ÁLÜGÜDAHANI BURÍ TUAGU BÍBÜLIA
Ka san ñǘdünbaña sielun ani kaba hadüga ñein?
Busentiña saragu míñunu gürigia houdin sielun danme le hóunwegun. Ariñagati meha Hesusu ñeinba lan hawinwanda lánigu apostolu ha úaraguatiña. Lubaragiñe lounwen, füramaseti laransehaba lan ubaraü habá lun luma hamá Lúguchi. (Aliiha huméi Huan 14:2.)
Ka uagu ñéinbaña lubéi gürigia águyugutiña sielu? Kaba hadüga ñein? Ariñagati meha Hesusu houn lánigu apostolu urúeigubaña lan, ani hagumadihaba lan ligibuagu Ubóu. (Aliiha huméi Lúkasi 22:28-30 luma Arufudúni 5:10.)
Inarüni san hóudinba lan sun gürigia ha buídubaña sielun?
Ítara kei murusunrügüñanu lan gürigia arúeiha lidan aban ageiraü, murusunrügübaña giñe gürigia arúeiha ubouagu, hárügübaña lanúadirubaña Hesusu lun háguyugun sielu (Lúkasi 12:32). Ariñaga tumuti Bíbülia átiriñanu lan. (Aliiha huméi Arufudúni 14:1.)
Aranseeli Hesusu aban ubaraü sielu houn lani disipulugu. Subuditi san hun kaba lan hadüga ñein?
Íbini hagíarügübaña lan ñüdün sielun, mámarügüñanu hagía ibiha aban emenigini buiti. Ha gaganbaditiña lun lugumadin Hesusu gayarabei hawinwandun lun súnwandan lidan aban paraísu ubouagu (Huan 3:16). Ñéinbaña awinwandutiña lidan paraísu ligía ladüga hásügürüba lan lau ibagari lárigiñe lagünrinchawagun ubóu wuribati le, hama amu ha lúnbaña háguyugun ñein. (Aliiha huméi Sálumu 37:29 luma Huan 5:28, 29.)