Ida luba wóunabun dan le wouserún lau marichaü?

1, 2. Ida liña hóunabun saragu gürigia dan le harihin amu ouserúa lau marichaü, ani ka álügüdahani gayaraabei wadügüni wóuniwagua?

LIDAN ubóu le, ouserúatiña saragu gürigia lau marichaü. Másiñati ladüga lan gudeme hamá, ladüga ligaburi haríawagun, hechun, fulasu le ñein lubéi haweirida, harasan o ladüga amu burí katei. Lanwoun lira, añahein gumadimatiña o taburiña bísinisi ha adügübaña katei meberesenga damichi le gayaraabei hadügün dandu houn gürigia kei lun ubóu. Marichaü kéiburi le o amu burí, adügaali lun wasufurirun o lun lasufurirun aban gürigia le wasubudiragun.

² Inarüni, sun lan wagía busentiwa wawinwandun lidan darangilaü luma lun buidu lan wouserún. Ligíati aba lubéi hagañidun saragu gürigia dan le harihin houserún amu lau marichaü. Añahein fiu gürigia aba hóundarun hama ha ageindagubaña luagu haricha amu ladüga busén hamá hasansiruni ligaburi léibugun katei. Añahein amu, aba hóundarun hama ha amarücharubaña luma hamoun polítiku ha ariñagubaña hageindaguba lan luéigiñe haricha gürigia. Gama lumoun, wagía kristiánugu subudi wamuti moun lumuti lan wádaragun woungua lidoun katei lánina ubóu le, ladüga ‘mama lan lani ubóu wagía’ (Huan 17:16). Subudi wamuti giñe lagumuchuba lan Larúeihan Bungiu lau sun marichaü le yaabei ubouagu. Lau sun lira, gáriti woun ani gáñigüda lumutiwa warihin gürigia asufurira marichaü. Másiñati wálügüdagun woungua: “Ka lunbei nadügüni? Anihein funa san somu katei le gayaraabei nadügüni guentó lun nídehan lun labuidurun katei?”. Lidan aturiahani le wóunabubei bián álügüdahani le. Furumiñe, warihubei ka lan lasandirubei Heowá luma Hesusu dan le harihiniña gürigia ouserúa lau marichaü.

IYEEREGUTI MARICHAÜ LUN HEOWÁ LUMA LUN HESUSU

3. Ka uagu wagañida dan le warihin amu gürigia asufurira marichaü? (Isaíasi 5:7).

³ Ariñagatu Bíbülia hínsiñe lan katei “le richabei luma le úaraguabei” lun Heowá. Keiti lenege guánarügü lubéi ladügawa, ligía iyereegu lubéi marichaü woun (Sal. 33:5; Agu. 1:26). Maweiyasunbei Heowá óusera lau marichaü, mabusenrunti giñe lun wóuserun lau marichaü (2 Lur. 32:​3, 4; Mik. 6:8; Sak. 7:9). Kei hénpulu, lidan lidaani profeta Isaíasi, aganba lumuti Heowá “agúarahani lánina igarigu” le hadügübei ísüraelina ha asufurirubaña háhaburugun ísüraelina háledigu (aliiha huméi Isaíasi 5:7). Bei lumutiña gürigia ha maganbadibaña lun Lilurudun ani óusera hamaña ha híbiri lau marichaü (Isa. 5:​5, 13).

4. Ka wafurendeirubei luagu Hesusu lídangiñe abahüdaguni luáguti wügüri le hilaalibei aban lúhabu? (Ariha huméi giñe dibuhu).

