bürüwañu lan dimurei, lidan aban igaburi le gunfurandawati, asansiheina loufun luma liñun lumalali, lun ladügüdarun luagu dimurei dan le mégeiwa lan, lun inebe lan puntu luma koma lun ani aliiha ligíame kei ligaburi ladimurehan. Kei anihein lubéi aliihani tídangiñe Bíbülia le migifetimati luéi amu, lunti gabaroun lani íbiri le eseriwidubei kei arihiti lau adamuridaguni iyaraani le hawagubei íbirigu dan le lanúadiruni kaba lan un líchigei ítaga aliihani.

GARUFUDAHADI WAMÁ

6. Keinsi minutu. Adügǘwati fánreinti le lun híderawagun lílana damuriguaü abuiduragüdei ligaburi hapurichihan luma harufudahan. Según mégeiwa lan, gayaraati giñe gafanran hamá wéiyaaña lidan afiñeni lidan yanu le ichugúbei houn aturiahatiña. Lunti lawadigimaridun kada gafanranti lidan puntu tídangiñeti garüdia Haliihan luma harufudahan o Laulá ínsiñeni wadüga disipulugu le iridúbei lidan parentesisi ñein lubéi láfuacha fánreinti le yuubei houn lidan ubanaü Le lunbei ladügǘniwa lidan adamuridaguni. Ñeinbei dan ladügǘniwa fánreinti le lau álügüdahani luma óunabagülei ani ábanba wéiyaali lidan afiñeni o ídehati lidan damuriguaü le aranseti buidu ariha lau (ariha huméi párafu 15 le ayanuhabei luagu ida luba lan ladügǘn fánreinti akutihani hama íbirigu).

7. Gumese huméi yanu. Gayaraati lichugún dasi le lun aban wügüri o tun aban würi. Danme le lichugún tun aban würi, mosu ábanba lan würi tupaaná, ánheinti ichugúa lun aban wügüri, lunti ábanba lan wügüri lupaaná, ánheingubeirügü lani lubéi weiriou, lisaani, lúguchu o litu. Gayaraati lichugún dasi le ñun o rara. (Lúntima gunfuranda humani halíagiñe lan lasagarúa ariñahani lun burí yanu luma sügǘ le ídanbei lanüga fulasu, ariha huméi párafu 12 luma 13.

8. Giribu humá bisidaña gürigia. Gayaraati lichugún dasi le lun aban wügüri o tun aban würi. Danme le lichugún lun aban wügüri, lunti ábanba lan wügüri lupaaná, ánheinti ichugúa tun aban würi, mosu ábanba lan würi tupaaná, moun lumuti líchuguni aban wügüri dasi le tuma aban würi (km-S 5/97 páh. 2). Gayaraati lichugún ñun o rara. Mosu larufuduni le íchugubalin yanu ka lan gayaraabei lariñawagún danya le labisidahóun aban gürigia le arufudubei busén lan lasigirun afurendeira dan layanuhóunbei luma lubaragiñe. (Lúntima gunfuranda humani halíagiñe lan lasagarúa ariñahani lun burí yanu luma sügǘ le ídanbei lanüga fulasu, ariha huméi párafu 12 luma 13).

9. Adüga humá disipulugu. Gayaraati lichugún dasi le lun aban wügüri o tun aban würi. Danme le lichugún tun aban würi, mosu ábanba lan würi tupaaná, ánheinti ichugúa lun aban wügüri, lunti ábanba lan wügüri lupaaná, ánheingubeirügü lani lubéi weiriou, lisaani, lúguchu o litu (km-S 5/97 páh. 2). Gayaraati lichugún ñun o rara. Adügǘwati fánreinti le lun larufudúniwa ida liña lan lichugún aban aturiahani le gumesewaali. Mama mosu lariñawagún dimurei lánina ebelaagülei ni lánina agumuchagülei, ánheingubeirügü lawadigimariduña lubéi gürigia ligía lidan aban lídangiñe igaburi le. Lau sun gayara lan haliihani sun ariñahani lau umalali héreti, mama mosu hadügüni.

