Gebegilá wadagimanu lánina apurichihani woun
1. Ida liña harihini saragu gürigia ubouaguna wadagimanu lánina apurichihani?
1 Saragu gürigia lidan ubóu le lábugiñebei lubafu Satanási ariha hamuti apurichihani le wadügübei kei aban “libidiounigan aau” (1 Ko. 1:18-21). Ánhawa móunigi, gayarati ladügün ligaburi saminaü garabaguati le lun weferidiruni waguraasun ani lalouguaduba giñe wemeidi luagu apurichihani (Ari. 24:10; Isa. 5:20). Ka burí resun wámabei lun gebegi lan weseriwidun kei gefentiña luagu Heowá? (Isa. 43:10.)
2. Ka uagu gayara lubéi wariñagun luagu aban lan wadagimanu sánduti wani ministeriu?
2 Aban wadagimanu sánduti. Adimurehati apostolu Pábulu luagu wani ministeriu kei aban wadagimanu sánduti (Rom. 15:15, 16). Dan le wadügüni wadagimanu le, wawadigimariduña úara luma Wabungiute le Sándubei, ani ídehati wadagimanu le lun ladügǘniwa liri Bungiu sándume (1 Ko. 3:9; 1 Fe. 1:15). Ariha lumuti Heowá wapurichihan kei aban sákürifisiu lun wíchugun “uéiriguni lun lau wayuma”, ligíati súdini lubéi apurichihani lidan wáhuduragun lun (Ebü. 13:15).
3. Ka uagu gayara lubéi wariñagun aban lan lubuidun wadagimanu apurichihani?
3 Wéiriti lebegi lapurichihóun uganu buiti woun ani fiúrügüñanu gürigia adügei. Gúndaatiña hamuga ánheligu lun hadügüni wadagimanu le (1 Fe. 1:12). Chóuruti hadügüñein lan hamuga buidu. Gama lumoun anúadira láadiwa Heowá, gürigia gafigountiña, ha ítarabaña “kei aban sóudieru lauti múa”, lun wadügüni lubuidun wadagimanu le (2 Ko. 4:7).
4. Ida luba warufuduni luagu gebegi lan wani ministeriu woun?
4 Lunti letenirún lun furumiñe. Kei weiri lubéi lebegi wani ministeriu woun, ligía warihinbalin kei katei le súdinitimabei lidan wabagari (Fili. 1:10). Ligíati wasagarunbei dan kada dimaasu lun wapurichihan. Aban gürigia le lídanbei aban konhuntu le unbei gebegi lan luadigimari, aransehati buidu lun buídutima lan láfaruni lani instrumentu lánina músika. Ítarameme aransehatiwa giñe lubaragiñe wáfuridun apurichiha, lun gayara lan warufudahani “uganu lánina inarüni kei lubudubu” ani áfaaguatiwa giñe lun buídutima lan ligaburi warufudahan (2 Tim. 2:15; 4:2).
5. Ka un gebegi lan wani ministeriu?
5 Moun lumuti wígirun lun lagidaruni ligaburi hóunabun gürigia waguraasun. Añahagua saragu gürigia ha unbaña gebegi lan wabisidahan. Wagundaaragüdüni Heowá ligía súdinitimabei woun, mama wagundaaragüdüniña gürigia. Ani gayarati wachoururuni luagu wéiriti lan lebegi áfaaguni le wadügübei lun (Isa. 52:7).