⁴ Ítara kei Heowá, hínsiñeti giñe irichaü lun Hesusu ani iyereeguti marichaü lun. Samina wamá luagu le asuseredubei dan meha le ya lubéi ubouagu. Aban weyu, aba larihin aban wügüri le hilaalibei aban lúhabu. Aba lagudemedagun lun ani aba lareidaguagüdüni. Gama lumoun, dan le harihinbalin tábutigu ligilisi le ladügübei Hesusu, aba hagañidun. Súdinitimati houn wügüriña hagía lagunfulirúniwa lau Lilurudun Moisesi sügǘ lau liderawagúniwa aban gürigia le asufurirubei. Dan le larihini Hesusu luriban hagaburi “ábati laríaguniña [ . . . ] lau igañi luma íruni ladüga tidere hanigi” (Mar. 3:​1-6).

5. Ka lunbei waritaguni dan le wagañidun ladüga warihin louserúniwa somu gürigia lau marichaü?

⁵ Dan le louserún aban gürigia lau marichaü, aba lagañidun Heowá, aba giñe lagañidun Hesusu, ligía mariban lubéi wagañidun dan le warihin aban katei ítarati (Efe. 4:26). Gabaroun waméi íbini lan garicha wamá lun wagañidun, magida lubéi igañi ligía marichaü le hasufurirubei gürigia. Haritagua waméi giñe, ánhawa lan asandira igañi luagu saragu dan, gayaraabei wagadeiruni wátuadi (Sal. 37:​1, 8; Sant. 1:20). Ligíati, akutiha waméi le ladügübei Hesusu lun wasubudiruni ida luba lan wóunabun dan le warihin louserún aban gürigia lau marichaü.

LIGABURI LÓUNABUN HESUSU DAN LE LARIHIN MARICHAÜ

6. Ka marichaü larihubei Hesusu dan meha le ya lubéi ubouagu? (Ariha huméi giñe dibuhu).

⁶ Dan meha le ya lubéi Hesusu ubouagu, arihati meha saragu marichaü. Kei hénpulu, subudi lumuti meha Hesusu ru hamá tábutigu relihión lidere dan houn gürigia lau híchugun saragu lúrudu houn le hénrenguti lagunfulirúniwa lau (Mat. 23:​2-4). Subudi lumuti meha giñe wuriba lan hóuseruniña gumadimatiña rómana gürigia. Añahein meha saragu huríu ha busenbaña hesefurun luéi habafu rómana, ani añahein meha fiu hádangiñe ha óundarubaña lidoun sétanu le unbei laguarúa selotes, ha ageindagubaña hama rómana. Lau sun lira, mídinti Hesusu luéigiñe lóubadina ni aban lídangiñe sétanu ligía. Dan le líchugunbei fe busén hamá gürigia hadügüni urúeime, lau lóufudagun aba lidin ñéingiñe (Huan 6:15).

7, 8. Ka uagu málugun lubéi meha Hesusu lagumuchun lau marichaü le lídanbei lidaani? (Huan 18:36).

⁷ Mádaragunti meha Hesusu lungua lidoun polítika lun lálugun lagumuchun lau marichaü le meha lídanbei lidaani. Ka uagu? Ladüga subudi lani ua lan yu lan houn gürigia hagidaruni marichaü ubouagugiñe ani mabafutiña giñe lun hagidaruni (Sal. 146:3; Her. 10:23). Ani mabafutiña giñe lun hagidaruni lébuna marichaü le ubouagubei. Luagu aban oubaü, lábugiñeñein lubafu Satanási ubóu le ani yusu lumuti ubafu ligía lun ladügün lun furunde hamá gürigia kei ligía (Huan 8:44; Efe. 2:2). Luéigiñe le aban oubaü, lau sun busén wamá wóuserun lau irichaü, anihein dan adüga lan figóu le galagante wabéi lun wóuserun lau marichaü (Apur. 7:20).

⁸ Subudi lumuti meha Hesusu Larúeihanrügüñein lan Bungiu gayara lagidaruni marichaü sunsuinagubei. Ligía layusurunbalin liibe-agei lidaani luma lere íchigei uganu buiti luáguti Larúeihan Bungiu (Luk. 8:1). Chóurugüda lumuti houn “ha lamabaña ani mágürabu hagía lun hadügüni lugundan Bungiu”, lagumuchuba lan Bungiu lau marichaü lun súnwandan (Mat. 5:6; Luk. 18:​7, 8). Mámaba arúeihani ubouaguna ibihei katei le, lugundun Larúeihan Bungiu le ‘mámabei lánina ubóu le’, ligíaba agumucha lau marichaü ubouagugiñe (aliiha huméi Huan 18:36).

