Tani Watchtower LÍBURU-AGEI LIDAN INTERNET
Watchtower
LÍBURU-AGEI LIDAN INTERNET
Garifuna
Ǘ
  • á
  • Á
  • é
  • É
  • í
  • Í
  • ó
  • Ó
  • ú
  • Ú
  • ü
  • Ü
  • ǘ
  • Ǘ
  • Ñ
  • ñ
  • BÍBÜLIA
  • AGUMEIRAGUAGÜDÜNI
  • ADAMURIDAGUNI
  • w13 1/11 páh. 4-5
  • Iyeeni le adügübei lun masubudirúniwa lan Bungiu

Úati bidéu lidan fánreinti le.

Sarí wamuti, anihein mégeiti, siñati larihíniwa bidéu.

  • Iyeeni le adügübei lun masubudirúniwa lan Bungiu
  • Garüdia Atalaya Tasubudiragüdüñein Larúeihan Heowá 2013
Garüdia Atalaya Tasubudiragüdüñein Larúeihan Heowá 2013
w13 1/11 páh. 4-5

TÍTULU LE LUÁGUBEI TIDÁÜ: IYEENI BURÍ LE ADISEDAGÜDÜBALIWA LUÉI BUNGIU

Iyeeni le adügübei lun masubudirúniwa lan Bungiu

LE HARIÑAGUBEI GÜRIGIA

Ariñagatu dimurei-agei Akal crítico de Teología: “Ibidiñewati ida liña lan, gama lumoun dimurei Trinidad mini lan ábanrügü Bungiu hau ǘrüwa gürigia lidan, Úguchili, Irahü luma Sífiri Sandu”. Ani ariñagatu Diccionario abreviado del cristianismo: “Sigí hamuti giñe Katóliku, ortodoxos, anglicanos hama protestantes ligiaméme arufudahani”.

LE TARUFUDAHABEI BÍBÜLIA

Mariñagunti Hesusu, le Liráü Bugiu, ni aban wéiyaasu luagu ligía guánarügü lan Búngiubei. Lubaragiñe lira, ariñagati: “Néibuga [...] lumoun Núguchi, ladüga ligía íñugutimati nuéi” (Huan 14:28). Ani ariñagati lun aban hádangiñe lánigu disipulu: “Néibuga [...] le ñeinhin lubéi Núguchi, le giñe Húguchi, Nubungiute le giñe Hubungiute” (Huan 20:17).

Mama aban gürigia sífiri sandu. “Aba habuinchun [furumiñetiña kristiánugu] lau [s]ífiri [s]andu”, ani aba meha lariñagun Heowá: “Nóunahabei nani [s]ífiri hawagun sun gürigia” (Adügaü 2:1-4, 17). Lubafu Bungiu sífiri sándubei, mama aban fánreinti lídangiñe aban Bungiu ǘrüwaguati.

KA UAGU LUNTI LUBÉI HASUBUDIRUNI

Según aturiahatiña Bíbülia ha katóliku Karl Rahner luma Herbert Vorgrimler, masubudirúnwati hamuga luáguti Trinidad “lun hamuga ua lan aban arufudúni, ani íbini lárigiñe arufudúni, úamemegili gunfurandawa lan buidu”. Gayarati san wasandirun ínsiñeni luagu aban gürigia le siñati wasubudiruni ni lun gunfuranda wamani? Uá. Ligía ladügünbei arufudahani le lun siñá lan línsiñedun Bungiu woun.

Marco, wügüri le uágubei wayanuha lidan furumiñeti arütíkulu, ariha lumuti meha Trinidad kei aban katei le adügübei lun siñá lan lachülürün lumoun Bungiu. Ariñagati: “Saminatina meha laramuduñein lan Bungiu káteiñein lan, ani adügati meha le lun masubudirúniwa lan ani machülürǘniwa ligía lumoun.” Gama lumoun, “Bungiu aban Bungiu lánina darangilaü, mama lánina chagaguaü” (1 Korintuna 14:33). Maramudun lumuti Bungiu káteiñein lan, arufudarügü lumuti woun káteinñein lan. Ariñagati Hesusu: “Wagía, subudi wamuti ka lan un wáhuduragua” (Huan 4:22).

Sigiti Marco ariñaga: “Dan le nasubudirunbalin luagu mama lan ǘrüwañanu gürigia lidan aban Bungiu, ligíaali meha gayara lan nadügün aban umadaguaü luma”. Anhein wariha Heowá kei aban gürigia, mama kei aban katei le siñati gunfurandawa lan, ménrenguntimabei woun wasandirun ínsiñeni luagu. Arufudahatu Bíbülia: “Le mínsiñehabuti, ibidiñegili Bungiu lun, lugundun ínsiñeni Bungiu” (1 Huan 4:8).

    Garifuna | Biblioteca en Línea (2009-2025)
    Áfurida lídangiñe sesióun
    Agumesera sesióun
    • Garifuna
    • afanreinha huméi
    • Ligaburi larihín
    • Copyright © 2025 Watch Tower Bible and Tract Society of Pennsylvania
    • Ida luba layusurún
    • Wani polítika
    • Laranserawagún dátosu
    • JW.ORG
    • Agumesera sesióun
    afanreinha huméi