10. Afuranguagüda huméi hafiñen. Danme le lunti lan lichugún dasi le kei aban yanu, ábanba wügüri íchigei. Dánmeti le lunti lan lichugún kei larufudún aban sügǘ, gayaraabei lichugún lun aban wügüri o tun aban würi. Danme le lichugún tun aban würi, mosu ábanba lan würi tupaaná, ánheinti ichugúa lun aban wügüri, lunti ábanba lan wügüri lupaaná, ánheingubeirügü lani lubéi weiriou, lisaani, lúguchu o litu. Ábanba álügüdahani liri yanu le ani mosu lafuranguagüdüni íchuguti yanu álügüdahani ligía lau inebesei. Gayaraati lariñaguni halíagiñe lan lasagarei ariñahani ligía o mariñagun lani.

11. Yanu. Lunba aban wügüri lichugúa dasi le lugundun mosu lichugún kei yanu hagibugiñe lílana damuriguaü. Danme le lídangiñe lan Lanwoun ariñahani 1 le tídanbei garüdia Laulá ínsiñeni wadüga disipulugu lasagarúa, lunti larufuduni íchuguti yanu ida luba lan layusurún bérusu burí le ñeinbei lidan apurichihani. Kei hénpulu, gayaraati lafuranguagüdüni le mini lubéi aban bérusu, sügǘ le ídanbei gayara lan layusurún luma ka lan gayaraabei lariñawagún lun híderawagun gürigia asaminara luagun le lariñagubei. Danme le lídangiñeti lan aban lídangiñe arufudahani le tídanbei garüdia Laulá ínsiñeni wadüga disipulugu yanu ligía, lunti luágutima lan ida luba lan layusurún ariñahani ligía lidan apurichihani layanuha. Anhein lariha buídubei lan lun ladügüni, gayaraabei layanuhan luagu gürigia le uágubei layanuhóua lidan puntu 1 le lídanbei arufudahani ligía o luagu aban lídangiñe bérusu le áfuachubei lidan fánreinti ARIHA HUMÉI GIÑE.

12. Ariñahani. Dandu adundehani le lídanbei párafu le kei le lídanbei le aban, luáguti burí dasi le gíribei “Gumese huméi yanu” luma “Giribu humá bisidaña gürigia”. Ánheingubeirügü ariñawagúa amu katei, adügǘwati burí dasi le lun layanuhan gürigia le unbei lichugúa luagu somu inarüni tídangiñeti Bíbülia lidan aban igaburi le ménrengunti ani le gayaraati ladaaruni üma lunya layanuhan luma gürigia le úmabei layanuha. Lunti layanuhan gürigia le unbei latokara fánreinti le luagu somu katei le uágubei hemegeira gürigia haganbun lidan fulasu le ñein lubéi hawinwanda. Ligíaba giñe ariha anhein larufuduba lubéi aban tídangiñe agumeiraguagüdüni tótima wayusuruboun lun warufudahan o somu bidéu. Lubaragiñe harufudun ha lúnbaña híchuguni dasi le aban sügǘ le furendeirügü hamuti hachügüwagu, mosu háfaagun lun hafurendeirun ayanuha buidu, kéiburi hígirun lun lawanserun yanu lau lumenrengun o háluahani le buídubei houn amu.