ÁYEIHA WAMÉI HESUSU DAN LE WARIHIN MARICHAÜ

9. Ka uagu chouru hubalin Larúeihanrügübei lan Bungiu agumucha lau marichaü?

⁹ Kei wawinwanduña lan lidan “lagumuhóun dan”, arihatiwa gíbetima lan marichaü lidan wadaani sügǘ lau le larihubei Hesusu lidan lidaani. Lau sun lira, ligiamémegili lébuna marichaü le ubouagubei: Mafia hama gürigia gafigountiña ha áyeihabalin (2 Tim. 3:​1-5, 13; Aruf. 12:12). Ítara kei Hesusu, subudi wamuti Larúeihanrügübei lan Bungiu agidarei lébuna marichaü ubouagugiñe sunsuinagubei. Kei luéigiñeñadiwa lubéi lóubadina arúeihani le, mádaraguntiwa woungua lidoun amarücharuni ni lidoun amu burí katei le hadügübei polítiku lun hageindagun luéigiñe haricha gürigia. Ariha waméi tikesin aban íbiri gíritu Stacy.a Lubaragiñe tasubudiruni inarüni, óundaratu meha hama gürigia ha ageindagubaña lun ñein lan somu asansiruni ubouagu. Lau lásügürün dan, aba lebelurun machouruni tun anhein laranserubei lubéi le tadügübei haturobulin gürigia. Ariñagatu: “Aba nálügüdagun nungua dan le anaha lan amarüchara, anhein nihán lubéi láranibei haturobulin gürigia. Guenlé, kei luéigiñeñadina lubéi lóubadina Larúeihan Bungiu, chouru naali Larúeihan lan Bungiu láranibei sun haturobulin gürigia. Chouru numuti lagumuchuba lan Heowá lau asufuriruni le ubouagubei, katei le násiñarubei adüga” (Sal. 72:​1, 4).

10. Según Matéu 5:​43-48, ka uagu málugun wabéi wóundarun hama ha busenbaña hadügün asansiruni lidan arúeihani? (Ariha humóun giñe iyawaü).

¹⁰ Saragu burí gürigia uguñe weyu aba hóundarun lun hibihin asansiruni lidan arúeihani, saragu hádangiñe aba hasafaragun aba hadüraaguni lúrudu ani aba hadügün damichi houn amu, mama katei le larufudahabei Hesusu woun lun wadügüni (Efe. 4:31). Ariñagati aban íbiri gíriti Jeffrey: “Subudi numuti anihein lan amarücharuni gumeseti lau darangilaü, lau sun lira, lidan murusun oura gayaraati lasansiragun katei lun ñein lan anarimeni, chagaguaü luma íweruni”. Gama lumoun, arufudahati Hesusu woun lun wóuseruniña sun gürigia lau ínsiñeni, íbini gürigia ha masaminarunbaña kei wagía o ha éibaahabaliwa (aliiha huméi Matéu 5:​43-48). Áfaaguatiwa wagía kristiánugu lun wafalaruni le ladügübei Hesusu luma le larufudahabei.

