Katei san Sétanu le Arihibei lau Hawadigimari Gefentiña luagu Heowá?

Aban liraüraü sétanu hani kristiánugu derebuguhaña adundehabarun lóundarun Heowá lidan ubóu. Wáwati houn Sétanu le Arihibei lau Hawadigimari Gefentiña luagu Heowá. Biámañein wadagimanu hagunfulirun:

• Hagía aransehabalin ariñahani tídangiñeti Bíbülia le áfuachubei tidan burí agumeiraguagüdüni luma le ichugúbei lidan adamuridaguni luma tidan burí leskuela to hadügüboun gefentiña luagu Heowá (Lúkasi 12:42).

• Lun lira, arihatiña lau apurichihani luma lau le adügǘbei lau budagia.

Áyeiha hamutiña lílana Sétanu le Arihibei lau Hawadigimari Gefentiña luagu Heowá apostolugu hama wéiyaaña lidan afiñeni ha meha Herusalénbaña lidan furumiñeti sígulu. Hagía meha anúadirubaña katei súdiniti lidan hiri sun lílana damuriguaü kristiánu (Adügaü 15:2). Mama lílana Sétanu le Arihibei lau Hawadigimari Gefentiña luagu Heowá tábutigubaña wóundarun, ítara kei mama lan meha ábutigu wügüriña úaraguatiña ha meha adundehabaliña kristiánugu lidan furumiñeti sígulu. Súnwandan háluahani tadundehan Bíbülia ani gabaroun hamuti írida laali lan Heowá Hesukrístu keisi lichügüdina damuriguaü (1 Korintuna 11:3; Éfesuna 5:​23).

Kátaña san lílanabaña Sétanu le Arihibei lau Hawadigimari Gefentiña luagu Heowá guentó?

Anihán hiri lílana Sétanu le Arihibei lau Hawadigimari Gefentiña luagu Heowá: Kenneth Cook, isaani, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane luma Jeffrey Winder. Seriwitiña sun hagía tidan Beteli to uburuguboun Warwick (Newayóru).

Ida liña lawadigimaridun Sétanu le Arihibei lau Hawadigimari Gefentiña luagu Heowá?

Fánreinguañu liña Sétanu le Arihibei lau Hawadigimari Gefentiña luagu Heowá lidan sisi sétanu le arihibei luagu ámuñegueinarügü katei le adügǘbei tidan wóundarun. Anihein aban hádangiñe ídeha lidan aban o lóugiñe aban lídangiñe sisi sétanu le.

• Sétanu le Arihibei lau Híderawagun Íbirigu: Lílana sétanu le arihubaña lau luáguti lúrudu ani adüga hamuti le mégeiwabei dan le lasuseredun somu hárabaganali, liñawan dan o katei líbeina lira. Ídehatiña giñe dan le lasuseredun katei le sódiniti o dan le ñein lan turobuli le adügübei lun siñá lan háhuduragun gefentiña luagu Heowá lun Bungiu lau darangilaü.

• Sétanu le Arihibei hau Eseriwidutiña Betelirugu: Lílana sétanu le arihubaña hau íbirigu ha eseriwidubaña Betelirugu o tidan burí hani gefentiña luagu Heowá sukursáli.

• Sétanu le Arihibei tau Agumeiraguagüdüni: Lílana sétanu le arihubaña lau imprimírua tan luma tounahóun agumeiraguagüdüni tídangiñetu Bíbülia. Arihatiña giñe lau tábunawagun luban burí adamuridaguni, áfisi to burí ñein lubéi lásügüragüdüwa lidoun amu iñeñein tuma burí Beteli.

• Sétanu le Arihibei lau Eseriwiduni: Adundeha lumuti sétanu le lapurichihóun “uganu buiti le luáguti larúeihan Bungiu” (Matéu 24:14).

• Sétanu le Arihibei lau Arufudahani: Lílana sétanu le arihubaña lau sun le arufudahóubei lidan burí adamuridaguni, tidan burí leskuela to hadügüboun Gefentiña luma lau burí programa aganbahóuarügüti luma bidéu.

• Sétanu le Arihibei lau Labürühóun Ariñahani: Lílana sétanu le aransehabalin ariñahani le áfuachubei tidan agumeiraguagüdüni tídangiñetu Bíbülia luma lidan wani páhina lánina Internet. Sétanu giñe le arihubei lau wadagimanu lánina lásügürawagüdün lidoun amu iñeñein.

Bóugudin luéi wadagimanu burí le hadügübei lílana Sétanu le Arihibei lau Hawadigimari Gefentiña luagu Heowá lidan burí sétanu le, óundaraguatiña giñe sagü dimaasu lun hayanuhan luagu le mégeiwabei tidan lóundarun Heowá. Lidan adamuridaguni burí le, ariha hamuti le tariñagubei Bíbülia ani ígiratiña lun ladundehaniña lani Bungiu Heowá sífiri sandu. Súnwandan háfaagun lun úara hamá lidan le hanúadirubei (Adügaü 15:25).

Íbirigu ha ídehabaña luma Sétanu le Arihibei lau Hawadigimari Gefentiña luagu Heowá

Lidan kada sétanu le aubei hariha lílana Sétanu le Arihibei lau Hawadigimari Gefentiña luagu Heowá, añahein amu burí kristiánugu úaraguatiña ha subudihabúbaña ani gayaraaguatiña houngua lun hagunfulirun lau wadagimanu le aubei lariha sétanu le ñein habéi (1 Korintuna 4:2). Ñǘdüntiña ídehatiña ha lidan burí adamuridaguni le hadügübei lílana sétanu le sagü dimaasu. Lau sun mama lan hagía anúadirubalin kaba lan adügǘwa, ariñaga hamuti le hasaminarubei, ru hagía ariñahani huuti luagu le ariñawagúbei, gúnfulitiña lau le hanúadirubei lílana sétanu ligía ani ariha haméi anhein buidu lubéi lasalirun le anuadirúbei. Gayaraati giñe hamuriahan lílana Sétanu le Arihibei lau Hawadigimari Gefentiña luagu Heowá, hama ídehatiña ha lun houdin abisidahaña Gefentiña ha lídanbaña amu burí fulasu ubouagu o lun gafanran hamá lidan burí programa espechaliti, kéiburi adamuridaguni irumu-auti luma eresibihani tídangiñe Leskuela Galaadü.