13. Sügǘ le ídanbei lanüga fulasu. Lunti líchuguni gürigia dasi le áyeiheina somu sügǘ le burí úmabei gadunraguadi hamá lílana damuriguaü. Kéiburi:

1) Tidan burí muna. Dan lan yebe wapurichihan houn gürigia dan le wadariruniña hábiñe, wabürühan houn luéigiñe gágamuru o tuéigiñe gárada o danya le wayanuhan luma somu gürigia le arufudubei busén lan lasigirun afurendeira dan le wapurichihanbei lun lidan furumiñeguarügü lídangiñe ligaburi apurichihani le.
2) Dan hadarirun chansi. Layanuhóuña ya luagu sügǘ le ídanbei adireireina wamani léibugun yanu lun wagumeserun apurichiha houn gürigia dan le wayanuhaña lan hama luagu furumiñeguarügü katei lidan awanha lan adügei waberesegun le lánina sagü weyu. Kéiburi dan le wayanuhan luagu somu bérusu tídangiñeti Bíbülia luma aban wabesinan, luma aban wapaaná lidan wadagimanu o leskuelarugu, luma gürigia le wóubagiñebei tidan busu, íngiini, awión o amu ugunei, o lidan furumiñeguarügü amu sügǘ.
3) Apurichihani lidan guririguaü. Layanuhóuña ya luagu wapurichihan tau tarufudaagüle agumeiraguagüdüni, o dan le woudin ǘmada o párükerugu áluga wapurichihan houn gürigia ha ñéinbaña o ha ásügürübaña ñéingiñe, o dan le woudin apurichiha lidan burí fulasu le ñein tubéi burí bísinisi o lidan furumiñeguarügü amu fulasu le ñein lumuti hachülüra saragu gürigia.

14. Larufudún bidéu luma tederegerún agumeiraguagüdüni. Segunme larihini gürigia le unbei lichugúa aban dasi, gayaraabei lanúadiruni anhein layanuhaba lubéi luagu somu bidéu o lederegeruba lan somu agumeiraguagüdüni. Ñeinbei giñe dan ábanbei lan fánreinti lídangiñe lidasin layanuhan luagu somu bidéu. Meberesenga ka lan lébunabei layanuhan luagu bidéu, moun lumuti larihagüdüni danme le líchuguñein lan liyanun.

WABAGARI KEISI KRISTIÁNUGU

15. Gumeseti fánreinti le lau uremu. Lidan furumiñeti 15 minutu, lichugúba aban o bián yanu lun híderawagun lílana damuriguaü afalarei le tariñagubei Lererun Bungiu. Mosu ábanba lan wéiyaali lidan afiñeni o aban ídehati lidan damuriguaü le aranseti buidu íchigei fánreinti burí le (ánheingubeirügü ichugúa amu adundehani). Ánheinti yanu luáguti le mégeiwabei lidan damuriguaü, wéiyaañarügübaña lidan afiñeni íchigei. Danme le mosu lan lakutihóun aban ariñahani lau álügüdahani luma óunabagülei, gayaraabei ladügün íbiri amu burí álügüdahani bóugudin luéi le áfuachubei lidan ubanaü Le lunbei ladügǘniwa lidan adamuridaguni. Lunti láfaagun lun chati lan lebelaagüle, ígira láamuga dan nófuti lun lakutihóun puntu burí le súdinitimabei luma lun híchuguni íbirigu hóunabagüle. Anhein lálügüdaguba lubéi somu íbiri, mosu lagunbirahóun íbiri ligía luagun plataforma lun mama lan lídangiñe lala lóunabaha, ánheingubeirügü siñá lubéi lamudeirun luagun plataforma.

16. Taturiahóun Bíbülia lidan damuriguaü (30 minutu). Mosu ábanba lan wéiyaali lidan afiñeni le aranseti buidu adundehei (anhein mibe habéi wéiyaaña, gayaraati lichugún dasi le lun aban ídehati lidan damuriguaü le aranseti buidu). Lunti harihini sun wéiyaaña lidan afiñeni ha lídanbaña damuriguaü kátima lan aransebaña buidu lun hagunfulirun lau dasi le. Mosu íbirigu hamá ha gayaraaguatiña houngua lun másügürün hamá lídangiñe dan le ichugúbei houn, hasubudiruni ka burí lan bérusu tídangiñeti Bíbülia súdinibei luma ida luba lan híderaguniña lílana damuriguaü asubudirei ida luba lan lahuudun puntu burí ligía houn lidan habagari. Lun lira, líderagubaña hakutihani ariñahani luáguti ida luba lan lalidihóun fánreinti le laubei álügüdahani luma óunabagülei (w23.04 páh. 24, rekuáduru). Anhein akutihóuaali lubéi sun ariñahani le yuubei lun dimaasu ligía buidu buidu, mama mosu hachawaraguagüdüni lidura aturiahani darí lóustarun 30 minutu. Anhein gayara, lunti ámuñegueinarügü hamá íbirigu aliiha luma adundehei fánreinti le kada dimaasu. Anhein amuriaha alidihati adamuridaguni luma íbiri le arihibei lau Taturiahóun Bíbülia lidan damuriguaü lun lachatiruni lidura aturiahani, ligíaba anúadirei ida luba lan ladügüni. Lun lira, gayaraati lanúadirun lun maliihóuniwa lan fiu lídangiñe párafu.

