Tíderagubadiwa Leskuela Kristiánu lánina Apurichihani, irumu 2015 lun buídutima lan warufudahan

¹ Ariñagati abürühati Sálumu, Dawidi: “Buidulá nererun luma nisaminan ligibugiñe bagu, buguya Nabureme le esefurubalina, le naramudaguagüle” (Sal. 19:14). Ítara kei Dawidi, busentiwa giñe gunda lan Heowá lau wererun ani wéiriti lebegi lubuidun chansi le wámabei woun lánina wasubudiragüdüni inarüni, dandu lidan damuriguaü kei lidan apurichihani. Leskuela Kristiána lánina Apurichihani ábanbei lídangiñe katei le layusurubei Heowá lun larufudahan woun ida luba lan wagunfuliruni wani ministeriu. Adügǘwatu leskuela to kada dimaasu lidan lóugiñe 111,000 damuriguaü lidan sun ubóu. Íderaguaaru leskuela to íbirigu, dandu wügüriña kei würiña ha lídangiñetiña sun fulasu ubouagu ani ha ámuñegueinarügüti gádantiña, lun minisigu hamá ha apurichihatiña uganu buiti luma lun buidu hamá keisi máisturugu lau harufudahan lau inebesei luma ganigi, subudi hameime ida luba lan hachülürün tidoun hanigi gürigia (Adü. 19:8; Kol. 4:6).

² Lidan programa tánina leskuela, irumu 2015, tídangiñeba garüdia Bíbülia ka uganu tídanbei?, Ebelaagülei tun Lererun Bungiu luma tídangiñe líburu Redei humá lidan línsiñehabu Bungiu lasagarúa ariñahani le lunbei lakutihóun. Gidawaali giñe lídangiñe dan le lunbei ladurarun puntu méiniti lídangiñe taliihóun Bíbülia luma lídangiñe lidura yanu númeru 1. Lidan burí párafu le asigirubei, wakutihabei asansiruni burí le, águyuguagüda wameime adundehani le ichugúbei libügürü ida luba lan lichugúniwa kada aban lídangiñe yanu le lunbei lichugúniwa tidan leskuela.

³ Puntu méiniti tídangiñeti Bíbülia. Lichugúba bián minutu lun íbiri le lunbei líchuguni fánreinti le, ayanuha láamuga luagu aban puntu súdiniti ani huuti le ladarirun lídangiñe taliihóun Bíbülia dimaasu ligía. Lun gayara lan ladimurehan luagu aban puntu le huuti houn lílana damuriguaü lidan dan le ichugúbei lun, mosu laranserun buidu. Lárigiñe, kei súnwandan, ligirúba sisi minutu lun híchugun lílana damuriguaü óunabagülei le aduraruti 30 segundu o ǘnabu luéi libügürü somu puntu súdiniti le hadarirubei lidan haliihanu Bíbülia. Lun gayara lan híchugun íbirigu óunabagülei buiti lidan murusunraü dan le, mosu haranserun buidu, gumadigua hagíame houngua lun hadügüni katei kei lubéi. Lahuuduba lira houn kei aban arufudahani, ru ligíame chansi lun gíbetima hamá íbirigu ayanuhatiña luagu puntu le hakutihabei.

⁴ Yanu númeru 1. Ǘrüwarügaali minutu o ménosu lidura taliihóun Bíbülia ani súnwandan kéiburirügübei lan lamidan páhina aliihóua. Mosu hasayahani íbirigu aliihani le atokarubei houn saragu wéiyaasu lau umalali héreti, teni hagíame lun híriduni dimurei buidu luma lun haliihan lau fararaguaü, gunfurandawa láamuga le hariñagubei buidu. Sun gefentiña luagu Heowá, mosu wáfaagun lun galiihadi wamá lugundun gúnfuliti aliihani aban gárada súdinitu lidan wáhuduragun lun Bungiu. Chóuruti weiri lan wagundan lau warihin gibe hamá irahüñü galiihaditiña lidan damuriguaü. Ani yuuti lun wariñagun houn agübürigu ha áfaagubaña, lau ínsiñehabuni, lun híderaguniña hasaanigu lun galiihadi hamá luagu buidu lan hadüga.

⁵ Yanu númeru 2. Tarufuduba aban íbiri aban sügǘ le aduraruti seingü minutu. Mosu tayanuhan luagu tema le ichugúbei tun. Danme tídangiñe lan garüdia Ebelaagülei tun Lererun Bungiu lasagarúa yanu, mosu taranseruni ariñahani lidan aban igaburi le ídehati lun harihini lílana damuriguaü ida luba lan hayusuruni lidan fulasu le ñein lubéi hapurichiha. Danme le tídangiñe lan amu agumeiraguagüdüni lasagarúa yanu, lunti tayanuhan luagu tema le ichugúbei tun, anúadirateime bérusu tídangiñeti Bíbülia le buídubei lun. Gayaraati giñe tayusurun amu burí bérusu le gániti luma tema. Lanúadiruboun íbiri le arihibei tau leskuela kaba lan tupaaná.

