Buidutimalá wadügüni katei: apurichiha wamá tau líburu Kátima san

Ka uagu súdini lubéi? Wéiritimati wayusurunu líburu Kátima san lidan wani ministeriu. Gama lumoun, anhein busén wabéi wíchugun aturiahani tídangiñeti Bíbülia tau líburu to, furumiñe mosu wíchugunu lun gürigia. Ligía súdini lubéi wáfaagun lun wabuiduragüdüni ligaburi wapurichihan tau (Ari. 22:29). Anihein ámuñegueinarügü ligaburi lapurichihóun tau líburu to, ligía gayara lubéi wanúadiruni igaburi létima íchugubei resultóu buiti woun lidan fulasu le ñein lubéi wapurichiha.

Le lunbei wadügüni:

Adüga humá aban álügüdahani lun gürigia le adügüti lun busén lan lasigirun afurendeira luagu le lariñagubei aban lídangiñe kapítulu le tídanbei líburu. Gayaraati hanúadirun aban lídangiñe álügüdahani le aubei lagumesera somu kapítulu. Lárigiñe haganbuni lóunabagüle gürigia, aliiha humá aban bérusu tídangiñe Bíbülia lun ani yusu humá fiu minutu lun hakutihan aban párafu tídangiñe líburu le ídanti lounabúa álügüdahani ligía.
Gayaraati giñe wayusuruni álügüdahani burí le lídanbei tebelaagüle líburu lun wachawahaniña gürigia lun busén hamá hasigirun afurendeira, arufuda wameime houn tidan líburu ka lan óunabagülei tíchugubei Bíbülia lun álügüdahani burí ligía. Kéiburi hamuga lárigiñe wayanuhan lun gürigia luagu somu lamiselu le uáguti laganbahóua lidan burí ñunsu, gayaraati wariñagun lun gibe hamá gürigia adügüti álügüdahani burí le áfuachubei lidan páhina 3 hóuniwagua. O gayaraati giñe wariñagun houn gürigia wabisidahañanu lan besinagu lun wayanuhan hama luagu emenigini le wawagubei lubá ámuñegü. Ábameti warufuduni dibuhu burí le lídanbei páhina 4 luma 5 houn, ñéingiñe ábame wálügüdüniña: “Ka lídangiñe füramasei le hayumahabei harihini lagunfulirun?”. Gayaraati giñe wariñagun houn wabisidahañanu lan murusunraü lun wayanuhan hama luagu fiu lídangiñe álügüdahani súdiniti le wadügübei súngubei wagía wóuniwagua. Ábameti warufuduni álügüdahani le áfuachubei lidoun lagumuchun páhina 6 houn, álügüda wamañame ka lan lídangiñe álügüdahani ligía unbei habusenra hadarirun óunabagülei.
Houcha wamá wagumeserun aturiahoun Bíbülia luma somu gürigia lau wálügüdüni furangu anhein busén lubéi laturiahanu Bíbülia wama. Gayaraati wariñagun aban katei ítarati: “Wálügüdüñanu besinagu anhein busén habéi heresibirunu líburu to lun haturiahanu Bíbülia. Arihañaha humaaru san? [Ígira humá lun lóunabun gürigia.] Anhein gadaani hubéi, hínsiñeti hamuga nun narufuduni hun ida luba lan hayusurunu lun haturiahanu hibibülian”.

Houcha humá hadügüni le lidan sun hati:

Direi humá dan lidan háhuduragun kei iduheñu lun haransehani ani asayaha humeime ida luba lan hapurichihan tau líburu to.
Danme le hapurichihaña lan, ariñaga huméi lun hupaaná ka lan hasaminarubei hariñagun lun hagumeserun apurichiha houn gürigia (Ari. 27:17). Anhein hariha mabuidun lan lidin hun lau, sansi huméi.