DIMUREI BURÍ LÁNINA LAGUMUCHUN ADAMURIDAGUNI

17. Ǘrüwa minutu. Líriduba alidihati adamuridaguni fiu lídangiñe puntu le akutihóubei lidan adamuridaguni Habagari Kristiánugu luma Heseriwidun le gayaraati lahuudun houn lílana damuriguaü, ayanuha ligíame murusunraü luagu le lunbei lakutihóun leweñegua dimaasu. Anhein anihein lubéi dan, gayaraati giñe líriduni hiri íbirigu ha lúnbaña gafanran hamá leweñegua dimaasu. Ánheingubeirügü ariñawagúa amu katei, líchuguba alidihati adamuridaguni furumiñeguarügü awisahani le súdiniti o laliihaba furumiñeguarügü gárada to luntu taliihóun houn lílana damuriguaü danme le lariñaguni Dimurei burí lánina lagumuchun adamuridaguni. Ánheinti awisahani le ichugúbei súnwandan —kéiburi kábabei lan oura apurichihani o kaba lan un latokara arumadahani— moun lumuti lichugúniwa luéigiñe plataforma, lubaragiñe lira, mosu lichugúniwa le ñein lubéi lichaahóua awisahani. Anhein lóuguabei lubéi dan lun lichugún sun awisahani o lun taliihóun gárada, lamuriahaba alidihati adamuridaguni hama íbirigu ha gafanranbaña lidan fánreinti “Wabagari keisi kristiánugu” lun hachatiruni hayanun (ariha huméi párafu 16 luma 19). Lagumuchuba adamuridaguni le lau uremu luma furíei.

LICHUGÚN DǗGÜDAGUAÜ LUMA ADUNDEHANI

18. Lárigiñe líchuguni kada gürigia fánreinti le atokarubei lun, layusuruba alidihati adamuridaguni kéiburi aban minutu lun lichugún dǘgüdaguaü lun gürigia ligía luma adundehani luáguti puntu le ídanbei lawadigimarida. Danme le lariñaguni alidihati adamuridaguni kaba lan íbiri ásügüra íchigei liyanun, mariñagun lubéi ka lan puntu ídanbei lawadigimarida íbiri ligía. Dánmeti lásurun líchuguni liyanun, lariñagubei alidihati adamuridaguni lun gürigia ligía buidu lan ladügüni ani gayaraahalime lariñaguni ka lan puntu ídanbei lawadigimarida luma ka lan uagu buidu lubéi ladügüni o lariñaguni lun lau ínsiñehabuni ka lan uagu buídubei lubéi lun láfaagun lun buídutima lan ladügüni ani ida luba lan libihini. Gayaraati giñe líridun alidihati adamuridaguni somu katei lídangiñeti yanu ligía le uágubei lasaminara gayaraabei lan lahuudun lun aturiahati o houn lílana damuriguaü. Lárigiñe, danme le ua hamá amu gürigia aganbahaña, lárigiñe lan yebe adamuridaguni o lidan amu ókaasion, gayaraabei layusuruni alidihati adamuridaguni ariñahani le tídanbei garüdia Laulá ínsiñeni wadüga disipulugu, garüdia Haliihan luma harufudahan, o le tídanbei líburu Benefíciese lun líchugun amu burí adundehani lun aturiahati luáguti lan yebe puntu le ídanbei lawadigimarida o luagu amu katei. (Lúntima gunfuranda humani ka lan lidasinbei Adundehati espechaliti luma Alidihati adamuridaguni, ariha huméi burí párafu 19, 24 luma 25.

