ÁLÜGÜDAHANI BURÍ TUAGU BÍBÜLIA

Ida liña san Bungiu?

Aban sífiri marihúaditi Bungiu. Ligía adügübalin sielu, Ubóu luma sun le gabagaribei. Úati adügüti Bungiu; magumesehati (Sálumu 90:2). Busenti Bungiu lun háluahani gürigia luma lun hasubudiruni inarüni luagu. (Aliiha huméi Adügaü 17:24-27.)

Gíriti Bungiu, ani gayarati wasubudirun fiú lídangiñe ligaburi lau warihini katei burí le ladügübei (Rómana 1:20). Gama lumoun lun wasubudiruni buidu, mosu waturiahanu Bíbülia, to Lererun. Ítara luba wasubudiruni lubuidun ligaburi. (Aliiha huméi Sálumu 103:7-10.)

Ka lasandirubei Bungiu dan le larihin marichaü?

Iyereeguti marichaü lun Heowá ani adüga lumuti gürigia lun larufuduni ligaburi (2 Lúrudu 25:16). Ligía hibe-agei lubéi gürigia iyereeguti marichaü houn. Sun marichaü le geyegubei wau, mama ladüga Bungiu. Ruti Bungiu líbürei houn gürigia lun desidírü hamá houngua kaba lan hadüga. Híruti gibe hamá ayusuruti líbürei lun hadügün marichaü. Gáriti lun Heowá dan le larihini lasuseredun katei le. (Aliiha huméi Agumesehani 6:5, 6 luma 2 Lúrudu 32:4, 5.)

Hínsiñeti irichaü lun Heowá, ligíati mígirubei lun ñein lan wuribani lun sun dan (Sálumu 37:28, 29). Füramasetu Bíbülia luagu málübei lan agumucha lau marichaü. (Aliiha huméi 2 Féduru 3:7-9, 13.)