Álügüdahani burí tuagu Bíbülia
Kaba ladüga Hesusu ámuñegü?
Lidan irumu 33 lidan wadaani, hilati Hesusu, águyuguati ani aba lidin sielun. Saragu sígulu lárigiñe, aba liridún urúeime (Danieli 7:13, 14). Ámuñegü, lanügüba darangilaü lun Ubóu ani ábame lagumuchun lau gudemei. (Aliiha huméi Sálumu 72:7, 8, 13.)
Lábugiñe larúeihan Hesusu úaalime marichaü ubouagu
Ladügüba Hesusu saragu katei buíduburiti danme le larúeihani Ubóu. Layusurubei ubafu le líchugubei Lúguchi lun lun lagiribudagüdüni ibagari sin figóu houn sun gürigia. Sun gürigia hagundaaruba lau ibagari ubouagu, maweiyadunbaña ani móunwegun hagíame. (Aliiha huméi Huan 5:26-29 luma 1 Korintuna 15:25, 26.)
Ka ladügübei Hesusu guentó?
Ladundehañein Hesusu wadagimanu lánina apurichihani le hadügübei lani disipulugu lidan sun ubóu. Bisida hamutiña gürigia lun harufuduni houn ka lan tariñagubei Bíbülia luagu Larúeihan Bungiu. Ariñagati meha Hesusu líderagubaña lan lani disipulugu darime lun lachülürün oura lun lagidaruniña sun urúeigu ubouaguna. (Aliiha huméi Matéu 24:14 luma 28:19, 20.)
Yusu lumuti Hesusu damuriguaü kristiánu lun larufudahan houn gürigia ida luba lan habuiduragüdüni habagari. Lasigiruba giñe adundehaña danme le lagünrinchawagun ubóu le luma danme le lachülürün paraísu le füramase lubéi Bungiu. (Aliiha huméi 2 Féduru 3:7, 13 luma Arufudúni 7:17.)