LIDURA

19. Moun lumuti lásügürün ni aban luéi dan le ichugúbei lun (ni íbini alidihati adamuridaguni). Íbini ariñawagúa lan lidan ubanaü Le lunbei ladügǘniwa lidan adamuridaguni átiribei lan lidura kada fánreinti, mama mosu hachawaraguagüdüni hiyanun anhaün ibiha hafuranguagüdüni ariñahani le yuubei hun lubaragiñe lagunfulirun dan le ichugúbei hun. Ánhaña ásügüra íbirigu lídangiñe dan le lunbei ladurarun hayanun, líchuguba Alidihati adamuridaguni o Adundehati espechaliti adundehani houn danme hábuguarügü hamá (ariha huméi párafu 24 luma 25). Laduraruba sun adamuridaguni 1 oura 45 minutu, uremu luma furíei laganagua.

BISIDA LANI ÓUNIGIRUTI SIRKUITU

20. Danme le labisidahani óunigiruti sirkuitu damuriguaü, ladügǘba adamuridaguni le kei lariñawagún lidan ubanaü Le lunbei ladügǘniwa lidan adamuridaguni Habagari Kristiánugu luma Heseriwidun, luéidigia “Taturiahóun Bíbülia lidan damuriguaü”, ligíarügübei makutihóun lugundun, leweñegua, líchuguba óunigiruti sirkuitu aban yanu lánina eseriwiduni le lunbei ladurarun 30 minutu. Lubaragiñe lichugúniwa yanu le, láguyuguagüdübei alidihati adamuridaguni ariñahani le akutihóubei lidan adamuridaguni weyu ligía, ayanuha ligíame murusunraü luagu le lunbei lakutihóun leweñegua dimaasu, ruleime awisahani le mégeiwabei o laliihanu gárada burí to siñaboun tigirún lubá amu weyu, ábameti lagunbirahani óunigiruti sirkuitu íchigei liyanun. Lárigiñe yanu le, lagunbirahabaña óunigiruti sirkuitu lílana damuriguaü lun heremuhani lagumuhóun uremu le lanúadirubei ani gayaraati lamuriahan luma amu íbiri lun ladügüni furíei. Másügürünbaña íbirigu íchiga yanu tidan amu lasali lidan iñeñein le hayanuhabei lílana damuriguaü danme le labisidahaniña óunigiruti sirkuitu. Ánhañati lílana sétanu ha adügübalin hadamuridagun lidan amu iñeñein, gayaraabei hasigirun adügei hadamuridagun lidan libiaman lasali, íbini labisidahañein lan óunigiruti sirkuitu damuriguaü le arihibei hau. Gama lumoun, mosu hagiribudun lílana sétanu ligía lidoun furumiñeti lasali lun haganbuni yanu le lunbei líchuguni óunigiruti sirkuitu houn lílana damuriguaü.

DIMAASU LE ÍDANTI LADÜGǗWA ADAMURINI

21. Úabei adamuridaguni lidan damuriguaü lidan dimaasu le ídanti ladügǘwa adamurini. Hakutihabei lílana damuriguaü ariñahani le lunbei lakutihóun dimaasu ligía hábuguarügü o hama haduheñu.

DIMAASU LE LÁNINA ARITAGUAGÜLEI

22. Anhein éiguada luéyuri Aritaguagülei labadinagua dimaasu, madügǘnwabei adamuridaguni Habagari Kristiánugu luma Heseriwidun.

