Íderagua wamaña gürigia ha aganbubadiwa lun hasaminarun
1. Kaba íchiga resultóu le buídutimati woun lidan wani ministeriu?
1 Kaba san íchiga resultóu le buídutimati woun lidan wani ministeriu: wafosuruniña gürigia lun hánharun lun uganu o wíderaguniña lun hasaminarun luma lun hasubudiruni liricha katei? Adüga lumuti apostolu Pábulu lira, dan le ladimurehanbei hama huríu ha aganóubaña Tesalónika ani, “ábati hafiñerun hádangiñe” (Adü. 17:2-4). Gama lumoun, ida luba wíderaguniña gürigia lun hasaminarun?
2. Ida luba wáyeihani lani Pábulu hénpulu dan le wapurichihani uganu buiti?
2 Abahüda waméi le hasaminarubei gürigia. Lun wíderaguniña gürigia ha únbaña wapurichiha lun hasaminarun, mosu wabahüdüni le hasaminarubei. Dan le meha ladimurehanbei Pábulu houn saragu güriegu mafiñetiña ha Areupagubaña, gumeseti adimureha houn luagu katei burí le hasubudirubei ani ánhatiña lun (Adü. 17:22-31). Ítarameme, dan le waransehan lubá ministeriu, samina wamá luagu le uágubei hafiñera gürigia ha únbaña wapurichiha luma saminaü charati le hawagubei (1 Ko. 9:19-22). Anhaña ariñaga gürigia somu katei le eredehabalin yanu, mosu wáluahan wadimurehan hama luagu aban katei le hínsiñeti houn.
3. Ida liña lídehan wádügün álügüdahani le samina wamuti buidu lun wíderaguniña gürigia lun hasaminarun?
3 Adüga wamá álügüdahani le samina wamuti buidu. Siñati wadundehan luéigiñe gágamuru aban gürigia le awéiyasuhabei lidoun aban fulasu, anhein ibidiñe lubéi woun halíañein lan. Ítarameme, siñati giñe wíderaguniña gürigia lun hasubudiruni liricha katei, anhein ibidiñe lubéi woun ka lan hasaminarubei. Lun meha líderaguniña Hesusu gürigia lun hasaminarun, adügatiha álügüdahani houn furumiñe lun lasubudiruni ka lan hasaminarubei. Aban hénpulu, dan le lálügüdünbalin aban gürigia: “Kaba san nadüga lun gayara lan nibinihi ibagari magumuchaditi?”, álügüda lumuti furumiñe ka lan lasaminarubei lubaragiñe lóunabuni (Luk. 10:25-28). Lidan amu ókaasion, ariñagati Féduru aban katei charati, adügati Hesusu fiú álügüdahani lun, lun líderaguni arihei katei keisi lubudubu (Mat. 17:24-26). Ligíati, danme le hariñaguni gürigia katei le machourun habéi o aban katei charati, adüga wamá álügüdahani houn lun wíderaguniña asaminara.
4. Ka uagu mosu lubéi wíderaguniña gürigia ha aganbubadiwa lun hasaminarun?
4 Ságüme wíderaguniña gürigia lun hasaminarun, wáyeihañeinme Hesusu, Wamaisturun le Wéirigubei, wáyeihañanume giñe amu apurichihatiña buítiña lánina furumiñeti sígulu. Warufuduba giñe inebesei houn gürigia ha aganbubadiwa (1 Fe. 3:15). Ítara, háfuga busenbaña lunya wabisidahaniña.