11. Ka uagu anihein lubéi dan hénrengu lan woun wafalaruni le ladügübei Hesusu?

¹¹ Íbini subudi wamani lagumuchuba lan Larúeihan Bungiu lau marichaü sunsuinagubei, gayaraati ñeinbei lan dan hénrengubei lan woun wafalaruni le ladügübei Hesusu dan le wouserún lau marichaü. Ariha waméi le asuseredubei tun Janiya, to ouserúboun wuriba ladüga tirasan. Ariñagatu: “Aba nírudun saragu. Aba giñe nagañidun ani busentina yebe lun hafayeirun luagu wuribani le hadügübei nun. Saminatina yebe nóundarun hama gürigia ha amarücharubaña lun hageindagun luagu haricha gürigia ha lánina amu rasa. Saminatina yebe lau lan nadügüni katei le ladügüba lan lun buidu lan nasandiragun nungua”. Gama lumoun, lau lásügürün dan, aba tíchugun fe mosu lan buga tasansiruni ligaburi tisaminan. Ariñagatu: “Aba níchugun fe nagumeseruña lan afiñera hawagu gürigia lubaragiñe nafiñerun luagu Heowá. Ligía aba lubéi nadisedun hawéi gürigia ha sunsuinagubei”. Íbini mariban lan wagañidun dan le wasufurirun o hasufurirun amu marichaü, mosu duari wamá luéi wádaragun woungua lidoun katei lánina ubóu le (Huan 15:19).

12. Ka uagu lunti lubéi wóunigiruni le warihubei, le waliihabei luma le waganbubei?

¹² Ka gayaraabei líderaguniwa lun wakipurun darangilaü dan le wasufurirun o warihin amu asufurira marichaü? Aban katei le gayaraabei wadügüni wóunigiruni le warihubei, le waliihabei luma le waganbubei. Buin liña interneti lau saragu abahüdaguni, anihein lídangiñe, hanarimeburiti ani adügǘwati lun taweiridun hanigi gürigia luma lun hekeharun hawagu polítiku. Luéigiñe le aban oubaü, lubaragiñe hariñaguni ha íchugubaña ñunsu le asuseredubei, ábarüga hariñaguni le hasaminarubei. Íbini inarüni lan aban ñunsu le ichugúbei luagu somu marichaü, kaba wibiha ánhawa eredera asaminara luagu? Ánhawa ásügüra saragu dan ariha, aliiha o aganba luagu marichaü ligía, másiñati ladügüba lan katei le lun mederaguagüdün lan wasaminan luma lun weferidiruni waguraasun (Ari. 24:10). Ani le wuribatimabei, gayara lan wabulieiduni Larúeihan lan Bungiu láranibei marichaü burí le.

13. Ida liña líderaguniwa waliihanu Bíbülia sagü weyu dan le warihin houserún gürigia lau marichaü uguñe weyu?

¹³ Ábanya katei le gayaraabei líderaguniwa, waliihanu Bíbülia sagü weyu luma lun wararamagun asaminara luagu le waliihabei. Aba tírudun aban íbiri gíritu Alia saragu dan le tarihin wuriba lan houserún fiu gürigia ha erederubaña lidan fulasu le ñein lubéi teredera ani aba tagañidun saragu dan le tarihin madügǘn lan ni kata houn ha adügübalin wuribani ligía. Ariñagatu: “Mosu buga nararamagun asaminara luagu Heowaba lan aranserei sun turobuli burí le. Ábati naliihani Hobu 34:​22-29, le achoururagüdübalin woun ua lan gayaraati laramudagun luéi Heowá. Ligíarügüñein asubudirei ka lan richabei ani ligíarügübei giñe aranserei sun burí turobuli le sunsuinagubei”. Gama lumoun, ka gayaraabei wadügüni guentó lidan awanha lan agurabaha lun lagumuchun Larúeihan Bungiu lau sun marichaü le yaabei ubouagu?

KA GAYARAABEI WADÜGÜNI GUENTÓ?

14. Ka lunbei wadügüni lun móuserun wamaniña amu lau marichaü? (Kolosana 3:​10, 11).

¹⁴ Inarüni siñá lan weredehaniña gürigia luéi hóuseruniña amu lau marichaü, ánheinti wagía subudi wamuti ida luba lan wóuseruniña amu. Kei le aubei warihei, áyeiha wamuti Hesusu lau warufudun ínsiñeni houn amu. Ani ínchaha lumutiwa ínsiñeni ligía lun wóuseruniña sun gürigia lau inebesei, íbini gürigia ha adügübaña marichaü woun (Mat. 7:12; Rom. 12:17). Gúndaati Heowá wau dan le wóuseruniña sun gürigia lau ínsiñeni luma irichaü (aliiha huméi Kolosana 3:​10, 11).

