ÁLÜGÜDAHANI BURÍ TUAGU BÍBÜLIA
Ka uagu hénrengu lubéi lun ñein lan darangilaü lidan sun ubóu?
Ábanrügübei arúeihani le gabafuti lun lasansirunu hanigi gürigia gayara lanügün darangilaü ubouagun
Arufudatu Bíbülia ladüga lan bián resun súdiniti. Le furumiñeti, lau sun ibihaaña lan gürigia óunwenbu burí awanseruni ubouagu, mama lun wadundehani wabagari wadügǘwa. Le libiaman, ladüga “lábugiñeñanu [lan] lubafu Mafia sun ha lánigubaña ubóu”. Ligía mibihingiña lubéi gürigia hanügün darangilaü ubouagun. (Aliiha huméi Heremíasi 10:23 luma 1 Huan 5:19.)
Kei hawouguounrügüñein lan gürigia hasaminara ani memenihabutiña, wéiriti giñe leberesehani lira lun ñein lan darangilaü ubouagu. Mégeiwati ábanrügü lan arúeihani ubouagu le arufudahati houn lílana lun hínsiñehabu hamá luma lun hasaminarun luagu le buídubei houn ha híbiri, lun gayara lan ñein lan darangilaü ubouagu. (Aliiha huméi Isaíasi 32:17 luma 48:18, 22.)
Kaba anüga darangilaü ubouagun?
Füramase haali Bungiu le suntigabafu lagidarubei lan sun arúeihani le ubouagubei lun líchugun ábanrügü arúeihani lun lagumadiruniña sun gürigia (Danieli 2:44). Hesusu, le Liráü Bungiu, le unbei tagúara Bíbülia “Lurúeite Darangilaü” ligíaba urúei lidan arúeihani ligía. Lagidarubei sun wuribani ubouagugiñe ani larufudahabei lémeri darangilaü houn gürigia. (Aliiha huméi Isaíasi 9:6, 7 luma 11:4, 9.)
Uguñe weyu, añaheinhaña míñunu gürigia arufudaha houn amu awinwanda lidan darangilaü hama gürigia háledi, lábugiñe ladundehan Kristu luma lau tídehan Bíbülia. Yarafa madise ñeinbei darangilaü lidan sun ubóu. (Aliiha huméi Isaíasi 2:3, 4 luma 54:13.)