⁶ Yanu númeru 3. Séingüba minutu lidura yanu le ani gayaraabei líchuguni aban wügüri o aban würi. Danme aban lan íbiri würi íchigei, lunti tíchuguni kei lichugún yanu númeru 2. Danme aban lan íbiri wügüri íchigei, lunti líchuguni ariñahani le asagarúbei tídangiñe amu agumeiraguagüdüni kei aban yanu houn sun gürigia gabarounñuleime le hemegeirubei gürigia ha tídanbaña Luban Wadamuridagun. Lunti layanuhan luagu tema le ichugúbei lun, anúadiraleime bérusu tídangiñeti Bíbülia le buídubei lun.

⁷ Aban iseri ligaburi lichugún yanu númeru 3. Danme le tídangiñe lan garüdia Ebelaagülei tun Lererun Bungiu lasagarúa yanu ani ábanba íbiri wügüri íchigei, lunti ladügüni kamá larufuduña aban sügǘ lidan apurichihani o lidan laturiahan hama liduheñu. Liibe-agei dan, íbiriba le arihibei tau leskuela anúadirei kaba lan lupaaná ani kaba lan sügǘ lánina apurichihani layusura. Lunti ábanbei lan hádangiñe liduheñu o aban íbiri wügüri lídangiñeti damuriguaü íderaguei. Gayaraati giñe layusurun amu burí bérusu le afuranguagüdüti somu adundehani méiniti le gániti luma tema. Ñeinbei dan, lichugún yanu le lun aban wéiyaali lidan afiñeni ani gayaraati lanúadiruni sügǘ lánina apurichihani le labusenrubei layusurun luma kaba lan uma larufudei. Chóuruti líchuguba lan dǘgüdaguaü houn lílana damuriguaü harihin aban wéiyaali lidan afiñeni arufudei larufudahadi luma aban hádangiñe liduheñu o luma aban íbiri!

⁸ Adundehani. Lárigiñe líchuguni kada aturiahati liyanun, layusuruba íbiri le arihibei tau leskuela bián minutu lun líchugun dǘgüdaguaü luma somu adundehani huuti tídangiñe Benefíciese de la Escuela del Ministerio Teocrático lun. Danme le lariñaguni íbiri le arihibei tau leskuela kaba lan íbiri ásügüra íchigei liyanun, mariñagun lubéi ka lan idan lawadigimarida lidan luáguti ladimurehóun hagibugiñe gürigia. Lárigiñe kada yanu, lariñaguba íbiri le arihibei tau leskuela dimurei lánina dǘgüdaguaü lun aturiahati, ariñagaleime ka lan buga idan lawadigimarida luma ka lan uagu buidu lubéi lawadigimaridun lidan, afuranguagüdaleime, lau ínsiñehabuni, kaba lan buiti lasagara anhein etenira lun puntu ligía.

⁹ Kei aritaguagülei, hadariruboun lísüta to ñéingiñe lubéi lasagarúa adundehani le lunbei lichugúniwa lun kada aturiahati tidan líburu Benefíciese páh. 79 darí 81. Danme le ru laali aturiahati liyanun, lamakürüboun íbiri le arihibei tau Leskuela liliburun lidan puntu le ídanbei lawadigimarida danme le hábuguarügü hamá, álügüdaleime anhein adüga lubalin wadagimanu le ariñawagúbei lun lidan lagumuchagüle páhina le ñein lubéi puntu ligía. Gayaraati líchugun íbiri le arihibei tau leskuela amu adundehani lun aturiahati lárigiñe adamuridaguni o lidan amu ókaasion. Lunti larihini kada aturiahati adundehani le ichugúbei lun tidan leskuela kei aban lubuidun chansi lun lasigirun awansera lidan leseriwidun lun Bungiu (1 Tim. 4:15).

¹⁰ Anhein ásügüra aturiahati lídangiñe dan le ichugúbei lun, gayaraabei layusurun íbiri le arihibei tau leskuela o le ídehabei luma somu katei, kéiburi aban liraüraü raüwa o lakaünhan luagu somu katei lun ladüraaguni, lau aban lubuidun igaburi, subudigüda láamugei lun sügüha lan lídangiñe dan le ichugúbei lun. Lunti gunfuranda lani aturiahati seini le ichugúbei lun, lagumuchuni laini dimurei le lariñagubei, ábameti lararirun luéigiñe plataforma (ariha humóun líburu Benefíciese páh. 282, pár. 4).

¹¹ Amisurahóuatiña sun ha gúnfulihañabaña lau sun le mégeiwabei lun habürüdǘniwa tidan Leskuela Kristiánu lánina Apurichihani, lun hadügüni (ariha humóun líburu Benefíciese páh. 282, pár. 6). Adügaali adundehani le ichugúbei tidan leskuela to lun hafurendeirun lumutuniña Bungiu ayanuha luma arufudaha luagu uganu buiti le luáguti Larúeihan Bungiu lau ichouruni, ubebeni luma ínsiñehabuni. Ma funa lueirin lugundan Heowá lau alawahani le leresibirubei hámagiñe sun ha furendeihañabaña saragu tídangiñe leskuela kristiánu to! (Sal. 148:12, 13; Isa. 50:4.)