Ka uagu busén lubéi Bungiu wafurieidun lun?

Amisuraha lumutiwa Bungiu adüga umadaguaü luma

Dan le ayanuha hamá umadagu hámagua ábatima labuidurun hanaagun houngua. Amisuraha lumutiwa Bungiu ayanuha luma gamadagua wamaamuga luma. Ariñagati woun: “Ábameti hagúahanina, afurieida huguyame nun ábame naganbunün” (Heremíasi 29:12). Éibume wayanuhan luma Bungiu wayarafadatimaba lun ani “ábame giñe layarafadun” woun (Santiagu 4:8). Darí wamuti füramasei le tidan Bíbülia: “Yarafati Aburemei houn ha agúahabaña luagu” (Sálumu 145:18). Éibume gabügürügua lan wayanuhan luma, buídutimabei wamadagua luma.

Busenti Bungiu líderaguniwa

Ariñagati Hesusu: “Anihein funagia aban hídangiñe le íchuguti aban dübü lun lisaani dan le lamuriahan fein luma? O líchugun lan aban hewe lun dan le lamuriahan úduraü luma? [...] Gíchigaditün katei buiti houn hisaanigu, gúbumegia líchiga Húguchi Bungiu le siélubei katei buiti houn ha amuriahatiña luma!” (Matéu 7:9-11). Ítara liña, busenti Bungiu wafurieidun lun lugundun bereseti wau ani layumahaña líderaguniwa (1 Féduru 5:7). Ligía lamisurahanbaliwa abahüdaguei waturóbulin lun. Ariñagatu Bíbülia woun: “Madiherida humá luagu ni kata, ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun” (Filipuna 4:6).

Megei hamuti gürigia Bungiu

Ariha hamaali sásaamu ha aturiahabalin ligaburi hóuserun gürigia, megei hamá saragu míñunu gürigia hafurieidun. Furíeitiña íbini gürigia ha mafiñenbaña luagu Bungiu o ha machourunbalin anhein lan.a Adügati katei le lun wachoururuni adügǘwa wamá lun megei wamá wayarafadun lun Le adügübaliwa. Ariñagati Hesusu: “Fuleseiwatiña [o gúndaatiña] ha asubudirubalin luagu megei hamani lídehan Bungiu” (Matéu 5:3). Wafurieidun lun Bungiu estodi ligía aban lídangiñe katei le aubei warufudei megei wamani lídehan.

Ka gayaraabei lasuseredun ánhawa ánhara lun amisurahani le ladügübei woun?