ARIHITI LAU ADAMURIDAGUNI HABAGARI KRISTIÁNUGU LUMA HESERIWIDUN

23. Arihiti lau adamuridaguni Habagari Kristiánugu luma Heseriwidun, liña laguarún lun wéiyaali lidan afiñeni le hanúadirubei ha híbiri wéiyaaña lun ligía lan ariha lau ladügǘniwa sun katei keisi lubudubu lidan adamuridaguni le, según adundehani le ichugúbei tidan dugumedu to. Lunti ayanugu lan arihiti lau adamuridaguni luma íbiri le eseriwidubei keisi Adundehati espechaliti. Keime táfuridun ubanaü Le lunbei ladügǘniwa lidan adamuridaguni Habagari Kristiánugu luma Heseriwidun, lanúadirubaña alidihati adamuridaguni sun ha lúnbaña gafanran hamá lidan adamuridaguni le luagu bián hati. Laganagua burí dasi le lunbei lafanreinhani, anihein le lunbei híchuguni aturiahatiña luma le lunbei híchuguni íbirigu ha hanúadirubaña wéiyaaña lidan afiñeni lun lan yebe heseriwidun kei alidihati adamuridaguni o lun híchuguni le líbiri fánreinti (ariha huméi párafu 3-16 luma 24). Danme le hanuadirún sun ha lúnbaña gafanran hamá lidan adamuridaguni, mosu gabarounwa lan harumudiri gürigia hagía, hasubudin luma iyaraani le hawagubei lun hayanuhan lau ichouruni luagu ariñahani le lunbei latokarun houn. Mosu hawisarúniwa ha lúnbaña gafanran hamá lidan adamuridaguni, le lagumuhóun litarün, ǘrüwa dimaasu lubaragiñe. Mosu lederegerún Ubanaü lau fánreinti le lunbei híchuguni lidan adamuridaguni Habagari Kristiánugu luma Heseriwidun (S-89) houn ha lúnbaña gafanran hamá lidan fánreinti le ichugúbei houn aturiahatiña. Mosu giñe lichugún programa dayarügubei ñein lubéi lichaahóua awisahani. Gayaraati hanúadirun wéiyaaña lidan afiñeni aban wéiyaali o ídehati lidan damuriguaü lun líderaguni íbiri le; lau sun lira, wéiyaañarügübaña lidan afiñeni íridaña ha lúnbaña híchuguni dasi le mámabei hani aturiahatiña.

ALIDIHATI ADAMURIDAGUNI HABAGARI KRISTIÁNUGU LUMA HESERIWIDUN

24. Ñeinbei aban wéiyaali lidan afiñeni eseriwiduti kei alidihati adamuridaguni Habagari Kristiánugu luma Heseriwidun kada dimaasu (anhein mibe habéi wéiyaaña lidan afiñeni lidan damuriguaü, gayaraati hayusurún ídehatiña lidan damuriguaü ha aransetiña buidu). Ligíaba aranserei Dimurei burí lánina ebelaagülei luma Dimurei burí lánina lagumuchun adamuridaguni. Ligíaba ariñagei kaba lan ásügüra íchiga yanu lidan kada aban lídangiñe fánreinti le lídanbei adamuridaguni le ani anhein mibe habéi wéiyaaña lidan afiñeni, líchuguba giñe amu burí fánreinti, dántima le arihúarügübei lan aban bidéu. Mosu mibe lan lariñagun lárigiñe kada yanu. Wéiyaañaba lidan afiñeni anúadirei ka lan hádangiñe aransebei buidu lun lagunfulirun lau wadagimanu le. Hagunfuliruba wéiyaaña lidan afiñeni ha anuadirúbaña lau dasi le kada átiri dan. Segunme harihin wéiyaaña lun, gayaraabei gabügürüguatima lan lichugún lidasin alidihati adamuridaguni lun wéiyaali le eseriwidubei kei arihiti lau adamuridaguni sügǘ lau houn ha híbiri wéiyaaña. Liibe-agei dan, anhein gayara lubéi ladundehani aban wéiyaali lidan afiñeni “Taturiahóun Bíbülia lidan damuriguaü”, gayaraati giñe leseriwidun kei alidihati adamuridaguni. Íbini ítara, lunti gabaroun humani mosu lan gayaraagua lan íbiri le eseriwidubei kei alidihati adamuridaguni lungua lun líchugun dǘgüdaguaü houn ha gafanranbaña lidan adamuridaguni luma líchugun adundehani houn lau ínsiñehabuni. Ligía giñe lunbei lachoururuni lidan lan dan lagumucha adamuridaguni (ariha huméi párafu 17 luma 19). Anhein busén alidihati adamuridaguni ani anihein ubaraü luagu plataforma, gayaraati lichugúniwa amu mikürófonu le rara umuti ñein gayara láamuga layusuruni lun lariñaguni kaba lan íchigei le aban yanu sunme aniha lan íbiri ligía esetiragua lungua lidan fulasu le ñéingiñeba lubéi líchigei liyanun. O gayaraati lañuurun alidihati adamuridaguni luagu aban haláü ligibugiñe aban dábula luagu plataforma sunme taliihóuña lan Bíbülia o lichugúña lan fánreinti lánina adamuridaguni “Garufudahadi wamá”. Lídehaba lira lun meferidirúniwa lan dan.

