ÁLÜGÜDAHANI BURÍ TUAGU BÍBÜLIA
Inarüni san lúmagiñe lan Bungiu tiabin Bíbülia?
Anhein lúmagiñe lubéi Bungiu tiabin aban líburu, lunti wagurabahan espechaliboun lan, ani espechalitu Bíbülia. Imprimíruaru saragu míñunu tídangiñe lidan saragu iñeñein. Ani subudi le tídanbei gabafuti lun lasansiruni habagari gürigia. (Aliiha huméi 1 Tesalónikana 2:13 luma 2 Timotéu 3:16.)
Gayarati wachoururuni lúmagiñe lan Bungiu tiabin Bíbülia lugundun ayanuhatu luagu le lunbei lasuseredun ámuñegü, ani susereti, aban katei le siñá hamuti gürigia adüga. Kei hénpulu, lidan aban aramudaguagülei yarafa lun barana Hilaali dariwati kopia tani liliburun Isaíasi to meha adügǘboun lóugiñe san irumu lubaragiñe nasirua lan Hesusu. Ariñagati ñein úaaña lanme gürigia erederutiña Babilónia. Gúnfuliti profesía ligía saragu irumu lárigiñe lounwen Hesusu. (Aliiha huméi Isaíasi 13:19, 20 luma 2 Féduru 1:20, 21.)
Ida liña san tabürüdǘn Bíbülia?
Bián-wéinñanu wügüriña abürütu Bíbülia lidan milu-sisi-san irumu, luagu ligiaméme katei hayanuha ani úati ni aban asigeneruti le hariñagubei ha híbiri. Ida liña hibihini? Bungiu guánarügü adundehabaliña. (Aliiha huméi 2 Samueli 23:2.)
Íbini anihein lan meha dan layusurun Bungiu ánheligu, arufudúni luma uénedu lun layanuhan hama abürühatiña, libe-agei dan, rúrügü lumuti lisaminan lidoun hachügü ani aba lígiruniña lun hanúadahani dimurei le habusenrubei hayusurun lun habürüdüni uganu ligía. (Aliiha huméi Arufudúni 1:1; 21:3-5.)