Iseri lílana Sétanu le Arihibei lau Hawadigimari Gefentiña luagu Heowá lidan sun Ubóu

Luagu-ǘrüwa binaafin, weyu seingü lidan nefu-hati irumu 2012, wisawatiña familia Beteli ha Merigabaña hama ha Kanadábaña luagu lúmagiñe buga weyu 1 lidan hati ligía aniheinhali lan aban iseri lílana Sétanu le Arihibei lau Hawadigimari Gefentiña luagu Heowá lidan sun Ubóu, íbiri Mark Sanderson.

Kristiánugu lagübürigu íbiri Sanderson, San Diego laweirida (California, Meriga), badiseiwati 9 lidan bián-hati irumu 1975. Gumeseti eseriwida kei prekusoru Saskatchewan (Kanadá), 1 lidan nefu-hati irumu 1983. Lidan duusu-hati irumu 1990 ligía leresibihan lídangiñe lisedün külase tani Leskuela to Aransehabaliña íbirigu lun aban Ministeriu Espechaliti (to subudiwaboun uguñe weyu kei Leskuela Kristiánu houn Wügüriña Mamarieidungiña) Meriga, ani lidan gádürü-hati irumu 1991, aba lounahóun eseriwida kei prekursoru espechaliti lidan ubouhu le gíribei Terranova (Kanadá). Lárigiñe meha leseriwidun kei le óunigirubalin sirkuitu leweñegua óunigiruti sirkuitu, aba lagunbirahóun eseriwida Betelirugu Kanadá lidan bián-hati irumu 1997. Ñéingiñe lidan unsu-hati irumu 2000, aba lounahóun tidoun sukursali to Merigaboun, ñein lubéi lawadigimarida lidan Departamentu le íchugubei Ariñahani tuagu Háspilati, lárigiñe, nadagimeinti lidan Departamentu lánina Eseriwiduni.

Lidan nefu-hati irumu 2008, ñǘdünti íbiri Sanderson tidan leskuela to gíriboun Leskuela houn Íbirigu ha Arihibaña tau Beteli, lárigiñe aba liridúniwa kei aban hádangiñe Íbirigu ha Arihibaña tau Beteli to lídanboun ageiraü Filipinas. Lidan nefu-hati irumu 2010, ábaya lamisurahóun Merigoun, le ñein lubéi leseriwida kei ídehati lidan Sétanu lánina Eseriwiduni lani Sétanu le Arihibei lau Hawadigimari Gefentiña luagu Heowá lidan sun Ubóu.