ADUNDEHATI ESPECHALITI

25. Anhein gayara, lunti lichugún dasi le lun aban wéiyaali lidan afiñeni le gíchigaditi yanu. Danme mégeiwa lan, ligíaba íchiga adundehani houn wéiyaaña lidan afiñeni luma houn ídehatiña lidan damuriguaü, danme le hábuguarügü hamá, libügürü furumiñeguarügü fánreinti le híchugun luéigiñe plataforma, dandu le híchugubei lidan adamuridaguni Habagari Kristiánugu luma Heseriwidun kei dan le híchugun yanu houn sun gürigia luma dan le hadundehani Taturiahóun Garüdia Awisahatu o “Taturiahóun Bíbülia lidan damuriguaü”, ítara kei houn ha aliihabaña (ariha huméi párafu 19). Anhein gibe habéi wéiyaaña lidan afiñeni lidan damuriguaü ha gíchigaditiña yanu ani garufudahaditiña, gayaraabei lasansirúniwa wéiyaali le agunfulirubei lau wadagimanu le sagü irumu. Mama mosu líchugun íbiri le adundehani sagü líchugun aban wéiyaali lidan afiñeni o ídehati lidan damuriguaü yanu.

AMU BURÍ RUMU TUN LESKUELA

26. Según hiibe íbirigu ha gayaraabei gafanran hamá lidan adamuridaguni, gayaraati ladireirúniwa burí amu lasali tidan Luban Adamuridaguni lun híchuguni íbirigu hayanun. Lunti ñeinbei lan aban íbiri le aranseti buidu lun líchugun adundehani, buídutimati lun aban lan wéiyaali lidan afiñeni. Anhein emegeirúa, gayaraati giñe layusurún aban ídehati lidan damuriguaü le aranseti buidu. Wéiyaañaba lidan afiñeni anúadiraña íbirigu ha lúnbaña hadügüni wadagimanu le ani anhein hasansirúba lubéi kada átiri dan. Mosu hafalaruni íbirigu ha adundehani le lídanbei párafu 18. Hásügürüba aturiahatiña íchigei hayanun tidan amu lasali danme lásurun fánreinti “Darí wamá pérüla lánina lichú aau”, le lábugiñebei “Arufudahani gebegiti tídangiñeti Bíbülia”. Mosu hagiribudun hárigoun danme lagumuchun líchuguni le lagumuhóun hádangiñe liyanun.

BIDÉU

27. Larihúba burí bidéu lidan adamuridaguni le labadinaguabei dimaasu ani gayaraati larihíniwa o larariragüdüniwa lídangiñe JW Library® tidoun konputadora o gágamuru.

S-38-GRF 11/23