15. Ka wibihubei lau wapurichihani uganu le tídanbei Bíbülia?

¹⁵ Wapurichihani uganu le tídanbei Bíbülia, ligía aban katei le gayaraabei wadügüni lun wídehan lun maganwoundun lan marichaü ubouagu. Ka uagu wariñagei katei le? Lugundun gayara lan ladügün inarüni le tídanbei Bíbülia lun lasansiruni aban gürigia ligaburi, íbini fasi lan meha ani furunde ligía, gayaraati liabin lun ábanhali lan gürigia hínsiñehabuti ani darangilaü ligía (Isa. 11:​6, 7, 9). Lubaragiñe lasubudiruni aban wügüri gíriti Jemal inarüni, aba meha lóundarun lidoun aban sétanu le ageindagubei hama gumadimatiña ladüga según ligía, óusera hamutiña gürigia lau marichaü. Ariñagati: “Mama lau erei hasansira gürigia, hasansiruba lau wayusurunu Bíbülia. Ligía adügübei lun nasansiruni nigaburi”. Inarüni le lafurendeirubei tídangiñe Bíbülia, ligía ínchahabalin lun mageindagunhali lan luagu marichaü. Kada gürigia le asansirubalin ligaburi lau laturiahanu Bíbülia, lídehaña lun maganwoundun lan marichaü ubouagu.

16. Ka uagu busén hubéi hapurichihani uganu luáguti Larúeihan Bungiu?

¹⁶ Ítara kei Hesusu, busentiwa wariñagun houn gürigia Larúeihan lan Bungiu láranibei sun marichaü le ubouagubei. Ítararügübei gayara lan wíchugun emenigini houn gürigia ha asufurirubaña marichaü ubouagu (Her. 29:11). Ariñagatu Stacy, to iridúboun lidan párafu 9: “Íderagua láadina nasubudiruni inarüni lun nawanduni marichaü le ariha náalibei luma le winwan náalibei. Yusu lumutu Heowá Bíbülia lun líchugun gurasu woun”. Mosu waranserun buidu lun gayara lan wíchugun gurasu houn gürigia lau füramasei le tídanbei Bíbülia. Éibutima wachoururuni lagumuchuba lan Larúeihan Bungiu lau sun marichaü le yaabei ubouagu, ménrenguntimabei woun wayanuhan lau inebesei houn amu danme le gachansin wamá wapurichihan leskuelarugu o lidan fulasu le ñein lubéi wawadigimarida.b

17. Ida liña líderaguniwa Heowá lun wawanduni marichaü le ubouagubei?

¹⁷ Subudi wamuti ñeinmemebei lan marichaü sun anihagua lan Mafia agumadiha lidan ubóu le. Gama lumoun, líderagubadiwa Heowá ani füramaseti woun yarafa lan madise lagumuchuba lan lau Mafia (Huan 12:31). Lanwoun lira, afuranguagüdati woun tidan Bíbülia ka lan uagu anihein lubéi saragu marichaü ubouagu ani chóurugüda lumuti woun gari lan lun larihiniwa asufurira marichaü (Sal. 34:​17-19). Ani yusu lumuti Liráü lun larufudahan woun ida luba lan wóunabun lun marichaü lúmati ida luba lan lagumuchun Larúeihan lau sun marichaü le yaabei ubouagu sunsuinagubei (2 Fe. 3:13). Ligíati, sigí wamá apurichihei uganu luáguti Larúeihan Bungiu lau ubebeni sun awanha lan agurabaha lachülürün weyu le ñeinba lubéi “irichaüba” lan adügǘwa ubouagu (Isa. 9:7).